"މަގޭ އީދު"ގެ ނަމުގައި ސިޓީ ކައުންސިލުން ކުޑަ އީދު ކުލަގަދަކޮށް ފާހަގަ ކުރަން ނިންމައިފިއެވެ.
ސިޓީ ކައުންސިލުން އެކްސްގައި ކުރި ޕޯސްޓެއްގައި ބުނެފައިވަނީ، "ސާދަ އެންޓަޓެއިންމަންޓް"އާއި ގުޅިގެން އެކި ހަރަކާތްތައް ހިންގުމަށް ތައްޔާރުވަމުންދާ ކަމުގައެވެ.
ކައުންސިލުން ބުނި ގޮތުގައި އީދު ދުވަހުގެ ހެނދުނު 9:30 ގައި ރަސްފަންނު ސަރަހައްދުގައި ކުލަ ޖެހުމުގެ ހަރަކާތެއް ވެސް އޮންނާނެ އެވެ. އަދި ބޮޑުމަހާއި މާލި ޕެރޭޑެއް ވެސް ހަވީރު 4:00 ގައި އޮންނާނެ އެވެ. މި ހަރަކާތް ފަށާނީ މަޖީދީ މަގުން އޮލިމްޕަސް ކުރިމަތިންނެވެ.
ސިޓީ ކައުންސިލުން ހާމަ ކޮށްފައިވާ ގޮތުގައި، އީދު ދުވަހުގެ ރޭ 8:30 ގައި އާޓިފިޝަލް ބީޗުގައި ހާއްސަ ޝޯއެއް ބާއްވާ ގޮތަށް ވަނީ ހަމަޖެހިފައެވެ. އެ އިވެންޓަށް ފަހު 10:00 ގައި އެ ސަރަހައްދުގައި ހަވާ އަރުވާނެ އެވެ.
ސިޓީ ކައުންސިލުން މާލޭގައި ކުލަ ގަދަކޮށް އީދު ފާހަގަކުރާއިރު، ސަރުކާރުން ވަނީ ކުޑަ އީދު ފާހަގަކުރުމަށް މުޅި ރާއްޖެ ގިޑިގެތަކުން ދިއްލާލަން ވެސް ނިންމައިފަ އެވެ.
ކަލަންޑަރުގައިވާ ގޮތުން ކުޑަ އީދު ދުވަހަކީ އަންނަ ހަފްތާގެ ބުދަ ދުވަހެވެ. މިއަހަރު ވެސް ހަވީރު 4:00 އިން ރޭގަނޑު 8:00 ޖަހަންދެން މާލޭގައި ވެހިކަލް ދުއްވުން މަނާވާނެ އެވެ.
