ފަރުދީ ޒިންމާ ކިޔާ އެއްޗެއް ދަންނަންތޯ އަހަން މިޖެހުނީ ލައްކަ ގިނަ ކަންކަން މި ދެތިން ދުވަހު ފެނުމުންނެވެ.
ނޫނޭ ވާ ދިވެހިން މީ ކުޅަދާނަ ބައެކެވެ. މިއޮތްހާ ހުރިހާ ދުވަހު ގެއިން ނުނިކުމެވި ބަންދުވެފައި ތިބި އިރުގެ ހަނދާން ނެތިއްޖެއެވެ. އީދު ބަންދާ ދިމާކޮށް ލިބުނު ލުއި ތަކުން އުފަލުގެ ކޮޅެއް ނެތެވެ. އެއްބަޔަކު އެއްވެސް ވިސްނުމެއް ބެލުމެއް ހިޔާލެއް ފިކުރެެއްނެތި އެއްވެ ތިބެ އީދު ކުޅި ވަރުތައް ކުޅެ ނަގަނީއެވެ. އަނެއް ބަޔަކު އީދު ކުޅި ވަރު ބަލަން ގޮސްތިބެނީ ދަތްދޮޅީގައި މާސްކް އަޅައިގެންނެވެ.
ދެން ތިބޭ މީހުން މާސްކެއް އަޅަން ހިތަށް ނުވެސް އަރައެވެ. ދުވެ ފުމެ ނަށާ ފޯރި ނަގަނީއެވެ. އީދުވީމައެވެ. އެކަމަކު އަނެއްކާވެސް ހާލަތު ގޮސްވާއިރަށް ޑޮކްޓަރުންނޭ ސިއްހީ މާހިރުންނޭ އެޗްޕީއޭ އޭ ކިޔަމުން މުޅި ސޯޝަލް މީޑިއާ ފުރާލާނެ ތޮއްޗެކެވެ. ދެން ތިބި ބަޔަކު ދުވާލަކު އެއްފަހަރު ދަރިފުޅު ސުކޫލަށް ފޮނުވަން ބިރެއް ނުގަނޭތޯ އަހާ އެތައް ސުވާލެއް ކުރާނެތެވެ.
އަޅުގަނޑަށް ދެންނެވެން އޮތީ އެންމެ އެއްޗެކެވެ. ތިމާމެންނަށް އުފަލާ މަޖާ ގެނުވާ ކަމެއް ކުރަންވީމަ ގަވައިދެއް ގާނޫނެއް، ހާލަތެއް ބަލާނެ ކަމެއް ނެތެވެ! އެމީހަކާ އެމީހެކެވެ! ހައްދެއް ނެތި ހުއްދައެއް ނެތި ބޭނުން ކަމެއް ކޮށް ނިންމާލަން ހަމަ ހެޔޮވަރެވެ. ވިސްނާނެ ކަމެއް ނެތެވެ. މި ނުވިސްނޭ އަމިއްލަ އެދުން ބޮޑު ބައެއްގެ ސަބަބުން ސަޒާ ލިބި ގޭ ބަންދުވާން މިޖެހެނީ އެހެން ބަޔެކެވެ. އެނދުމަތިވެ ހުރިހާ ދަތިކަމެއް ތަހައްމަލް ކުރަން ޖެހެނީ އެހެން ބައެކެވެ.
އަދިވެސް ވިސްނާކަށް ނުވޭތޯއެ. ދެން އެފަދަ ހާލަތަކަށް ގޮސް އަލުން ގެއަށް ވަންނަން ނުޖެހޭތޯ ބަލަން އެބަ ޖެހެއެއްނޫންތޯއެ.
ފަރުދީ ޒިންމާއޭ ކިޔާ އެއްޗެއް ހަމަ ނޭންގެނީތޯ ނޫނީ ހިސާބަށްވުރެ އަމިއްލަ އެދުން ބޮޑޯތޯއެ؟
