ޚާއްސަ ހާލަތްތަކުގައި ހަރަކާތްތެރިވާ ފުލުހުންގެ ޔުނިޓް، އެސްއޯ ފުލުހުންނަށް، ޕޮލިސް ކޮމިޝަނަރގެ ޚާއްސަ ހުއްދައެއްގެ ދަށުންމެނުވީ ހަރަކާތްތެރި ނުވެވޭ ގޮތަށް ހަމަޖައްސައިފިއެވެ.
ފުލުޖުންގެ އޮޕަރޭޝަނަލް އުސޫލުތަކަށް ބަދަލު ގެނެސްފައި މިވަނީ ކުރީގެ ރައީސް ޔާމީން ޢަބްދުލްޤައްޔޫމް އަލަށް އުފައްދަވާ ޕާޓީ، ޕީޕަލްސް ނޭޝަނަލް ފްރޮންޓް (ޕީއެންއެފް) އުފެއްދުމަށް ބާއްވަންޖެހޭ ޖަލްސާ ބޭއްވުމަށް ޣިޔާސުއްދީން ސްކޫލްގައި ތައްޔާރީތައް ވެފައިވަނިކޮށް، ފުލުހުން ރޭ އެ ޖަލްސާ ހުއްޓުވަން އެސްއޯ ފުލުހުން ބޭނުންކޮށްގެން ބާރުގެ ބޭނުންކޮށްފައިވަނީ އެމަނިކުފާނުގެ އެންގުމާ ޚިލާފަށް ކަމަށާއި، އެކަން ހިގައިދިޔަ ގޮތް ތަހުގީގު ކުރުމަށް މިއަދު އިރުއޮއްސުމުގެ ކުރިން އެމަނިކުފާނަށް ރިޕޯޓު ފޮނުވަން ރައީސް ޑރ. މުހައްމަދު މުއިއްޒު އަންގަވާފައި ވަނިކޮށެވެ.
ރައީސް އޮފީހުން ފަހުން ހާމަކޮށްފައިވާ ގޮތުގައި އެ ރިޕޯޓު ފުލުހުންވަނީ ރައީސަށް އަރުވާފައެވެ.
އެއަށްފަހު ހޯމް މިނިސްޓްރީން މިރޭ ނެރުނު ބަޔާނުގައި ބުނެފައިވަނީ، އެސްއޯ ފުލުހުންގެ އޮޕަރޭޝަންތައް އިތުރަށް ހަރުދަނާ ކުރުމަށްޓަކައި ރައީސް މުއިއްޒު މިރޭ، ހާއްސަ ފިޔަވަޅުތަކެއް ވަގުތުން އެޅުމަށް ހޯމް މިނިސްޓަރު އަލީ އިހުސާން މެދުވެރިކުރައްވައި، ޕޮލިސް ކޮމިޝަނަރު އަލީ ޝުޖާއު އަށް އަންގަވާފައި ވާކަމުގައެވެ.
އޭގެ ތެރޭގައި ތިރީގައި މިވާ ކަންކަން ހިމެނޭކަމަށް ހޯމް މިނިސްޓްރީގެ ބަޔާނުގައި ވިދާޅުވެފައި ވެއެވެ.
1- ސްޕެޝަލިސްޓް އޮޕަރޭޝަންސްގެ ފުލުހުން އެންގޭޖު ވާން ޖެހޭނެ އޮަޕަރޭޝަނަލް ހާލަތުތައް އަލުން ކަނޑައަޅައި، އެ ހާލަތުތަކުގައި ވެސް އެސްއޯ ފުލުހުން ޑިޕްލޮއި ކުރުމުގެ ކުރިން ކޮމިޝަނަރ އޮފް ޕޮލިސް ސީދާ ހުއްދަ ހޯދުން.
2- ފުލުހުންގެ އޮޕަރޭޝަނަލް ކޮމާންޑް އެންޑް ކޮންޓްރޯލް އަލުން ރީސްޓްރަކްޗާކޮށް، މިހާރު ހުރި ގޮންޖެހުންތަކަށް ހައްލު ހޯދުން.
3- ޣިޔާސުއްދީން އިންޓަނޭޝަނަލް ސްކޫލް ސަރަހައްދަށް އެސްއޯ ފުލުހުން ރޭ ނެރުނު ގޮތް ފުލުހުންގެ ޕްރޮފެޝަނަލް ސްޓޭންޑާޑްސް ކޮމާންޑުން ތަހުގީގުކޮށް، އެއްވެސް މީހަކު އިހުމާލު ވެފައިވާ ނަމަ އެ މީހަކަށް ގާނޫނީ ފިޔަވަޅު އެޅުން.
4- އޮޕަރޭޝަނަލް ހާލަތުތަކުގައި މީޑިއާ އަށް މައުލޫމާތު ދިނުމުގައި އަމަލުކުރާ އުސޫލު މުރާޖައާކޮށް، މިހާރަށް ވުރެ ދެފުށް ފެންނަ އަދި ތަފުސީލުކޮށް ރައްޔިތުންނަށް މައުލޫމާތު ހާމަކުރެވޭނެ ގޮތްތައް ކަނޑައެޅުން.
5- ޣިޔާސުއްދީން ސްކޫލް ކައިރީގައި އެސްއޯ ފުލުހުން ރޭ ބާރުގެ ބޭނުންކޮށްފައިވާ ގޮތް "ޔޫޒް އޮފް ފޯސް ރިވިއު ކޮމިޓީ" އިން ބަލައި ފިޔަވަޅު އެޅުން
މި ބަޔާނުގައި ވިދާޅުވެފައިވަނީ، މި ސަރުކާރުގެ ވިސްނުމަކީ އޯގާތެރި، ކުލުނުވެރި، ޕްރޮފެޝަނަލް އަދި ޖަވާބުދާރީވަނިވި ފުލުހުންގެ ޚިދުމަތެއް ދިވެހިރައްޔިތުންނަށް ފޯރުކޮށްދިނުން ކަމުގައެވެ.
