ރާއްޖޭގައި އުފެއްދޭނެ ކާބޯތަކެތީގެ ހުރިހާ ބާވަތެއް ރާއްޖޭގައި އުފެއްދުމަށް އެގްރިކަލްޗަރ އިންޑަސްޓްރިއަލް ޒޯނެއް ޤާއިމްކުރުމަށް އުތުރު ތިލަފަޅު ހިއްކައިގެން ބިޔަ ބޮޑު މަޝްރޫޢުއެއް ފެށުމަށް ތައްޔާރުވެފައިވާ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
މާފަންނު ހުޅަނގު ދާއިރާގެ ސަރުކާރުގެ ކެންޑިޑޭޓް އަހްމަދު މުސްތަފާ މުހައްމަދުގެ ކެމްޕޭން ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ ރާއްޖޭގައި އުފެއްދޭ ކާބޯތަކެތީގެ ބާވަތްތައް ރާއްޖެ އެތެރެކުރުމަށް މިލިއަނުން ޑޮލަރު ހޭދަކުރާކަމަށާއި، ޤައުމުގެ އިޤްތިޞާދު ރަނގަޅުކުރުމަށް އެތަކެތި ރާއްޖެ އެތެރެކުރުން ނިމުމަކަށް ގެނަންނެޖެހޭކަމަށެވެ. މިޤައުމުގައި އުފެއްދޭނެ ހުރިހާ ބާވަތެއްގެ ކާބޯތަކެތި، ދިވެހި ހުރިހާ ރައްޔިތުންނަށް ފުދޭ މިންވަރަށް އުފެއްދުމަށް މަސައްކަތް މިހާރު ފަށްޓަވާފައިވާކަން ފާހަގަކުރައްވާ ރައީސް ވިދާޅުވީ ފުޑް ސެކިއުރިޓީ ނުވަތަ ކާބޯތަކެތީގެ ޔަޤީންކަން މި ދައުރުގައި ފުރިހަމައަށް ޤާއިމްކުރައްވާނެކަމަށެވެ. އެކަމަށްޓަކައި އުތުރުތިލަފަޅުގައި ޚާއްޞަ ސަރަހައްދެއް ކަނޑައަޅުއްވާފައިވާކަމަށްވެސް ރައީސް ވިދާޅުވިއެވެ.
"200 ހެކްޓަރުގެ ބިޔަ ބޮޑު ބިންހިއްކާ އަދި އެއާގުޅިގެން އިންޓެގްރޭޓެޑް ޑިވެލޮޕްމަންޓާއެކީގަ ރާއްޖޭގެ ރައްޔިތުންނަށް ބޭނުންވާ މިންވަރަށް، އަދި ރާއްޖޭގެ ދަނޑުވެރިކަމުގެ މަސައްކަތް ހިންގާ، ރައްޔިތުން ދިރިއުޅޭ ރަށްރަށްވެސް ހިމަނައިގެން އުތުރާ ދެކުނުގެ މިކަހަލަ ބިން ހުރި ރަށްތަކުގަވެސް މި މަޝްރޫޢުގެ ބައިބައި ހިނގާނެ." ރައީސް ވިދާޅުވިއެވެ.
ރައީސް ވިދާޅުވީ، މިއީ ރާއްޖެއިން ބޭރަށް ކުރާ ހޭދަ ވަރަށް ބޮޑަށް މަދުކުރެވޭނެކަމެއްކަމަށެވެ. އަދި އެތަކެތި ރާއްޖެ އެތެރެކުރުން ނިމުމަކަށް ގެނެވުމުން ރާއްޖޭގެ އިޤްތިޞާދަށް ދިރުން އަންނާނެކަމަށްވެސް ރައީސް ވިދާޅުވިއެވެ.
ރައީސް ވިދާޅުވީ، ދިވެހީންނަށް ބޭނުންވާ މިންވަރަށް ކާބޯތަކެތި އުފެއްދުމުގެ މަސައްކަތް ކުރެވުމުން، ދެވަނަ މަރުހަލާގައި ރާއްޖޭގެ ފަތުރުވެރިކަމުގެ ސިނާއަތަށްވެސް ފުދޭ މިންވަރަށް ކާބޯތަކެތީގެ ބާވަތްތައް އުފައްދާނެކަމަށެވެ. މިއީ ޤައުމުގެ މުސްތަޤްބަލަށް އެޅޭނެ މުހިންމު ބިންގަލެއްކަމަށް ރައީސް ސިފަކުރެއްވިއެވެ. މި މަސައްކަތްތަކާއެކު އެތައް ހާސް ވަޒީފާއެއް އުފެދި، އެތައް ރައްޔިތުންނެއްގެ ފުދުންތެރިކަންވެސް އިތުރުވެގެންދާނެކަމަށް ރައީސް ވިދާޅުވިއެވެ.
