އިދިކޮޅު ފަރާތްތަކުން އެކި ފަހަރު މަތިން އެމަނިކުފާނުގެ އިސްތަށިފުޅުގައި ދޮގު އިލްޒާމްތައް އަޅުވައި، އަބުރު ކަތިލަން މަސައްކަތް ކޮށްފައިވާ ކަމަށާއި، އެހެން ނަމަވެސް އެއިން ކޮންމެ ފަހަރަކުވެސް އެކަން ނާކާމިޔާބުވެފައިވާ ކަމަށް ވިދާޅުވެ ރައީސް ޑރ މުހައްމަދު މުއިއްޒު ވިދާޅުވެއްޖެ އެވެ.
މިރޭ ބޭއްވި ކެމްޕެއިން ޖަލްސާގައި ވާހަކަދައްކަވަމުން ރައީސް ވިދާޅުވީ ގައުމަށް ހަމަޖެހުން ގެނައުމުގެ އިތުރަށް ތަަރައްގީ އާއި ރައްކާތެރިކަން ކަށަވަރު ކުރުމަށް މަސައްކަތް ކުރައްވަމުން ގެންދަވާ ކަމަށެވެ. އަދި ރައްޔިތުންނަށް ވެވަޑައިގެންނެވި ވައުދުތައް ފުއްދުމުގެ މަސައްކަތް ކުރައްވާތީވެ، އިދިކޮޅު ފަރާތްތަކުން ގެންދަނީ އެމަނިކުފާނުގެ އިސްތަށިފުޅުގައި ދޮގު އިލްޒާމު އަޅުވަމުން ކަމަށެވެ.
ރައީސް ވިދާޅުވީ އިދިކޮޅުން މީގެ ކުރިން ބުނަމުން އައީ ސަރުކާރު ޖަވާބުދާރީ ކުރުވާނެ ކަމަށާއި ނަމަވެސް އިދިކޮޅުން ''ޖަވާބުދާރީ'' ލަފްޒު ބޭނުންކުރަނީ ''ސަރުކާރު ވައްޓާލުން'' ގެ ގޮތުގައި ކަމަށެވެ. ރައީސް ދެއްވި ޔަގީންކަމަކީ މި ފަސް އަހަރު ރައްޔިތުންނަށް ވެވަޑައިގެންނެވި ވައުދު ފުއްދަވާނެ ކަމެވެ.
ގައުމުގައި އަބަދާ އަބަދު ކުރީގައި އޮތް ބަދަލު ހިފުމުގެ ރޫހު އަލުން އިޔާދަކޮށް އެ ނޭންގާނީ ސިފަތަކުގެ ތެރޭގައި ތާށިވެތިބެ މުސްތަޤްބަލު ބަނަކޮށްލުމުގެ ފުރުސަތު އިދިކޮޅަށް ދޭނެ ކަމެއް ނެތް ކަމަށް ވެސް ރައީސް ވިދާޅުވި އެވެ.
ރާއްޖޭގައި ތަރައްގީގެ ކަންކަން ކުރާނެކަން އިނގޭތީ އެކި ކަހަލަ ވާހަކަތައް ދައްކަމުން ދަނީ. އެކި ކަހަލަ ދޮގު ހަދަމުން ދަނީ. އަޅުގަނޑު ބޮލުގައި ދޮގު އަޅުވަން އުޅެ، އެޅުވޭ ގޮތެއް ނުވޭ. އަޅުގަނޑަކީ ވައުދެއް ވެއްޖިއްޔާ ތެދުބަހުންނާއި އަމާނަތްތެރިކަމާއެކުގައި ފުއްދާ މީހެއްކަން ރައްޔިތުން ގަބޫލުކުރޭ.
އިދިކޮޅުން އަބަދުވެސް ކިޔަމުންދަނީ އެއް ލަވައެއް ކަމަށާއި ގާނޫނާއި ގަވައިދާ ހިލާފަށް އޭރުގައި ވެސް އަދި މިއަދު ވެސް ކަމެއް ކޮށްފައި ނުވާނެ ކަމަށް ވިދާޅުވިއެވެ. އަދި ކުރިއަށް އޮތްތާގައި ވެސް ނުކުރައްވާނެ ކަމުގެ ޔަގީންކަން ދެއްވެވިއެވެ.
