ރާއްޖޭގެ ސިޔާސީ ތާރީހުގައި އެންމެ ދޮށީ ޕާޓީއަކީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އެވެ. އެޕާޓީގެ "ރަން ރީނދޫ ލަޝްކަރު" ގެ ގަދަފަދަ ކަމުގެ ވާހަކަ ދައްކަމުން އަންނަތާ 16 ވަރަކަށް އަހަރު ވެއްޖެ އެވެ. އެހެން ސިޔާސީ ޕާޓީތައް ރޫޅި، ފިކުރު ބަދަލުކުރަމުން ދިޔައިރުވެސް އެމްޑީޕީއަކަށް ބަދަލެއް ނައެވެ. ޕާޓީގެ ރައީސް މުހައްމަދު ނަޝީދު ސިފަކުރައްވާ ގޮތަށް އެމްޑީޕީއަކީ ހިތާއި ހިތުގެ ގުޅުމަކުން ގުޅިފައިވާ ޕާޓީ އެކެވެ.
އެހެންނަމަވެސް މިދިޔަ 16 އަހަރު ދުވަހުގެ ތެރޭގައި އެކި ފަހަރުމަތިން ޕާޓީގެ އެތެރޭގައި ހަމަނުޖެހުން އުފެދުނެވެ. އިސް މަގާމުތަކުގައި ތިއްބަވައި ނަޝީދާއި ވާދަކުރައްވަން ނިކުންނެވި ކޮންމެ ބޭފުޅަކުވެސް ވަނީ މަޑުމަޑުން ޕާޓީން އެއްފަރާތް ކޮށްފަ އެވެ. އެހެންނަމަވެސް އެމްޑީޕީގެ ރޫހަކަށް ބަދަލެއް ނައެވެ. އެޕާޓީގެ ކުލަވެސް ފަނޑެއް ނުވި އެވެ. އަބަދުވެސް ސިޔާސީ ގޮތުން އެންމެ އަޑުގަދަ، އަމަލު ގިނަ ޕާޓީއަކީވެސް އެމްޑީޕީ އެވެ. ވެރިކަން ކުރުމާއި ރާއްޖެ ތަރައްގީ ކުރުމުގައި މާބޮޑެތި ކާމިޔާބީއެއް ހާސިލް ނުވިނަމަވެސް ރާއްޖެ މިއަދު މިދެކޭ ޑިމޮކްރަސީގެ އެއް އަސާސަކީ އެމްޑީޕީއޭ ދެންނެވުން ކުށަކަށް ނުވާނެ އެވެ.
އެމްޑީޕީގެ މެމްބަރުންގެ ގޮތުގައި ގާތްގަނޑަކަށް 53،000 އަށްވުރެއް ގިނަ މެމްބަރުން ތިބިއިރު މިއަދު މިވަނީ އެޕާޓީ ދެބަޔަކަށް ފެޅެން ވަރަށް ގާތް ވެފަ އެވެ. ލީޑަޝިޕް ދެބައި ވެއްޖެ އެވެ. އެހެންނަމަވެސް މެމްބަރުން ހަދާނެ ގޮތެއް އަދި މުޅިން ސާފެއް ނުވެ އެވެ. ބައެއް އެކްޓިވިސްޓުން އާ ޕާޓީއެއް އުފައްދައި ރައީސް ނަޝީދުގެ ފިކުރު ވަކިވާން ޖެހޭކަމަށް ބުނަމުން ދާއިރު އަނެއް ބަޔަކު އަޑު އުފުލަނީ ރައީސް އިބްރާހިމް މުހައްމަދު ސޯލިހަށް ތާއީދު ކުރާ ބޭފުޅުން ޕާޓީން އެއްފަރާތް ކުރުމަށެވެ. މިއީ އިއްޔެއަކު މިއަދަކު ފެށިގެން އުޅޭ ދެބައިވުމެއް ނޫނެވެ. ހަގީގަތަށް ދަންނަވާނަމަ ޕާޓީގެ އެންމެ މުގުލުގައި އަލިފާން ރޯވާން ފެށިތާ ދުވަސްކޮޅެއް ވެއްޖެ އެވެ.
ރައީސް މުހައްމަދު ނަޝީދާއި ރައީސް ސޯޅިހު
ރައީސް ސޯލިހާއި ހަމައިން ސިޔާސަތު ބަދަލުވުން
އެމްޑީޕީއަކީ އަސާސްތަކެއްގެ މައްޗަށް ބިނާވެފައި އޮތް ޕާޓީއެކެވެ. އެއީ ފިކުރެކެވެ. އަދި އެއީ އުސޫލުތަކެއް ހިފަހައްޓައިގެން އޮތް ޕާޓީއެކެވެ. އެހެންނަމަވެސް ވޭތުވެދިޔަ ކުރު މާޒީގައި ޕާޓީގެ އުސޫލުތަކަށް ކޮންމެވެސް ވަރެއްގެ ބަދަލުތަކެއް އައެވެ. އެގޮތުން މީގެ ކުރިން އެމްޑީޕީގެ އަސާސީ ގަވާއިދުގައި ބުނާ ގޮތުން ޕާޓީގެ ރައީސްކަމުގައި ހުންނަވާނީ ގައުމުގެ ރައީސުލްޖުމްހޫރިއްޔާ ކަމުގައި އެޕާޓީގެ މެމްބަރެއް ހުންނެވިނަމަ އެބޭފުޅެކެވެ. ރައީސް ނަޝީދު 2008 ވަނަ އަހަރު ވެރިކަމަށް ވަޑައިގެންނެވިއިރު ގަވާއިދު އޮތީ މިހެންނެވެ. 2018 ވަނަ އަހަރާ ޖެހެންދެންވެސް ގަވާއިދު އޮތީ މިހެންނެވެ. އެހެންނަމަވެސް ރައީސް ސޯލިހު ރައީސުލްޖުމްހޫރިއްޔާގެ މަގާމާއި ހަވާލުވެވަޑައިގެންނެވުމާއިއެކު އެ ގަވާއިދު ބަދަލުކުރަން ޕާޓީގެ ލީޑަޝިޕުން ބޭނުންވެއްޖެ އެވެ. އެހެންވެ ގަވާއިދު ބަދަލުކޮށް ޕާޓީގެ ރައީސްކަމާއި ހަވާލުވެވަޑައިގެންނެވީ ރައީސް ނަޝީދެވެ.
މިގޮތަށް ގަވާއިދު ބަދަލުކުރުމާއިއެކު ރައީސް ސޯލިހަށް ލިބިވަޑައިގެންނެވީ އިސް ލީޑަރުގެ މަގާމެވެ. އެހެންނަމަވެސް ޖުމްލަކޮށް ޕާޓީގެ ތެރޭގައި އެމަނިކުފާނުގެ ބަސް ވިކޭނެ ގޮތެއް ނެތެވެ. 2018 ވަނަ އަހަރު ރައީސް ސޯލިހު ވެރިކަމަށް ވަޑައިގެންނެވީ އިތުރު ހަތަރު ލީޑަރުންގެ ކޯލިޝަނެއްގެ ތެރެއިންނެވެ. އެހެންކަމުން ސަރުކާރުގެ ތެރެއިން 4 ޕާޓީއަކަށް ބައި އަޅަން ޖެހިއްޖެ އެވެ. އޭރު ހެދި އެއްބަސްވުމުގެ ދަށުން 5 އަހަރު ތެރޭގައި ހުރިހާ ނިންމުމެއްގައި 4 ޕާޓީއަށްވެސް އެއްވަރަށް ބަސް ބުނެވެން ޖެހޭނެ އެވެ.
އެންމެ ފުރަތަމަ ހިޔާލު ތަފާތުވީ 2019 ވަނަ އަހަރުގެ މަޖިލިސް އިންތިހާބުގެ ތެރެއިންނެވެ. ހެދިފައިވާ ކޯލިޝަންގެ ތެރެއިން އެމްޑީޕީއަށް ވާދަކުރަން ލިބެނީ އެންމެ ގިނަ ވެގެން 35 ވަރަކަށް ގޮނޑިއަށެވެ. 85 ގޮނޑީގެ ތެރެއިން ބާކީ ގޮނޑިތައް ދޭން މިޖެހެނީ އެހެން ޕާޓީތަކަށެވެ. ރައީސް ސޯލިހު ބޭނުންފުޅުވީ ކޯލިޝަންގެ ތެރެއިން މިކަންވެސް ކުރާށެވެ. އެހެންނަމަވެސް ރައީސް ނަޝީދަކަށް މިގޮތް ކަމަކު ނުދިޔެ އެވެ. އެމަނިކުފާނު ވިދާޅުވި ގޮތުގައި 35 ގޮނޑިއަކީ އެމްޑީޕީއަށް ފުދޭ މިންވަރެއް ނޫނެވެ. ހަގީގަތަށް ބަލާނަމަ އެމްޑީޕީ ފަދަ ބޮޑު ޕާޓީއަކަށް އެއީ ފުދޭ މިންވަރެއް ކަމަކަށް ނުބެލެވެ އެވެ. އެއީ ކޯލިޝަންގައި ދެން އޮތް ޕާޓީތަކަކީ އެމްޑީޕީއާއި އަޅާ ބަލާއިރު ސިޔާސީ ގޮތުން މާ ކާމިޔާބު ޕާޓީތަކެއް ނޫނެވެ. އަދި އެމްޑީޕީން އެންމެ 35 ގޮނޑިއަށް ވާދަކުރާނަމަ އިދިކޮޅަށް ގިނަ ގޮނޑިތަކެއް ލިބުމުގެ ފުރުސަތު ވަރަށް ބޮޑަށް ހުޅުވިގެން ދާނެކަމަށް އޭރު ބެލެވުނެވެ.
ކޮންމެއަކަސް ރައީސް ނަޝީދު އިސްނަންގަވައި ޕާޓީން ހުރިހާ ގޮނޑިއަކަށް ވާދަކުރަން ނިންމުމުން އެކަން ކޯލިޝަންގެ އެހެން ޕާޓީތަކަށް ކަމަކު ނުދިޔަ އެވެ. ރައީސް ސޯލިހުވެސް ހުންނެވީ އެކަމަށް ބަހެއް ވިދާޅު ނުވިނަމަވެސް ކޯލިޝަނާއިމެދު ކަންވީގޮތުން ހިތްހަމަޖެހިވަޑައިގެންނެކޭ ދެންނެވޭކަށް ނެތެވެ. އެމްޑީޕީގެ ތެރޭގައި ރެނދު ލާން ފެށީ މިހާ ހިސާބުންނެވެ.
އޭގެ ފަހުން މަޖިލިސް އިންތިހާބުގައި އެމްޑީޕިން ބޮޑު ކާމިޔާބެއް ހޯދައި މަޖިލީހުގެ 65 ގޮނޑި އެޕާޓީގެ ނަމުގައި ލިޔެލި އެވެ. ދެން ފެށުނީ އަނެއްކާވެސް ކޯޅުމެކެވެ. މަޖިލީހުގެ ރައީސާއި ނައިބުރައީސްގެ މަގާމަށް މެމްބަރުން އިންތިހާބު ކުރުމެވެ. މިކަމުގައި ރައީސް ސޯލިހަށް ކަމުދިޔަ މެމްބަރު ރައީސް ނަޝީދަކަށް ކަމަކު ނުދިޔަ އެވެ. އަދި ރައީސް ނަޝީދަށް ކަމުދިޔަ މެމްބަރު ރައީސް ސޯލިހަކަށް ކަމަކު ނުދިޔަ އެވެ. އެންމެ ފަހުން މައްސަލަ ބޮޑުވެ ރައީސްކަމަށް ނަޝީދު އަދި ނައިބުރައީސްކަމަށް ނަޝީދުގެ ކޮއްކޯފުޅު އީވާ އަބްދުﷲ އިންތިހާބު ކުރެއްވި އެވެ. މިއީވެސް ރައީސް ސޯލިހުގެ ބާރުގެ ދަށުން ބީވެގެންދިޔަ ނިންމުމެކެވެ.
ފައްޔާޒުއާއި ނަޝީދުގެ ކޯޅުން
ސަރުކާރާއި މަޖިލީހުގެ ތެރޭގައި ހިޔާލު ތަފާތުވުން އުފެދެމުން ދިޔައީ ތިޔަހެނެއް ނޫނެވެ. އެކި މިނިސްޓްރީތަކުގެ މަސައްކަތްތަކުގެ ހިތްހަމަނުޖެހުމާއި ބައެއް ސިޔާސަތުތައްވެސް މަޖިލީހުން ދިޔައީ ބޮލާލާ ޖަހަމުންނެވެ. 2008 ވަނަ އަހަރު ރައީސް ނަޝީދު ވެރިކަމަށް ވަޑައިގެން އޭރު އޮތް ރައްޔިތުންގެ މަޖިލީހުން ސަރުކާރަށް އުނދަގޫ ކުރާތީ ކެބިނެޓު އެއްކޮށް އިސްތިއުފާ ދެއްވާކަން އިއުލާން ކުރައްވަމުން ނަޝީދު ވިދާޅުވީ ރައީސް އެކުލަވާލާ ކެބިނެޓާއި މަޖިލީހުން މާބޮޑަށް ކުޅެއް އުޅުއްވާތީ ސަރުކާރު ހިންގަން އުނދަގޫވާކަމަށެވެ. އެހެންނަމަވެސް އޭގެ 11 އަހަރު ފަހުން ރައީސް ނަޝީދު މަޖިލީހުގެ ރައީސްކަމަށް ވަޑައިގެން ކަން ކުރެއްވީ ހަމަ މިގޮތަށްށޭ ދެންނެވުން ކުށަކަށް ނުވާނެ އެވެ.
މަޑުމަޑުން ކަންކަން ބޮއްސުންލަމުން ދިޔަ އެވެ. މަޖިލީހުގެ ތެރެއިން އެމްޑީޕީގެ މެމްބަރުން އިސްކޮށް ތިއްބަވައި ވަޒީރުންނަށް ބަހުގެ ހަމަލާތައް ދޭން ފެށުމާއިއެކު ވަޒީރުން އިސްތިއުފާ ދެއްވަން ފެއްޓެވި އެވެ. ބައެއް ވަޒީރުން މަގާމުން ވަކިކުރައްވަން ރައީސް ސޯލިހަށް މަޖުބޫރުވެ ވަޑައިގެންނެވިއިރު އަނެއްބައި ވަޒީރުން ވަކިކުރެއްވީ މަޖިލީހުން ވޯޓު ނަގައިގެންނެވެ.
އެހެންނަމަވެސް ރައީސް ނަޝީދު ދިމާކޮށްލި އިކޮނޮމިކް މިނިސްޓަރު ފައްޔާޒު އިސްމާއީލްއަކާ މަޖިލީހަކުން ނުކުޅެވުނެވެ. ރައީސް ނަޝީދުގެ ބަހުރުވައިންނަމަ އެމަނިކުފާނުގެ ފެކްޝަން "ޓީމް އެމްޑީޕީ" އަށް އުޅެ އުޅެ ބަލި ނުކުރެވުނީ ފައްޔާޒު އެވެ. އެޕާޓީގެ ބައެއް ބޭފުޅުން ވިދާޅުވާ ގޮތުންނަމަ އެއީ ޕާޓީގެ "ބްރޯ" އެވެ. ރައީސް ސޯލިހުގެ އެންމެ އަރިސް ބޭފުޅާ އެވެ. ފައްޔާޒަށް ކޮރަޕްޝަންގެ ތުހުމަތުތަކެއް ކޮށް މަގާމުން އެއްފަރާތް ވުމަށްވެސް ނަޝީދު އެދިވަޑައިގެންނެވި އެވެ. އެކަން ރައީސް ސޯލިހަށްވެސް ދެންނެވި އެވެ. މަޖިލީހުގެ ތެރެއިން އިތުބާރު ނެތްކަމުގެ ވޯޓު ނަގަންވެސް މަސައްކަތް ކުރެއްވި އެވެ. މިއިން ކޮންމެ ފަހަރަކުވެސް ވީ ނާކާމިޔާބެވެ. ނަތީޖާއެއްގެ ގޮތުން ޕާޓީގެ އެތެރޭގެ ބައިބައިވުން ބޮޑުވި އެވެ.
މިހެން ކަން ހިނގަމުން ދަނިކޮށް ދެން އައީ ލޯކަލް ކައުންސިލް އިންތިހާބެވެ. އެއިންތިހާބާއި ކައިރިވިއިރު އެމްޑީޕީގެ އެތެރެ ވަނީ ވަރަށް ބޮޑަށް ފުނޑިފަ އެވެ. އެހެންކަމުން ހުރިހާ މައްސަލަތަކެއް ފަސް އަޅައި ފޮރުވީ މުލިއާގޭގައި ރައީސް ނަޝީދާއި ރައީސް ސޯލިހު ނެންގެވި ފޮޓޯއަކުންނެވެ. މިއާއެކު އަނެއްކާވެސް ޕާޓީގެ ލީޑަޝިޕް އެއްގަލަކަށް އެރި އެވެ. ނޫނީ އެއްގަލަކަށް އަރާކަން މެމްބަރުންނަށް ދެއްކި އެވެ.
ކައުންސިލް އިންތިހާބުގައި އެމްޑީޕީން މެޖޯރިޓީ ނެގި އެވެ. އެހެންނަމަވެސް ލިބުނީ ނާކާމިޔާބެކެވެ. އެޕާޓީގެ ފުލް ކޮންޓްރޯލްއޮތް ރަން ރީނދޫ އައްޑާތައް އިދިކޮޅު ޕީޕީއެމް/ޕީއެންސީ ކޯލިޝަނުން ނެގި އެވެ. އޭގެ ތެރޭގައި ރައީސް ނަޝީދާއި އީވާ ފަދަ މެމްބަރުން މެމްބަރުކަން ކުރައްވާ މާލެ ސިޓީވެސް ހިމެނެ އެވެ. ކުރިންވެސް ބެލެވިފައި އޮތް ގޮތަށް ކައުންސިލް އިންތިހާބަށްފަހު އެމްޑީޕީގެ އެތެރެ ފަޅައިގެން ދިޔަ އެވެ. ފާޅުގައި ރައީސް ނަޝީދު ބަސް ވިދާޅުވާން ފެއްޓެވީ ދެނެވެ.
ރިޔާސީ ބަޔާން އިއްވެވުމަށް ރައީސް ސޯލިހު މަޖިލީހަށް ވަޑައިގަންނަވަނީ
ބަރުލަމާނީ ނިޒާމާއި ބޮޑުވަޒީރުކަން
ކައުންސިލް އިންތިހާބު ނިމުނުތާ މާގިނަ ދުވަހެއް ނުވެ ރައީސް ނަޝީދު ވަނީ ރައީސް ސޯލިހަށް ވަރުގަދަ ސިޓީފުޅެއް ފޮނުއްވައިފަ އެވެ. އެއީ ރާއްޖެ ބަރުލަމާނީ ނިޒާމަކަށް ބަދަލުކޮށް ބޮޑުވަޒީރުކަމަށް ވަޑައިގަންނަވަން ބޭނުންފުޅުވާކަމަށް ވިދާޅުވަމުންނެވެ. މިކަމާއި ރައީސް ސޯލިހު ފާޅުގައި ދެކޮޅު ހެއްދެވި އެވެ. އަދި ކުރައްވަން ޖެހިވަޑައިގަންނަވާ މާ މުހިންމު މަސައްކަތްތައް ހުންނެވިކަމަށް ވިދާޅުވި އެވެ.
މިވާހަކަތައް އަޑު އައްސަވަން ރައީސް ނަޝީދަކަށް މާ ފަސޭހަފުޅެއް ނުވި އެވެ. އަދިވެސް މަސައްކަތް ކުރެއްވީ ބަރުލަމާނީ ނިޒާމު ގެންނާށެވެ. އެމްޑީޕީގެ ބައެއް އެކްޓިވިސްޓުން ސޯޝަލް މީޑިއާގައި އެކަމަށްޓަކައި ކެމްޕެއިންވެސް ފެއްޓެވި އެވެ. އަދި ރައީސް ނަޝީދު ޓުވީޓު ކުރައްވާ "އެލެކްސް އަހުމަދު" ގެ އެކައުންޓުން ބަރުލަމާނީ ނިޒާމާއި އެއްކޮޅަށް ވާހަކަދައްކަވަން ފެއްޓެވި އެވެ.
ބޮޑުވަޒީރު ކަމުގެ ވާހަކައަކީ ރައީސް ނަޝީދު އަބަދުވެސް ދައްކަވާ ވާހަކަފުޅެކެވެ. 2018 ވަނަ އަހަރުގެ ރިޔާސީ އިންތިހާބުގެ ކެމްޕެއިންގެ ތެރެއިންވެސް އެކި ފަހަރު މަތިން އެވާހަކަ ދެއްކެވި އެވެ. އެހެންނަމަވެސް އޭރުވެސް ކޯލިޝަންގައި އޮތް އެހެން ޕާޓީތަކުން އެކަމަށް ތާއީދެއް ނުކުރި އެވެ. ހާއްސަކޮށް ކުރީގެ ރައީސް މައުމޫނު އަބްދުލް ގައްޔޫމު އަބަދުވެސް ބަރުލަމާނީ ނިޒާމާއި ދެކޮޅު ހައްދަވަ އެވެ.
އެމްޑީޕީގެ ގައުމީ މަޖިލީހުގެ ބައްދަލުވުމެއްގެ ތެރެއިން
ފަހުތެޅުން
މިހުރިހާ ކަމެއް ވެފައި އޮއްވާ ދެން އަމާޒުވީ ރައީސް ނަޝީދުގެ ފުރާނަފުޅު ދުއްވައިލަން ވަރުގަދަ ޓެރަރިސްޓު ހަމަލާއެކެވެ. ސަލާމަތީ ބާރުތައް ފޫއަޅުވާލާފައި މި ހަމަލާ ދިނުމުން އެމްޑީޕީ މެމްބަރުން ރަތަށް އެރި އެވެ. ރައީސް ސޯލިހުގެ އިސްތިއުފާއަށް ގޮވަން ފެށި އެވެ. އަދި މިނިސްޓަރު މާރިޔާގެ އިސްތިއުފާއަށްވެސް ގޮވަން ފެށި އެވެ.
ނަޝީދަށް ދިން ހަމަލާގެ ފަހަތުގައި ސަރުކާރުގެ ބައެއް ވަޒީރުންނަށް އިނގިލި ދިއްކުރެއްވީ ސީދާ ރައީސް ނަޝީދުގެ ދަރިކަލުންނެވެ. އާއިލާގެ އެހެން ބޭފުޅުންވެސް ސަރުކާރުގެ އިސް ބޭފުޅުންނަށް ތުހުމަތުތަކެއް ކުރެއްވި އެވެ. މިހާހިސާބުން މި ފެށުނީ ފަހު ތަޅާލުންގަނޑެވެ. އިދިކޮޅުން ސިފަކުރަނީ މިއީ ސިއްކާ އާއިލާ އާއި ކެނެރީ އާއިލާގެ ތެޅުންގަނޑެއްގެ ގޮތުގަ އެވެ. ރައީސް ނަޝީދު ވިދާޅުވަނީ މިއީ "ޓީމް އެމްޑީޕީ" އާއި ޕާޓީގެ އަސާސްތަކާއި ބީރައްޓެހި ބައެއްގެ ތެޅުންގަނޑެއް ކަމަށެވެ.
އެމްޑީޕީގެ ލީޑަޝީޕްގެ ބޭފުޅުން ވިދާޅުވާ ގޮތުގައި ޕާޓީ މިހާރު ވަނީ ދެބައިވެފަ އެވެ. އަދި އެކަން ދިމާވީ ރައީސް ނަޝީދާއި އެމްޑީޕީ އެއްފަރާތް ކުރުމަށްފަހު ރައީސް ސޯލިހު ވެރިކަން ހިންގަން މަސައްކަތް ކުރައްވާތީ އެވެ. އަދި ބަގާވާތްކޮށް ރައީސް ނަޝީދުގެ ވެރިކަން ވައްޓައިލި މީހުން ބަސް ސަރުކާރުގެ ތެރޭގައި ވިކޭތީ އެވެ.
ރައީސް ނަޝީދު ބޭނުންފުޅުވާ ކަންކަމަށް ސަރުކާރުން ސީދާ ދެކޮޅު ހައްދަވާކަން މިފަހުން ވަނީ އެނގިގެން ގޮސްފަ އެވެ. އެއީ އެމްއެންޑީއެފްގެ ވަކި ވަކި އޮފިސަރުން މަޖިލީހުގެ އިންކުއަރީއަށް ހާޒިރު ނުކުރެވޭނެ ކަމަށް ބުނެ އެ މުއައްސަސާއިން މަޖިލީހަށް ފޮނުވި ސިޓީގައި ސޮއިކުރެއްވި އިސް ބޭފުޅަކަށް ދައުވާ ކޮށްދިނުމަށް ރައީސް ނަޝީދު އެދިވަޑައިގެންނެވި ހިނދު އެމައްސަލަ ކޮމިޓީން ބޭރުކޮށްލުމުންނެވެ. މިކަން ކުރީ އެމްޑީޕީގެ ހަތަރު މެމްބަރެއްގެ ވާގިވެރިކަމާއިއެކު އެވެ. ނަޝީދުގެ ފެކްޝަނުން ތުހުމަތު ކުރާގޮތުން އެކަން ކުރީ ރައީސް ސޯލިހުގެ އެދިވަޑައިގެންނެވުމަށް އެމަނިކުފާނުގެ ޅިޔަނު މުހައްމަދު ރަޝީދު ހުސައިން (ބިގޭ) އެވެ. އޭނާ އެކަން ދޮގުކުރެއްވި ނަމަވެސް މަޖިލީހުގެ ނައިބުރައީސް އީވާ ވިދާޅުވި ގޮތުންނަމަ ބިގޭ ވަނީ މެމްބަރުންނަށް ގުޅައި ރައީސް ސޯލިހު އެކަމަށް އެދިވަޑައިގަންނަވާކަމަށް ވިދާޅުވެފަ އެވެ.
މިހާރު ދެން މިއޮތީ މި ބާބު ނިމެން ކައިރިވެފަ އެވެ. ބެލެވޭގޮތުގައި ރައީސް ނަޝީދު ރާއްޖެ ވަޑައިގެންނެވުމާއިއެކު އެމްޑީޕީގެ މިކޯޅުން ކޮންމެވެސް އެއްކޮޅެއްގައި ޖައްސާނެ އެވެ. އެއްގޮތަކީ ރައީސް ސޯލިހުގެ ފެކްޝަން އެމްޑީޕީން ބޭރު ކުރުމެވެ. އަނެއް ގޮތަކީ ރައީސް ނަޝީދުގެ ފެކްޝަން އެމްޑީޕީން ވަކިވެ އާ ޕާޓީއެއް އުފެއްދުމެވެ. ބޮޑަށް ބެލެވެނީ ކަން ވާނީ ފުރަތަމަ ގޮތަށް ކަމަށެވެ. އެއީ މިހާރުވެސް ރައީސް ނަޝީދު ވަނީ ބިގޭ ޕާޓީން ވަކިކުރާނެ ކަމުގެ އިޝާރާތެއް ކުރައްވައިފަ އެވެ.
