2018 ވަނަ އަހަރުގެ ނޮވެމްބަރު މަހުގެ 17 ވަނަ ދުވަހު މިހާރުގެ ރައީސުލްޖުމުހޫރިއްޔާ އިބްރާހިމް މުހައްމަދު ސާލިހު ރާއްޖޭގެ ރައީސް ކަމާއި ހަވާލުވެވަޑައިގަތީ ރައްޔިތުންނަށް އުފާވެރިކަން ގެނެސްދެއްވާނެ ކަމުގެ އުއްމީދާ އެކުއެވެ.
މިއަދު އެއިގެ ފަހުން ތިން އަހަރު ފާއިތުވެގެން ދިޔައިރު ބަދަލެއް ބޭނުވެގެން ޖަޒީރާ ރާއްޖެއަކަށް ދާ ހިތުން އެމްޑީޕީގެ ކެންޑިޑޭޓަށް ވޯޓު ދިން ރައްޔިތުންގެ އުއްމީދުތައް ހާސިލްވީ ކިހާ މިންވަރަކަށްތޯ މިއީ ކޮށްލާ ހިތްވާ ސުވާލެކެވެ. ކޮންމެ ވެރިކަމެއްވެސް ފެށެނީ ރައީސް ކަމުގެ ހުވާ ކުރައްވާ ރައީސް އަކާއި ނުވަތަ ވެރިކަމަށް އަންނަ ޕާޓީއަކާއި ނުވަތަ ކޯލިޝަނަކާއި ރައްޔިތުން ހަވާލު ކުރި ޒިންމާ އާއި އިންތިހާބުގެ ތެރޭގައި ދައްކާ ވާހަކަތައް ނުވަތަ ކޮށްދޭނެ ކަމަށް ވައުދުވާ ކަންކަން ފުރިހަމަ ކުރާނެ ކަމުގެ އުއްމީދާ އެކުއެވެ.
މިއަދު އެމްޑީޕީ، އަދާލަތު ޕާޓީ، ޖުމުހޫރީ ޕާޓީ އަދި އެމްއާރުއެމްގެ ކޯލިޝަން ސަރުކާރެއް ހިނގަމުން ދާއިރު މި ފަރާތްތަކަށް ރައްޔިތުންގެ އެދުންތައް ހާސިލް ކުރެވެމުން އެބަދޭބާއެވެ.
މިއަދު ބޭސް ފަރުވާއަށް ރައްޔިތުން ސަލާން ޖަހާތޯއެވެ. އާދޭހެވެ. ސޯޝަލް މީޑިއާގައި ބޮޑެތި ބަލިތަކަށް ފަރުވާ ހޯދަމުންދާ ފަރާތްތަކުން އެހީއަށް އެދި ކުރަމުންދާ އާދޭސް އަދިވެސް ވަނީ މީގެ ތިން އަހަރު ކުރީ އޮތް ހާލަތުގައެވެ. ބޯހިޔާވަހިކަން ރައްޔިތުންނަށް ހޯދާދެވިއްޖެ ތޯއެވެ. މިވީ ތިން އަހަރު ތެރޭ އަދި މާލެ ސަރަހައްދުގެ އެއްވެސް ތަނެއްގައި އަލަަށް ފެށި ބޯހިޔާވަހިކަމުގެ މަޝްރޫއެއް ނެތެވެ. މުޅިންވެސް ފެންނަނީ 2013 އިން 2018 އަށް ވެރިކަން ކުރެއްވި ރައީސް ޔާމީންގެ ދައުރުގައި ފެށި ކަންކަން ނިންމާލާ ތަނެވެ.
އެންމެ ބޮޑު ހުވަފެނެއް ދެއްކީ އެއްބަޔަކީ ރިސޯޓު މުވައްޒަފުންނެވެ. އެގޮތުން ރިސޯޓް ޑިއުޓީ ނިންމާލުމަށްފަހު އަނިބިން ކައިރިއަށް ނިދަން ދެވޭނެ މަގު ތަނަވަސް ކޮށްދޭނެ ކަމާއި ރިސޯޓްގައި މަސައްކަތް ކުރާ ކޮންމެ މީހެއްގެ އެންމެ ކުޑަ މުސާރައަކީ 10000 ރުފިޔާ ކަމުގައި ހަދައިދޭނެ ކަމަށް ތަކުރާރުކޮށް އޭރު ކެމްޕެއިންގައި ރައީސް ސާލިހުގެ ޓީމުން ބުނަމުން ދިޔައެވެ.
މިއަދާ ހަމައަށް އައި އިރު މި ދެ ކަން ފުރިހަމަވާ ހަމަ އެއްވެސް ރިސޯޓް މުވައްޒަފެއް ރާއްޖެ އަކު ނެތެވެ. ތައުލީމީ ދާއިރާއަށް ކަޅި އެއް ހިންގާލާ އިރު މިއަދު ފެންނަނީ ހިތްދަތި ކަމެވެ. ކޮންމެވެސް ސުކޫލެއްގެ ޓީޗަރަކު މަދުވެގެން ޕްރިންސިޕަލަކު ނެތިގެން އެ ރަށުގެ ސުކޫލް ބަންދުކޮށް މުޒާހަރާ ނުކުރާ ދުވަހެއް މަދެވެ. އެހެންވީމާ ތައުލީމީ ދާއިރާއަށް މި ދިޔަ ތިން އަހަރު އައީ ކޮންމެ ކުރިއެރުމެއް ތޯއެވެ. 'ހުރިހާ ދަރިވަރުން ޝާމިލުކޮށްގެން ތަޢުލީމު ދިނުމުގެ ސިޔާސަތު' މިއީ ތަޢުލީމުގެ ޤާނޫނުގެ ދަށުން އެކުލަވާލެވުނު ފުރަތަމަ ސިޔާސަތު ކަމަށް ބުނެ ވާހަކަ ދައްކައެވެ.
އެދަރިވަރުން ބޭނުންވަނީ ހަމަޖެހިލައިގެން ކިޔަވާށެވެ. މޮޅު ވާހަކައެއް ނޫނެވެ. ސިއްހީ ދާއިރާގެ ވާހަކަ އަކީ ދައްކާ ކޮޅުން ލާނެ ވާހަކައެއް ނޫނެވެ. ވެންޓިލޭޓަރުތައްވެސް ގެއްލުނީއެވެ. މިނިސްޓަރުވެސް ވަނީ ބަދަލުވެފައެވެ. އަލަކަށް އެޅުނު ހޮސްޕިޓަލެއް ނެތެވެ. އެމްބިއުލާންސް ނެތިގެން ބަރޯ އާއި ގާޑިޔާތަކުގައިވެސް ބަލި މީހުން އުފުލަނީއެވެ. އެހެންވީމާ މި ތިން އަހަރު ރައްޔިތުންނަށް ކޮށްދިނީ ކޮންކަމެއްތޯ އަޅެ ވިސްނާލަބަލާށެވެ.
