20 ވަނަ މަޖިލިސް އިންތިޚާބުގައި ޕީޕީއެމް/ޕީއެންސީއިން 70 އަށް ވުރެ ގޮނޑި ނަންގަވާނެކަމަށް ރައީސް ޑރ. މުހައްމަދު މުއިއްޒުގެ ސްޕެޝަލް އެޑްވައިޒަރު އަބްދުއްރަހީމް އަބްދުﷲ(އަދުރޭ) ވިދާޅުވި ވިދާޅުވުން ދިމާވެއްޖެ އެވެ.
"އަދުރޭގެ ހިސާބު ޖެހުން" މީ ރާއްޖޭގެ ސިޔާސީ މަޝްރަހުގައި ވަރަށް މަޝްހޫރު ވެގެން ދިޔަ ވާހަކައެކެވެ.
މިދިޔަ ނޮވެމްބަރު މަހުގެ ތެރޭގައި ބައެއް މީޑިއާތަކަށް ދެއްވި އިންޓަވިއުއެއްގައި އަދުރޭ ވިދާޅުވެފައިވަނީ "ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި 93 ދާއިރާގެ ތެރެއިން ޕީޕީއެމް/ޕީއެންސީން 70 އަށް ވުރެ ގިނަ ގޮނޑި ނަގާނެކަމުގެ ޔަގީންކަން ބޮޑު ކަމަށް" ކަމުގަ އެވެ. އަދުރޭ މިފަހަރު ވެސް ޖެއްސެވި ހިސާބު ދިމާވެއްޖެ އެވެ.
އާދީއްތަ ދުވަހު ބޭއްވި މަޖިލިސް އިންތިޚާބުގެ ވަގުތީ ނަތީޖާ ދައްކާގޮތުން މަޖިލީހުގެ 71 ގޮނޑި ޕީއެންސީއަށް ވަނީ ލިބިފަ އެވެ.
އަދުރޭއަށް "ހިސާބު ސަރ" ނުވަތަ "ހިސާބު ޓީޗަރު"ގެ ނަމުން މުޚާތަބު ކުރެވެން ފެށުނީ ކުރީގެ ރައީސް އަބްދުﷲ ޔާމީނުގެ ވެރިކަމުގައި ޕޯޑިއަމްގައި ވާހަކަ ދައްކަވަމުން ހިސާބު ޖައްސަވައި ވިދާޅުވި ވާހަކައަކުން ނެވެ. ފަންސާސް ހަތަރަކާ ގުނަ ކުރުމުން ދެ ލައްކަ ވާނެ ކަމަށް ވިދާޅުވި ހިސާބުންނެވެ. އޭގެ ފަހުން މިދިޔަ ރިޔާސީ އިންތިޚާބާއި ހަމައަށް މީހަކު ނުބައިކޮށް ހިސާބެއް ޖަހައިފިނަމަ "ތިޔައީ އަދުރޭގެ ހިސާބު ޖެހުމޭ" ބުނެ އެވެ.
ނަމަވެސް މިދިޔަ ރިޔާސީ އިންތިޚާބުގެ ފަހުން އަދުރޭ ވެފައިވަނީ ސިޔާސީ ހިސާބު ޖެހުމުގައި މަގުބޫލު ފަރާތަކަށެވެ. އޭރު ޑރ.މުހައްމަދު މުއިއްޒުގެ ކެންޕެއިން ޖަލްސާއެއްގައި ވާހަކަ ދައްކަވަމުން ވެސް އަދުރޭ ވިދާޅުވެފައި ވަނީ މި އިންތިހާބުގައި ރައީސް ސޯލިޙަށް 40 އިންސައްތަ ވޯޓް ވެސް ލިބިވަޑައިނުގަންނަވާނެ ކަމަށެވެ. ކަންވީ ވެސް އެހެންނެވެ. އިންތިޚާބުގެ ފުރަތަމަ ބުރުގައިރައީސް ސޯލިޙަށް ލިބިވަޑައިގަތީ 39 ޕަސެންޓް ވޯޓެވެެ.އޭގެ ފަހުން އަދުރޭގެ ހިސާބު ދިމާވެފައި ވާތީ ސޯޝަލް މީޑިޔާގައި ތައުރީފު ކުރިއެވެ.
މި ފަހުން އައިސް ސިޔާސީ ހިސާބު ޖެހުމުގެ މޮޅު ވާހަކަ އަމިއްލަފުޅަށް ވެސް އަދުރޭ ބައެއް ޕޯޑިއަމްތަކުގައި ވަރަށް ފަޚުރުވެރިކަމާއެކީ ދައްކަވާފަ އެވެ. ބައެއް ފަހަރު އިދިކޮޅު ޕާޓީތަކަށް ރައްދު ދެއްވަމުން ހިސާބުޖައްސަވާފައި ވެ އެވެ.
މިފަހަރު ވެސް އަދުރޭ ޖެއްސެވި ހިސާބު މިއޮތީ ދިމާވެފަ އެވެ. ޕީޕީއެމް/ޕީއެންސީ އަށް މިފަހަރު ވަނީ މަޖިލީހުގެ 70 އަށް ވުރެ ގިނަ ގޮނޑި ލިބިފަ އެވެ. އަދުރޭ ވަނީ މިފަހަރުގެ ރައްޔިތުންގެ މަޖިލީހުގެ އިންތިޚާބުގައި ފޮނަދޫ ދާއިރާއަށް ވާދަކުރައްވައި ހޮވިވަޑައިގެންފަ އެވެ.
