މީހެއްގެ ހިތުގައި އޮންނަ ނިޔަތް ނޭނގޭނަމަ އެމީހަކު ކާފަރު ކުރުމަކީ ދީނާ ހިލާފުކަމެއްކަން އިސްލާމީ ތާރީހުން އެންގެން އޮތްކަމަށާއި ލާދީނީ ނޫން މިހަކާ ދިމާއަށް ލާދީނީއޭ ގޮވުމަކީ އެގޮވި މީހާ ލާދީނީ ވާނެ ކަމެއްކަމަށް ރައްޔިތުންގެ މަޖިލީހުގެ ތުޅާދޫ ދާއިރާގެ މެމްބަރު ހިސާން ހުސައިން ވިދާޅުވެއްޖެ އެވެ.
ހިސާން މިފަދައިން ވިދާޅުވީ ގާނޫނުލް އުގޫބާތަށް ނަފުރަތުގެ އަމަލު ހިންގުމަކީ ކުށެއްކަމަށް ކަނޑައެޅުމަށް މާއްދާއެއް އިތުރުކުރަން އޭނާ ހުށަހެޅުއްވި ބިލުގެ ބަހުސް މަރުހަލާގައި ވާހަކަ ދައްކަވަމުންނެވެ. އެ އިސްލާހު ހުށަހެޅުއްވީ ހިސާން އެވެ. އެއާއެކު ގިނަ ދީނީ އިލްމުވެރިންތަކެއް ހިމެނޭހެން އެތައް ބައެއްގެ ފާޑުކިޔުންތައް އޭނާއަށް ވަނީ އަމާޒުވެފަ އެވެ.
ފާޑުކިޔުންތަކާއި ގުޅިގެން ހިސާން މިއަދު ވިދާޅުވީ އެކިއެކި އިޖުރާތުތަކުގެ ތެރެއިން، ކުށް ކަޑައެޅުމާއި، ކުށްވެރިކުރުމާއި، ކުށުގެ މައްސަލަ ބެލުން، އެއީ ދައުލަތުން ކުރާ މަސައްކަތެއް ކަމަށެވެ. އެހެންކަމުން ކުށް ކަނޑައަޅަން ރައްޔިތުންގެ އަތްމަޗަށް ދޫކޮށްލުން ވެގެން ދާނީ ނިޒާމު ގެއްލި މުޅި މުޖުތަމައުގެ އަމާންކަން ގެއްލިގެންދާނެ ކަމަކަށް ކަމުގައި އޭނާ ވިދާޅުވި އެވެ.
ކުށެއް ނެތް އެތައް ބައެއްގެ ލޭ ހުއްދަ ވާކަމަށް ބުނެ ގާނޫނުން ބޭރުން މީހުން މެރުން ފަހަކަށް އައިސް އިތުރުވެފައިވާކަން ފާހަގަކުރައްވައި ހިސާން ވިދާޅުވީ އެކަން އެގޮތަށް ހިނގަނީ ދީނުގެ ނަމުގައި ނަފްރަތުގެ ބަސްތައް ހަތިޔާރެއްގެ ގޮތުގައި ބޭނުންކޮށްގެން ކަމަށެވެ.
ހިސާން ވިދާޅުވީ ގާނޫނުލް އުގޫބާތަށް އިސްލާހު ގެނައުމަށް ހުށަހެޅި ބިލަކީ އިސްލާމް ދީނަށް ފުރައްސާރަކުރަން ހިތްވަރުދޭ ބިލެއްގެ ގޮތުގައި ސިފަކުރަނީ ރައްޔިތުންނަށް އޮޅުވައިލަން ކަމަށެވެ. 2015 ވަނަ އަހަރުން ފެށިގެން އިސްލާމް ދީނަށް ހަޖޫ ޖެހުމާއި ފުރައްސާރަ ކުރުމަކީ ކުށެއްކަމަށް ކަނޑައަޅާފައިވާކަންވެސް އޭނާ ފާހަގަކުރެއްވި އެވެ. އެހެންކަމުން އެ އިސްލާހުގެ ސަބަބުން އިސްލާމް ދީނަށް ހަޖޫ ނުޖެހޭނެ ކަމަށާއި ދީނަށް ފުރައްސާރަވެސް ނުކުރެވޭނެ ކަމަށް ހިސާން ވިދާޅުވި އެވެ.
ބިލުގެ މަގްސަދާއި ގުޅޭގޮތުން ވާހަކަ ދައްކަވަމުން ހިސާން އިތުރަށް ވިދާޅުވީ ސޯޝަލް މީޑިއާގައި ނުވަތަ އިންޓަނެޓުގައި އިސްލާމް ދީނަށް ތައުހީނު ކުރުމުގެ ނިޔަތުގައި ދީނަށް ފުރައްސާރައަކަށް ވެދާނޭ ފަދަ އެއްޗެއް ބުނުން އެ ބިލުގެ ސަބަބުން ކުށެއްކަމަށް ކަނޑައެޅޭނެ ކަމަށެވެ.
ދެން ހިސާން މިސާލު ނެންގެވީ އިމާމް ބުހާރީގައި އައިސްފައިވާ އުސާމާ ބިން ޒައިދުގެ ހާދިސާއިންނެވެ. އެގޮތުން މުސްލިމެއްގެ ހިތުގައި އޮންނަ ނިޔަތް ނޭނގޭނަމަ އެ މީހަކު ކާފަރު ކުރުމަކީ ދީނާ ހިލާފުކަމެއްކަން އެހާދިސާއިން އެނގޭކަމަށް އޭނާ ވިދާޅުވި އެވެ.
އެހެންވީމާ، ތިމާ ލާދީނީ ނޫން މީހަކާ ދިމާއަށް ލާދީނީއޭ ބުނެފިނަމަ، ތިމާއަކީ ލާދީނީ މީހަކަށް ނުވެ ހުންނާނެތޯ؟
- މެމްބަރު ހިސާން ހުސައިން
ދީނީ ކަންކަމުގެ އިތުރުން ޖިންސުގެ ނުވަތަ ނަސްލުގެ ތަފާތު ކުރުންތަކުންވިޔަސް ނަފްރަތު އުފެއްދުން އެ ބިލުގެ ސަބަބުން ކުށަކަށް ހަދާނެ ކަމަށް ހިސާން ވިދާޅުވި އެވެ. އެހެންނަމަވެސް މީހަކު ދީނާ ހިލާފު މަގަކުން ދާނަމަ އެމީހަކަށް ނަސޭހަތް ދިނުން މަނާ ނުވާނެ ކަމަށް އޭނާ ވިދާޅުވި އެވެ.
ރައީސް އިބްރާހިމް މުހައްމަދު ސޯލިހުގެ ސަރުކާރުގެ ފަރާތުން ހިސާން ހުށަހެޅުއްވި އެ ބިލުގެ ސަބަބުން މީހަކު ބުނާ ބަހެއްގެ ސަބަބުން ނުވަތަ ކުރާ ކަމެއްގެ ސަބަބުން އޭނާއަކީ އިސްލާމް ދީނާ ހިލާފު ނުވަތަ ލާދީނީ މީހެކޭ އާންމު ތަނެއްގައި ނުބުނެވޭނެ އެވެ. އަދި އެހެން ބުނުމަކީ އެމީހަކާއިމެދު ނަފްރަތު އުފެއްދުންކަމުގައި ކަނޑައެޅޭނެ އެވެ. އޭގެ ތެރޭގައި މީހަކަށް އަނިޔާވެރިވާން ގޮވައިލުމާއި އެކަމަށް ހިތްވަރު ދިނުމާއި ބައިވެރިވުމަކީވެސް ކުށެއްކަމަށް ކަނޑައެޅޭނެ އެވެ.
މީގެ އިތުރުން މީހެއްގެ ސިޔާސީ ފިކުރުގެ ސަބަބުން އެމީހަކަށް ޖިސްމާނީ އަނިޔާއެއް ދިނުމަކީ ބިލުގައި ކުށެއްކަމަށް ވަނީ ކަނޑައަޅައިފަ އެވެ. އަދި ނަސްލަށާއި އުފަންވީ ގައުމެއް ނުވަތަ ކުލައަށް ބަލައި އެމީހަކަށް ޖިސްމާނީ އަނިޔާއެއް ދިނުންވެސް ކުށަކަށް ވެގެން ދާނެ އެވެ.
މި ބިލު ހުށަހެޅުމާއިއެކު ދީނީ އިލްމުވެރިން ވިދާޅުވަނީ އެއީ ދީނަށް ފުރައްސާރަ ކުރާ މީހުންނަކީ ލާދީނީ މީހުންކަމަށް ސޯޝަލް މީޑިއާގައި ހިޔާލު ފާޅުކުރުން ހުއްޓުވުމަށް ހިސާން ހުށަހެޅި ބިލެއް ކަމަށެވެ. އެ ބިލު ހުށަހެޅީ ކުރީގެ ރައީސް މުހައްމަދު ނަޝީދުގެ ފުރާނަފުޅު ދުއްވައިލަން ބޮމުގެ ހަމަލާއެއް ދީފައި ވަނިކޮށެވެ. ނަޝީދަކީ މީގެ ކުރިން އެކި ކަންކަމުގެ ސަބަބުން ލާދީނީ ޓެގު އެޅުވިފައިވާ ބޭފުޅެކެވެ. އެމަނިކުފާނު ކުރައްވާ ބައެއް ކަންކަމާއި ވިދާޅުވާ ބައެއް ބަސްފުޅުތަކުގެ ސަބަބުން ބައެއް ދީނީ އިލްމުވެރިން ދަނީ އެއީ އިސްލާމް ދީނާއި ހިލާފު ބޭފުޅެއްކަމަށް ވިދާޅުވަމުންނެވެ.
ސަރުކާރުން ގާނޫނުލް އުގޫބާތަށް ހުށަހެޅި މި އިސްލާހާއި ސަރުކާރު ކޯލިޝަންގައި ހިމެނޭ އަދާލަތު ޕާޓީން ވަނީ ދެކޮޅު ހަދައިފަ އެވެ. އެޕާޓިން ވަނީ އެބިލަށް ތާއީދު ނުކުރާކަން ހާމަކުރައްވައިފަ އެވެ.
