ޕެންޝަން ސްކީމް ވަރުގަދަކޮށް ރައްޔިތުންނަށް އެންމެ ފައިދާވާނެގޮތް ހަދާނަން: ރައީސް

ޕެންޝަން ސްކީމް ވަރުގަދަކޮށް ރައްޔިތުންނަށް އޭގެ އެންމެ ފައިދާވާނެގޮތް ހަދަން ބޭނުންފުޅުވާ ކަމަށް ރައީސް ޑރ.މުހައްމަދު މުއިއްޒު ވިދާޅުވެއްޖެއެވެ.
ރައީސް މިހެން ވިދާޅުވީ ރައީސްގެ ޖަވާބު ޕްރޮގްރާމުގައި ޕެންޝަން ފަންޑަށް ޖަމާވާ ފައިސާ، ވަޒީފާއިން ވަކިވުމާއެކު ލިބޭނެ އިންތިޒާމެއް ހަމަޖެއްސިދާނެތޯ ރައްޔިތަކު ދެންނެވި ސުވާލަށް ޖަވާބު ދެއްވަމުންނެވެ.

މިސުވާލަށް ޖަވާބު ދެއްވަމުން ރައީސް ވިދާޅުވީ ޕެންޝަނަކީ ވަކި ޤާނޫނެއްގެ ދަށުން ނަގަމުންދާ އެއްޗަކަށްވާތީ ސަރުކާރުން އެއަށް ބަދަލު ގެނެވޭނީ ޤާނޫނު އިސްލާހްކޮށްގެން ކަމަށެވެ.
ރައީސް ވިދާޅުވީ އާންމުންގެ ކަންބޮޑުވުން ގަބޫލުކުރެވޭ ކަމަށާއި، އެހެންނަމަވެސް ޕެންޝަންގެ ފައިސާއިން ބޭނުން ކުރެވޭނެ ގޮތް ހެދެން އަންނީ މަޖިލިސް ތެރެއިން ކަމުގައެވެ.

ޕެންޝަންއަކީ ވަކި ގާނޫނެއްގެ ދަށުން ނަގަމުންދާ އެއްޗެއްކަށްވާމީ ސަރުކާރަށް އެއަށް ބަދަލެއް ގެނެވޭނީ ގާނޫނު އިސްލާހު ކޮށްގެން. އަޅުގަޑު ބޭނުން ޕެންޝަން ސްކީމް ވަރުގަދަ ކުރަންވެސް، އޭގެ ފައިދާ އެންމެ ރަގަޅު ގޮތުގައި އިތުރުވާނެ ގޮތް ހަދަންވެސް. ދެން އެއަށް އެއްވެސްކަހަލަ ބަދަލެއް ގެނެވޭނި ރައްޔިތުންގެ މަޖިލިހަށް ހުށަހަޅައިގެން. އެހެންވީމަ ތި ވިދާޅުވިހަކަ އިސްލާހުތައް ގެނެވޭނެ ފުރުސަތު މަޖިލިސް ތެރެއިން ލިބިގެން ދިއުމަކީ ތިވިދާޅުވި ކަހަލަ ކަންތައްތައް ކުރެވޭނެގޮތް މަގުފަހު ވާނެގޮތް.