ރާއްޖެ އަށް މޫސުން ގޯސްވެ، ރާއްޖޭގެ މޫސުމާ ބެހޭ ގައުމީ އިދާރާ (މެޓް) އިން އުތުރުގެ ރަށްތަކަށް ރީނދޫ އެލާޓް ނެރެފިއެވެ.
މެޓް އޮފީހުން ރީނދޫ އެލާޓް ނެރުނީ ހއ. އަތޮޅުން ބ. އަތޮޅާ ދެމެދުގެ ސަރަހައްދަށެވެ. މި ސަރަހައްދަށް ސަމާލު ނެރެފައިވަނީ 1:30 އިން ހަވީރު 5:30 އާ ހަމައަށެވެ.
ރާއްޖޭގެ އެކި ހިސާބަށް ވިއްސާރަކުރުމާއެކު ގުގުރާނެ ކަމަށް ލަފާ ކުރެވޭ އިރު، ދެކުނާއި މެދު ރާއްޖެތެރޭގެ ބައެއް ރަށްތަކަށް ބޯކޮށް ވާރޭވެހުން އެކަށީގެންވާ ކަމަށެވެ.
މެޓް އޮފީހުން ބުނީ ވައިޖެހޭނީ ދެކުނުގެ އަތޮޅުތަކަށް ދެކުނާއި ހުޅަނގު ދެކުނުން ކަމަށެވެ. އަދި އެހެން ހިސާބުތަކަށް އިރުއުތުރާއި އިރުން ގަޑިއަކު 5 މޭލާއި 15 މޭލާއި ދެމެދުގެ ބާރުމިނުގައި ކަމަށެވެ. ރާޅުގެ އުސްމިން ހުންނާނީ ދެ ފޫޓާއި ހަތަރު ފޫޓާ ދެމެދު ކަމަށެވެ.
މެޓް އޮފީހުން ބުނީ ކުރިއަށްއޮތް ދެ ދުވަހު ވެސް ރާއްޖޭގެ އެކި ހިސާބުތަކަށް ވިއްސާރަ ކުރާނެ ކަމަށެވެ. އެހެންކަމުން ކަނޑު ދަތުރުކުރާއިރު މޫސުމަށް ސަމާލުވުމަށް އިލްތިމާސްކޮށްފައިވެއެވެ.
