ސިހުރަކީ ހަގީގަތެއް ހެއްޔެވެ؟ ނޫނީ އެއީ އިހު ޒަމާނުގައި ކިޔައި އުޅު ފުލޯކު ވާހަކަތަކުން ސޮފްހާއެއް ހެއްޔެވެ؟ ގިނަ މީހުންނަށް ސިހުރުގެ ވާހަކަ އަޑުއިވޭނީ ވާހަކަ ފޮތްތަކުންނާއި ފިލްމުތަކުންނެވެ.
ކީރިތި ގުރުއާނުގައި ސިހުރުގެ ވާހަކަ ވަނީ ބަޔާން ކޮށްފަ އެވެ. ސޫރަތުލް ބަޤަރާގެ 102 ވަނަ އާޔަތުގައި މާތް ﷲ ވަޙީ ކުރައްވާފައިވާ ބަސްފުޅުގެ މާނައިގައިވެ އެވެ. "އެހެނެއްކަމަކު، އެޝައިޠާނުން ކާފިރު ވޫއެވެ. އެއުރެން މީސްތަކުންނަށް ސިހުރު އުނގަންނައި ދިނުމުންނެވެ."
މިއާއެކު ސިހުރަކީ ވާއެއްޗެއް ކަމާއި އެއީ ހަރާމް އެއްޗެއްކަންވެސް ކަށަވަރުވީ އެވެ. ދެން އޮތީ ސިހުރު ހަދާ ގޮތުގެ ވާހަކަ އެވެ. އޭގެ ކުރިން ސިހުރު ހަދަން މީހަކު ބޭނުންވާ ސަބަބަކާމެދުވެސް ވިސްނާލުން ރަނގަޅެވެ. އާންމުކޮށް ސިހުރު ހަދަނީ ތިމާގެ ކިބައިގައި ނެތް ކުޅަދާނަކަމެއް ހޯދުމުގެ މަޤްޞަދުގަ އެވެ. އެކަމަށްޓަކައި އޮތް ފަސޭހަ އަދި އަވަސް މަގަކީ ސިހުރުކަމަށް ހީވެ އެފަދަ ކަންކަމަށް ބޯލެނބިގެން ދަނީ އީމާންތެރިކަން ބަލިކަށިވުމުންނެވެ.
ސިޙުރު ހަދާ މީހާ މާތް ﷲ އަށް އުރެދި، ޝައިޠާނާގެ އަމުރުތަކަށް ކިޔަމަންވާން ޖެހެ އެވެ. އޭގެ ތެރޭގައި ދީނުން ބޭރުވާ އެތައް ކުފުރަކަށް އަރައިގަންނަން މަޖުބޫރުވެ އެވެ. ޝިރުކު ކޮށްގެންނާއި ހުތުރު ރޫޙުތަކާ ގާތް ގުޅުމެއް އުފައްދައިގެން އެ ތަކެތީގެ ބަހަށް ހެއްލިގެން މެނުވީ އެކަމެއް ނުކުރެވެ އެވެ.
ސިހުރު ހެދުމަށްޓަކައި ޝައިތާނާގެ ބަހަށް ހެއްލުމުގެ ގޮތުން ކުރާ ބައެއް ކަންކަން އެނގެން އެބަ ހުއްޓެވެ. އެގޮތުން ފައިގައި ހަތިމު ބަނދެގެން ފާހާނާއަށް ވަދެ އެވެ. އެކަން ކުރަނީ ޝައިތާނާގެ ހިތް ރުއްސާށެވެ. އަދި ހުތުރު ތަންތަނުގައި ނަޖިހުން ކީރިތި ގުރުއާނުގެ އާޔަތްތައްވެސް ލިޔެ އެވެ. އިދިކޮޅަށް ގުރުއާނުގެ އާޔަތްތައް ލިޔެ އެވެ. ވުޟޫ ނުކޮށް ނަޖިސް ހާލުގައި ހުރެ ނަމާދު ކުރެ އެވެ. ޝައިތޯނުންގެ ނަމުގައި ދިރޭ ތަކެތި ކަތިލައި ހަދަ އެވެ. ތަރިތަކާއި ވާހަކަ ދެއްކުމާއި ތަރިތަކަށް ސަޖިދަ ޖެހުންވެސް ހިމެނެ އެވެ.
ޝައިތާނާގެ ބާރު ގަދަކުރުމަށްޓަކައި ސިހުރު ހަދާ މީހާ ދީނާ ވީހާވެސް ދުރުވާން ޖެހެ އެވެ. ނަމާދު ކުރިޔަސް ކުރާނީ ޝައިތޯނުން އަންގާ ގޮތަށެވެ. ގިބްލައަށް ފުރަގަސް ދިނުމާއި ބަރަހަނާ ހާލުގައި ނަމާދު ކުރުންފަދަ އެތައް ކަމެކެވެ.
އަންޢާމު ސޫރަތުގެ 128، 129 ވަނަ އާޔަތުގެ މާނައިގައިވެ އެވެ. "އެކަލާނގެ، އެއުރެން އެންމެން އެއްކުރައްވާ ދުވަސް ހަނދުމަ ކުރާށެވެ! (އެދުވަހުން، އެކަލާނގެ ވަޙީ ކުރައްވާނެތެވެ.) އޭ ޖިންނީންގެ ޖަމާޢަތުގެ މީހުންނޭވެ! ތިޔަބައިމީހުން އިންސީންގެ ވަރަށް ގިނަ މީހުންނަށް މަގުއޮޅުވައިލީމު އެވެ. ދެން އިންސީންގެ ތެރެއިން އެއުރެންގެ އެކުވެރިން ދަންނަވާނެތެވެ. އަޅަމެންގެ ވެރި ރަސްކަލާކޯ އެވެ! އަޅަމެންގެ އެއް ބަޔަކު އަނެއް ބަޔެއްގެ ކިބައިން ފައިދާ ހޯދީމުއެވެ. އަދި އިބަރަސްކަލާނގެ، އަޅަމެންނަށް ކަނޑައަޅުއްވައިދެއްވައިފައިވާ އަޖަލަށް އަޅަމެން ފޯރައްޖައީމު އެވެ. އެކަލާނގެ ވަޙީ ކުރައްވާނެތެވެ. ތިޔަބައިމީހުން ތިބޭނެ ތަނަކީ ނަރަކަ އެވެ. الله އިރާދަކުރެއްވި ވަގުތަކަށް މެނުވީ، އެއުރެން އެތާނގައި ދެމިތިބެނިވި ގޮތުގައެވެ. ހަމަކަށަވަރުން، ކަލޭގެފާނުގެ ވެރިރަސްކަލާނގެއީ ޙަކީމްވަންތަ މޮޅަށް ދެނެވޮޑިގެންވާ ރަސްކަލާނގެ އެވެ. ހަމަ އެފަދައިން އެއުރެން ހޯދައިގަތް ކަމުގައިވީ ކަންތަކުގެ ސަބަބުން، ތިމަންރަސްކަލާނގެ އަނިޔާވެރިންގެ އެއްބަޔަކު އަނެއްބަޔަކާ މަތިކުރެއްވީމެވެ."
ސިހުރު ހަދާ މީހާއަކީ ޝައްކެއްވެސް ނެތް ގޮތުގައި އިސްލާމް ދީނުން ބޭރުވެފައިވާ މީހެކެވެ. އެފަދަ މީހުންގެ ފަހަތުގައި ނަމާދު ކުރުންވެސް މުސްލިމުންނަށް ހުއްދަ ނުވާނެ ކަމަށް ބައެއް އިލްމުވެރިން ވިދާޅުވެ އެވެ.
ސިހުރު ހަދާ މީހާގެ ހުކުމާއި ގުޅޭ ގޮތުން މާތް ﷲ ރުއްސުން ލެއްވި ޢުމަރުގެފާނާއި އެކަލޭގެފާނުގެ ދަރިކަނބަލުން އުންމުލް މުއުމިނީން ޙަފްޞާ އާއި މާތްﷲ ރުއްސުން ލެއްވި ޖުންދުބް ވިދާޅުވަނީ ސިހުރުވެރިޔާގެ ހުކުމަކީ ގަތުލު ކުރުން ކަމަށެވެ.
އިމާމު މާލިކު ވިދާޅުވި އެވެ. "ސިޙުރު ހަދާ މީހާއަކީ ކާފިރެކެވެ. އޭނާ އަށް ކަނޑައެޅިފައިވާ ޙުކުމަކީ ޤަތުލު ކުރުމެވެ. ތައުބާވުމަށް އޭނާ ގާތު އެދުމެއް ވެސް ނުވެއެވެ. އަދި އޭނާގެ ތައުބާ ޤަބޫލު ކުރެއްވުމެއް ވެސް ނުވެއެވެ."
ދެން އޮތީ ސިހުރު ހަދަން ދާ މީހާގެ ވާހަކަ އެވެ. ކީރިތި ރަސޫލާ ވަނީ އެފަދަ އަމަލުތަކުން ދުރުހެލިވެ ތިބުމަށް އިރުޝާދު ދެއްވައިފަ އެވެ. އެގޮތުން ހަދީސްފުޅެއްގެ މާނައިގައި ވެއެވެ. "ފާލުބަލާ މީހެއްގެ ގާތަށް ގޮސް ފާލުބެލުމުގެ ކަމަކާ މެދު ސުވާލުކޮށް އެކަމާ މެދު އޭނާގެ ބަސް ޤަބޫލުކޮށްފި މީހާ 40 ދުވަސް ވަންދެން ކުރާ ނަމާދު ޤަބޫލު ނުކުރައްވާ ހުއްޓެވެ."
ސިހުރު ޖެހިފައިވާ މީހަކު އެ ސިހުރުން ސަލާމަތް ވުމަށް ބައެއް މީހުން ސިހުރުވެރިން ކައިރިއަށް ގޮސް އުޅެ އެވެ. އެހެންނަމަވެސް އެއީވެސް ހަރާމް ކުރައްވާފައިވާ ކަމެކެވެ. އާންމު ގޮތެއްގައި ސިހުރު ރަނގަޅު ކުރުމަށް ސިހުރު ހަދާފައިވާ ބައެއް ތަކެތި ނުވަތަ ބައެއް ފަހަރު ޖިންނިވެސް އަންދައި އުޅެ އެވެ. އެކަމަށް އިޝާރާތް ކުރައްވައި ރަސޫލާ ހަދީސް ކުރެއްވި ބަސްފުޅެއްގެ މާނައިގައި ވެ އެވެ. "ތިޔަބައިމީހުން ﷲގެ ޢަޒާބުން ޢަޒާބު ނުދޭށެވެ!" އަދި އެހެން ޙަދީޘްފުޅެއްގެ މާނައިގައިވެ އެވެ. "ހަމަކަށަވަރުން އަލިފާނުގެ ވެރި ރަސްކަލާނގެ ފިޔަވައި އެހެން އެއްވެސް ފަރާތަކުން (އެއްވެސް ފަރާތަކަށް) އަލިފާނުން އަދަބު ދިނުމެއް ނުވެއެވެ."
ސިހުރުން ސަލާމަތް ވުމަށް އޮތް ހަމައެކަނި ފަރުވާއަކީ ނަމާދާއި ކީރިތި ގުރުއާނެވެ. އަދި އެހެނިހެންވެސް ދީނުގައި އަންގަވާފައިވާ ހެޔޮ އަޅުކަންތަކެވެ. މާތް ﷲ ވަޙީކުރެއްވި ބަސްފުޅެއްގެ މާނައިގައިވެ އެވެ! "އަދި ﷲ، ތިބާޔަށް ގެއްލުމެއް މެދުވެރިކުރައްވާނަމަ، އެކަލާނގެ މެނުވީ އެކަން ފިއްލަވާނެ އެހެން ފަރާތެއް ނުވެއެވެ."
