ވެލާނާ އިންޓަނޭޝަނަލް އެއާޕޯޓް (ވީއައިއޭ) އަށް ބާރު ބޮޑުވާނެތީ އުމްރާގެ އަޅުކަމަށް ފުރާ މީހުން ކުރިއާލައި އެއަރޕޯޓަށް ގޮސް ޗެކިން ވުމަށް މޯލްޑިވްސް އެއަރޕޯޓްސް ކޮމްޕެނީ ލިމިޓަޑް (އެމްއޭސީއެލް) އިން އެދިއްޖެއެވެ.
ވީއައިއޭ ހިންގާ މޯލްޑިވްސް އެއާޕޯޓްސް ކޮމްޕެނީ އެމްއޭސީއެލުން ބުނީ ވީއައިއޭގެ އޮޕަރޭޓަރެއްގެ ހައިސިއްޔަތުން އެމްއޭސީއެލް، ފަސިންޖަރުންނާއި އާއިލާއަށް ފަސޭހަކަމާއެކު ދަތުރުކުރުމުގެ ތަޖުރިބާ ހޯދައިދިނުމަށްޓަކައި ކުރެވެން ހުރި ހުރިހާ މަސައްކަތެއް ކުރަމުންދާ ކަމަށެވެ.
ނަމަވެސް ފަސިންޖަރުންގެ އަދަދު އިތުރުވުމުގެ ސަބަބުން ދަތުރުވެރިންނަށް އިންތިޒާރުގެ ވަގުތު އިތުރުވުމަކީ އެކަށީގެންވާ ކަމެއް ކަމަށް އެމްއޭސީއެލްއިން ބުންޏެވެ. އެހެންކަމުން، ފަސިންޖަރުން ކުރިން ތައްޔާރުވެ، ޗެކިން ކުރުމަށް އަވަހަށް އައުމަށް ވަނީ އިލްތިމާސްކޮށްފައެވެ.
ރޯދަމަހުގެ ފަހު ދިހަގައި އުމްރާގެ އަޅުކަން އަދާކުރުމަށް ސައުދީ އަރަބިއްޔާއަށް ދަތުރުކުރާ ދިވެހިންގެ އަދަދު އަބަދުވެސް އިތުރެވެ.
