ރާއްޖޭގައި ހިންގާ ކުދި ވިޔަފާރިތައް އިޝްތިހާރު ކުރުމުގެ ފުރުސަތު "ހަމައެމްވީ" އިން ހުޅުވާލައިފި އެވެ.
މި އޮންލައިން މެދުވެރިކޮށް ލިޔުމެއް ޝާއިއުކޮށްގެން ވެބްސައިޓުގައާއި ސޯޝަލް މީޑިއާގައި އިޝްތިހާރު ކުރުމުގެ ފުރުސަތު ކުދި ވިޔަފާރިތަކަށް ހުޅުވާލާފައިވާއިރު އެކަން ކޮށްދޭން ނިންމާފައިވަނީ މުޅިން ހިލޭ އެވެ.
މި ހާއްސަ ހަރަކާތުގެ މައިގަނޑު މަގްސަދަކީ ކޮވިޑް-19 ގެ ސަބަބުން ކުދި ވިޔަފާރިތައް ވަރަށް ބޮޑަށް އަޑި އަޅާލާފައިވާތީ އެފަރާތްތަކަށް އެހީތެރިކަން ފޯރުކޮށްދިނުމެވެ. ހާއްސަކޮށް މާލެ ސަރަހައްދުގައި ހިންގާ ސެލޫން، ރެސްޓޯރެންޓް އަދި ފިހާރަތަކަށް މި ފުރުސަތު ވަނީ ހުޅުވާލާފަ އެވެ.
އިޝްތިހާރު ކުރަން ބޭނުންވާ ފަރާތްތަކަށް އެފަރާތްތަކުގެ ވިޔަފާރިއާއި ގުޅޭ ލިޔުމެއް "ހަމައެމްވީ" ގައި ޝާއިއު ކޮށްދޭއިރު، އިންޓަވިއު ނަގަން ހަމަޖެހިފައިވަނީ ވީޑިއޯގެ ޒަރިއްޔާއިންނެވެ. އަދި ކެމެރާ ކުރިމަތީގައި އިންޓަވިއު ދޭން އުޒުރުވެރިވާ ފަރާތްތަކަށް ފޯނު މެދުވެރިކޮށްވެސް އިންޓަވިއު ދިނުމުގެ ފުރުސަތު އޮންނާނެ އެވެ.
މި ފުރުސަތު އޮންލައިންކޮށް ވިޔަފާރި ކުރާ ފަރާތްތަކަށާއި ހަމައެކަނި ޑެލިވަރީ ނުވަތަ ޓޭކްއަވޭގެ ހިދުމަތް ދޭ ފަރާތްތަކަށްވެސް ވަނީ ހުޅުވާލާފަ އެވެ.
އިޝްތިހާރު ކުރަން ބޭނުންވާ ފަރާތްތަކުން ނަމާއި، ވިޔަފާރީގެ ބާވަތާއި އަދި ވިޔަފާރީގެ ނަން ހިމަނައި ފޮނުވަން ޖެހޭނީ މި އޮންލައިންގެ އީމެއިލް [email protected] ނުވަތަ މި އޮންލައިންގެ ޓްވިޓާ، ނުވަތަ ފޭސްބުކް ޕޭޖަށެވެ.
މި ސިލްސިލާގައި އިންޓަވިއު ނަގާނެ ވަކި އަދަދެއް މިހާތަނަށް ކަނޑައެޅިފައެއް ނުވެ އެވެ. އެހެންކަމުން ކޮންމެ މީހަކަށްވެސް ބައިވެރިވުމުގެ ފުރުސަތު ވަނީ ހުޅުވާލައިފަ އެވެ.
