ނ. ލަންދޫ މެޖިސްޓްރޭޓް ކޯޓުގެ އައު އިމާރާތް ރަސްމީކޮށް ހުޅުވައިފިއެވެ.
އެ ކޯޓުގެ އާ އިމާރާތް މިއަދު ހުޅުއްވައިދެއްވީ އުއްތަމަ ފަނޑިޔާރު އަހްމަދު މުއުތަސިމް އަދުނާނެވެ.
މި އިމާރާތް ހުޅުވުމަށް ބޭއްވި ހަފްލާގައި ޗީފް ޖުޑިޝަލް އެޑްމިނިސްޓްރޭޓާ ޢާއިޝަތު ރިޒްނާ ވިދާޅުވީ ކޯޓުގެ އައު އިމާރާތާއެކު، ކޯޓުން ފޯރުކޮށްދޭ ޚިދުމަތްތަކުގެ ފެންވަރު ރަނގަޅުވެ، އަދުލު އިންސާފަށް ފަސޭހައިން ވާސިލްވެވޭނެ މަގު ތަނަވަސް ކުރުމަށް ކުރަމުން ގެންދާ މަސައްކަތް އިތުރަށް ހަލުވިވެގެން ދާނެ ކަމަށެވެ.
އިމާރާތުގެ މަސައްކަތް ފުރިހަމަކުރުމަށްޓަކައި ނ.ލަންދޫ ކައުންސިލް އާއި، ކޮންޓްރެކްޓަރާއި، ނ. ޖުޑީޝަލް ދާއިރާގެ އިސްމެޖިސްޓްރޭޓާއި، ލަންދޫ ކޯޓުގެ މެޖިސްޓްރޭޓާއި، މުވައްޒަފުންނާއި ޑީޖޭއޭގެ މުވައްޒަފުންގެ ބުރަ މަސައްކަތުގެ އަގުވަޒަން ކުރައްވާ ރިޒްނާ ވަނީ ޝުކުރު އަދާކުރައްވާފައެވެ.
ނ. ލަންދޫ މެޖިސްޓްރޭޓް ކޯޓު ރަސްމީކޮށް ހުޅުވުމަށް ބޭއްވި ރަސްމިއްޔާތު ޝަރަފުވެރިކޮށްދެއްވައި ދިވެހިރާއްޖޭގެ އުއްތަމަ ފަނޑިޔާރު ދެއްކެވި ވާހަކަފުޅުގައި ފަނޑިޔާރު ގޭގެ މިނިވަންކަން ކަށަވަރުކުރުމަށް ގޮންޖެހުންތަކެއް ހުރިކަމަށް ވިދާޅުވިއެވެ.
އެގޮތުން ފަނޑިޔާރުގެ މިނިވަން ކުރުމަށް ޖޭއެސްސީ އެކުލެވިގެންވާ ގޮތް ބަދަލުކުރަންޖެހޭ ކަމަށާއި އެހެންނަމަވެސް، ޖޭއެސްސީ އެކުލަވާލެވިފައިވާ ގޮތް ބަދަލުކުރުމުން އެކަނި ފަނޑިޔާރުގެ މިނިވަން ނުވާނެ ކަމަށް ވެސް ވިދާޅުވިއެވެ. އަދި ފަނޑިޔާރުން މިނިވަން ބަޔަކަށްވާނީ، ގާނޫނު އަސާސީގައި އެކަމަށް ކަނޑައަޅާފައިވާ ގޮތަށް އަމަލުކުރުމުން ކަމަށް އުއްތަމަފަނޑިޔާރުގެ ވާހަކަފުޅުގައި ފާހަގަކުރެއްވިއެވެ.
މިހާރު ނ. ލަންދޫއަށް ކުރައްވަމުން ގެންދަވާ ދަތުރުފުޅަކީ އެ ރަށުގެ މެޖިސްޓްރޭޓް ކޯޓުގެ އައު އިމާރާތް ރަސްމީކޮށް ހުޅުވުމަށާއި، ނ.އަތޮޅުގެ މެޖިސްޓްރޭޓް ކޯޓުތަކުގެ ހާލަތު ބަލައި، ކޯޓުތަކުގެ މެޖިސްޓްރޭޓުންނާއި، މުވައްޒަފުންނާ ބައްދަލުކުރެއްވުމަށް ކުރައްވާ ދަތުރެއްކަން އުއްތަމަ ފަނޑިޔާރު ވަނީ ފާހަގަކުރައްވާފައެވެ.
މި ދަތުރުފުޅުގައި އުއްތަމަފަނޑިޔާރުގެ އިތުރުން ދިވެހިރާއްޖޭގެ ސުޕްރީމް ކޯޓުގެ ފަނޑިޔާރުންނާއި، ޖުޑީޝަލް ސަރވިސް ކޮމިޝަންގެ މެންބަރު އަދި ދިވެހިރާއްޖޭގެ ހައިކޯޓުގެ ފަނޑިޔާރާއި، ސިވިލް ކޯޓުގެ އިސް ގާޒީ އާއި ޗީފް ޖުޑީޝަލް އެޑްމިނިސްޓްރޭޓަރ ބައިވެރިވެވަޑައިގެންނެވިއެވެ.
