ނަން ބޭނުންކޮށްގެން އޭއައިގެ ވަސީލަތުން ހިންގަމުންދާ އޮޅުވާލުމުގެ ޢަމަލަކަށް ރައްޔިތުން ސަމާލުވުމަށް ރައްޔިތުންގެ މަޖިލީހުގެ މާމިގިލި ދާއިރާގެ މެންބަރު ގާސިމް އިބްރާހިމް ގޮވާލައްވައިފިއެވެ.
އާޓިފިޝަލް އިންޓެލިޖެންސް ޓެކްނޮލޮޖީ ބޭނުންކޮށްގެން ގާސިމްގެ ފޮޓޯއާއި ވީޑިއޯތައް މެދުވެރިކޮށް އޮފްޝޯ ޓްރޭޑިންގ އިންވެސްޓްމަންޓް ސްކީމެއް ދަނީ ޕްރޮމޯޓްކުރަމުންނެވެ. މި ސްކީމްގެ ފަރާތުން ދައްކާ ވާހަކައިގައި، ބޭންކް އޮފް މޯލްޑިވްސް މެދުވެރިކޮށް އިންވެސްޓަރުންނަށް ފައިދާ ލިބޭނެ ކަމަށް ވެސް ބުނެއެވެ.
ގާސިމް ވިދާޅުވި ގޮތުގައި މިއީ ޒަމާނީ ޓެކްނޮލޮޖީ ބޭނުންކޮށްގެން ރައްޔިތުންނަށް އޮޅުވާލައި، މަކަރުވެރި ގޮތުގައި ފައިސާ ހޯދުމަށް ހިންގާ ދަށު ދަރަޖައިގެ ޢަމަލެކެވެ.
މި ސްކޭމްގައި އޭނާގެ އަޑާއި ސިފަ ބޭނުންކުރަނީ ޓީވީ އިންޓަވިއުއެއް ބަދަލުކޮށްގެން ކަމަށާއި، އިނގިރޭސި ބަހުން އަޑު އަޅާފައިވާ މި ވީޑިއޯގައި އޭނާގެ ފައިސާ ވެސް އިންވެސްޓްކޮށްފައިވާ ކަމަށް ދޮގު މަޢުލޫމާތު ފަތުރައެވެ.
މިފަދަ ސްކޭމްތަކުގައި ބައިވެރިވިޔަ ނުދިނުމަށާއި، މިފަދަ ދޮގު މަޢުލޫމާތު ހިމެނޭ ވީޑިއޯތައް ސޯޝަލް މީޑިއާގައި ދައުރުނުކުރުމަށް ގާސިމް ވަނީ އާންމުންނަށް ގޮވާލައްވާފައެވެ.
