ޝަރީއަތްތައް މިހާތަނަށް ލަސްކޮށްފައި ވަނީ ސަރުކާރުގެ އެންމެ މަތީ ފަންތިން އެ މައްސަލައިގެ ތެރެއަށް އަތް ބާނައިގެން ކަމަށާއި މިސަރުކާރުން އެމަނިކުފާނު މިނިވަންކުރަން މަސައްކަތް ނުކުރައްވާކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.؛
ޔާމީން އިސްވެ ހުންނަވައިގެން އުފެއްދި ޕީއެންއެފުން ރޭ ބޭއްވި ޖަލްސާގައި ޔާމީން ވިދާޅުވީ، މި ސަރުކާރުން އެމަނިކުފާނު ސަލާމަތްކުރަން މަސައްކަތެއް ނުކުރައްވާ ކަމަށެވެ. އަދި އަޑުއެހުންތައް ލަސްކުރަނީ ވެސް މި ސަރުކާރުން މައްސަލައިގެ ތެރެއަށް އަތް ބާނައިގެން ކަމަށް ޔާނީމް ތުހުމަތުކުރެއްވިއެވެ.
ވެރިކަމަށް ވަޑައިގެންނެވުމަށް ފަހު ތަކުރާރުކޮށް، ޝަރުއީ ނިޒާމަށް އެއްވެސް ނުފޫޒެއް ނުފޯރުވާކަމަށް ރައީސް މުއިއްޒު ވިދާޅުވަމުން ގެންދާތީ އެކަމުގެ ރައްދުގައި ރައީސް ޔާމީން ވިދާޅުވީ ރައީސުލްޖުމްހޫރިއްޔާގެ މަގާމުގައި ހުންނަވާ ބޭފުޅަކު އަދުލު އިންސާފާއި، ހިންގުމުގެ ދާއިރާއަށް އެއްވެސް ވަރަކަށް ބާރު ފޯރުވަން މަސައްކަތްކޮށްގެން ނުވާނެ ކަމަށެވެ.
ރައީސް ޔާމީން ވިދާޅުވީ އަދުލު އިންސާފުގެ ދާއިރާއަކީ، ރައީސުލްޖުމްހޫރިއްޔާއާއި މުޅިން ވަކިކޮށްފައިވާ ދާއިރާއެއްކަމަށާއި އެކަމަކު އެކަމުގެ ތެރެއަށް ނުފޫޒު ނުފޯރުވާނެކަމަށް ސަރުކާރުން ބުނަމުން ގެންދަނީ އެމަނިކުފާނު މިނިވަން ކުރުމަށް ގޮވާލާތީކަމަށެވެ. ރައީސް ޔާމީން ވިދާޅުވީ މިއަދު ވެސް ކެމްޕެއިން ބައްދަލުވުންތަކުގައި ރައީސް މުއިއްޒާ ރައްޔިތުން ސުވާލު ކުރަނީ އެމަނިކުފާނު މިނިވަން ނުވެ ހުރި ސަބަބާ ގުޅޭގޮތުން ކަމަށެވެ. ޖަވާބުގައި މިނިވަން ކުރުމަށް ވަރަށް މަސައްކަތް ކުރާކަމަށް ރައީސް ޔާމީން ވިދާޅުވާކަމަށް ރައީސް ޔާމީން ވިދާޅުވި އެވެ.
މުއިއްޒު ކުރައްވާ މަސައްކަތެއް ނޯންނާނެ އަޅުގަނޑު މިނިވަން ކުރާކަށް.. އަޅުގަނޑަށް އެނގިފައި އޮތް ގޮތުންކަމަށް ވާނަމަ، ސަރުކާރުގެ މަތީ ފަންތިން.. އަތް ބާނައިގެން.. އަޅުގަނޑުގެ ޝަރީަތް މިހާތަނަށް ވެސް ލަސްކުރީ…
ރައީސް ޔާމީން ވިދާޅުވީ ތަކުރާރުކޮށް، ޝަރުއީ ނިޒާމާއި ގުޅޭގޮތުން ސަރުކާރުން ވާހަކަ ދައްކާނެ ސަބަބެއް ވެސް އޮންނާނެކަމަށާއި އެކަމުން ރައްޔިތުން ދެނެގަންނަން ޖެހޭ މެސެޖެއް ވެސް ވާނެކަމަށެވެ.
ޔާމީން ތުހުމަތުކުރެއްވި ގޮތުގައި ޕީއެންސީން އޭރުވެސް ބޭނުންވީ އެމަނިކުފާނު ޖަލުގައި ބޭއްވުމަށްފަހު ރިޔާސީ އިންތިހާބުގައި އެ ޕާޓީގެ ކެނޑިޑޭޓަކު ނެރޭށެވެ. އަދި ރައީސް މުއިއްޒުގެ ކެނޑިޑެސީ ހުށަހެޅިއިރު ސްޕްރީމް ކޯޓުން ވަކި ގޮތަކަށް މައްސަލަ ނުނިންމާކަން ފާހަގަކުރައްވަމުން، އެމަނިކުފާނު ވިދާޅުވީ ޕީޕީއެމް/ޕީއެންސީ މަގުމަތިކުރަން ޔާމީން އުޅުއްވާ ކަމަށް ބުނެ ޕީއެންސީގެ މިހާރުގެ ޗެއާޕާސަން އަދި އޭރު އެ ކޯލިޝަނުގެ ލީޑަރުގެ ގޮތުގައި ހުންނެވި އަބްދުއްރަހީމް ދޮގު ހަބަރު ފަތުރާފައިވާ ކަމަށެވެ.
"އަޅުގަނޑުގެ މައްސަލަ، އަޅުގަނޑަށް ކުރިމަތި ނުލެވޭ ގޮތަށް ސުޕްރީމު ކޯޓުން ނިންމުމުގެ ކުރިން ޕީޕީއެމް/ޕީއެންސީ އިން ޕީއެންސީގެ ރިޔާސީ ކެންޑިޑޭޓަކު ހުންނާނީ ދައްކާފައި. އެހެންވީމާ ކޮން ވާހަކައެއް މި ދައްކަނީ މަގުމަތިވާ ވާހަކަ؟." ޔާމީން ސުވާލު ކުރެއްވިއެވެ.
ޔާމީން ވިދާޅުވީ ޖަލުގައި ހުންނަވައިގެން ރިޔާސީ އިންތިހާބު ބޮއިކޮޓް ކުރުމަށް ނާންގާ ކަމަށާއި އެއީ އެމަނިކުފާނު ދެއްވި ހިޔާލެއް ކަމަށެވެ.
