ގއ. ވިލިގިލީގައި ބަންނަމުންދާ ސަފާރީއެއްގައި ރޯވެ އަނދާ ހުލިވެއްޖެއެވެ.
ސިފައިން މީޑިއާ އޮފިޝަލް ވިދާޅުވެފައި ވަނީ އަލިފާން ރޯވީ ގއ ވިލިނގިލީ އުތުރު ފަރާތު މީހުން ނޫޅޭ ސަރަހައްދުގައި ސަފާރީއެއް ބަނުމަށްޓަކައި ހަދާފައި ހުރި ހަރުގެއެއްގައި ކަމުގައެވެ.
އަދި އަލިފާންގަނޑު ނިންވާލުމަށް އެހީތެރިވުމަށްޓަކައި ތިނަދޫ ފަޔާ ސްޓޭޝަންގެ ފަޔާ ފައިޓަރުން މަސައްކަތް ކޮށްފައި ވާކަމަށްވެސް މީޑިއާ އޮފިޝަލްވިދާޅުވެފައި ވެއެވެ. އޭނާ ވިދާޅުވީ އެ ހާދިސާގެ މައުލޫމާތު ލިބުނީ ރޭ 9:15 ހާއިރު ކަމަށެވެ.
އަލިފާން ރޯވި ހަރުގެއާއި އެތަނުގައި ބަންނަމުންދިޔަ ސަފާރީއާއެކީވަނީ އަނދާ ހުލިވެފައެވެ.
މި ހާދިސާގައި އެއްވެސް މީހަކަށް އަނިޔާއެއް ލިބިފައިވާކަމުގެ މައުލޫމާތެއް އަދި ލިބިފައެއް ނުވެއެވެ. އަދި މި ހާދިސާގައި ލިބުނީ ކިހާ ވަރެއްގެ ގެއްލުމެއް ކަމެއް މިހާތަނަށް އެނގިފައެއްނުވެއެވެ.
