އިލެކްޝަންސް ކޮމިޝަން (އީސީ)އަށް މެންބަރުން އައްޔަންކުރުމުގެ ބާރު ރައްޔިތުންގެ މަޖިލީހަށް ލިބިދޭގޮތަށް އިލެކްޝަންސް ކޮމިޝަނުގެ ގާނޫނަށް އިސްލާހެއް ހުށަހަޅައިފިއެވެ.
މި އިސްލާހު ރައްޔިތުންގެ މަޖިލީހަށް ހުށަހެޅުއްވީ ހޮޅުދޫ ދާއިރާގެ އެމްޑީޕީ މެންބަރު ޔޫނުސް އަލީއެވެ.
އީސީގެ ގާނޫނުގެ ހަތަރުވަނަ މާއްދާގައިވާ ގޮތުން އެ ކޮމިޝަނަށް މެންބަރުން އައްޔަންކުރާނީ ރައީސުލްޖުމްހޫރިއްޔާއެވެ. އެގޮތުން އީސީއަށް މެންބަރުން އައްޔަންކުރަން ބޭނުންވާ ކޮންމެ ފަހަރަކު ވެސް މެންބަރުން އައްޔަންކުރަންޖެހޭ އަދަދަށްވުރެ މަދުނޫން އަދަދަކަށް މީހުންގެ ނަން ރައްޔިތުންގެ މަޖިލީހަށް ފޮނުއްވަން ޖެހެނީ ރައީސުލްޖުމްހޫރިއްޔާއަށެވެ.
އިލެކްޝަންސް ކޮމިޝަންގެ ގާނޫނުގެ ހަތަރުވަނަ މާއްދާގައި، އިލެކްޝަން ކޮމިޝަނަށް މެމްބަރުން އައްޔަން ކުރުމުގެ ބާރު ރައީސުލްޖުމްހޫރިއްޔާއަަށް ދީފައިވާއިރު، މެމްބަރު ކަމަށް އާންމުކޮށް އިއުލާނުކޮށްގެން ހުށަހަޅާ ބޭފުޅުންގެ ނަންތައް މަޖިލީހަށް ފޮނުވައިގެން، ރައީސުލްޖުމްހޫރިއްޔާ އަށް މެމްބަރަކު އައްޔަން ކުރެއްވޭނީ މަޖިލީހުން ފާސް ކޮށްގެންނެވެ.
މަޖިލީހަށް މިފަދަ ބިލެއް ހުށަހަޅާފައިމިވަނީ ކޮމިޝަނުގެ މަގާމެއް ހުސްވެފައިވަނިކޮށެވެ. ކޮމިޝަނުގެ ނައިބު ރައީސަކަށް ހުންނެވި އިސްމާއީލް ހަބީބުގެ ދައުރު ވަނީ ހަމަވެފައެވެ.އެމަގާމަށް އައްޔަން ކުރުމަށް ކޮމިޝަންގެ މިހާރުގެ ސެކްރެޓަރީ ޖެނެރަލް ހަސަން ޒަކަރިއްޔާގެ ނަން ރައީސް މުއިއްޒުވަނީ މަޖިލީހަށް ފޮނުއްވާފައެވެ.
