ރައްޔިތުންގެ މަޖިލީހުގެ މަކުނުދޫ ދާއިރާގެ ކުރީގެ މެންބަރު ޑރ. އަނާރާ ނައީމްގެ ދެކަނބަލުން ވެސް މި ފަހަރުގެ މަޖިލީސް އިންތިޚާބު ކާމިޔާބުކުރައްވައިފިއެވެ.
މަކުނުދޫ ދާއިރާގެ މެންބަރުކަން ކުރިން ކުރެއްވި އަނާރާ މި ފަހަރު އަމިއްލަގޮތުން ވާދަކުރެއްވީ ހުރާ ދާއިރާއަށެެވެ. އޭނާ އަމިއްލަގޮތުން އެ ދާއިރާއަށް ވާދަކުރަން ނިންމީ ވެރިކަން ކުރާ ޕީއެންސީގެ ޕްރައިމަރީން ނާކާމިޔާބުވުމުންނެވެ. އޭނާ ކުރިން މެންބަރުކަން ކުރެއްވި މަކުނުދޫ ދާއިރާއަށް މި ފަހަރު ވާދަކުރެއްވީ އޭނާގެ ފިރިކަލުން އާދަމް ޝަފީގެވެ.
ވަގުތީ ނަތީޖާ ދައްކާ ގޮތުން ޕީއެންސީއަށް 71 ގޮނޑި ލިބުނުއިރު ދެން އެންމެ ގިނަ ގޮނޑި ލިބުނީ އިދިކޮޅު މައި ޕާޓީ އެމްޑީޕީއަށެވެ. އެ ޕާޓީއަށް 12 ގޮނޑި ލިބުނުއިރު އަމިއްލަ ގޮތުން ވާދަކުރެއްވި ހަ މެންބަރުން ވަނީ ގޮނޑި ކަށަވަރުކޮށްފައެވެ. އަދި އެމްޑީއޭ އިން ދެ ގޮނޑި، ޖުމްހޫރީ ޕާޓީ އަދި އެމްއެންޕީއަށް ކަށަވަރުވީ އެއް ގޮނޑިއެވެ.
