ރައްޔިތުންގެ މަޖިލީހުގެ މިއަދުގެ ޖަލްސާގެ ކޯރަމް ހަމަނުވުމުން ނިންމާލައިފި އެވެ.
މަޖިލީހުގެ މިއަދުގެ ޖަލްސާ ފެށުމަށް އެޖެންޑާކޮށްފައި އޮތީ ހެނދުނު 9:00 ގަ އެވެ.
ޖަލްސާ ފެށުމަށް ބޭނުންވާ ކޯރަމް ހަމަނުވުމުން މަޖިލީހުގެ ރިޔާސަތުގައި އިންނެވި މަޖިލީހުގެ ރައީސް މުހައްމަދު އަސްލަމް ވިދާޅުވީ 9:30 ގައި ޖަލްސާ ފެށުމަށް މަސައްކަތް ކުރައްވާނެ ކަމަށެވެ.
ނަމަވެސް 9:30 ވީއިރުވެސް ކޯރަމް ހަމަވެފައިނުވެ އެވެ. ގާނޫނުއަސާސީ ބުނާ ގޮތުން މަޖިލީހުގެ ޖަލްސާތައް ފަށަން 22 މެންބަރުން ޖަލްސާއަށް ހާޒިރުވެ ތިބެންޖެހެއެވެ.
"މިއަދުގެ ޖަލްސާގެ ކޯރަމް ހަމަވެފައިނުވާތީ މި ހިސާބުން މިއަދުގެ ޖަލްސާ ނިންމާލަން،" ޖަލްސާ ނިންމާލައްވަމުން އަސްލަމް ވިދާޅުވި އެވެ.
މަޖިލީހުގެ މިއަދުގެ ޖަލްސާއަށް އެޖެންޑާކޮށްފައިވާ މަސައްކަތްތަކުގެ ތެރޭގައި ކެނދިކުޅުދޫ ދާއިރާގެ މެންބަރު އަހުމަދު އީސާ މިނިސްޓްރީ އޮފް ކޮންސްޓްރަކްޝަން ޑރ. އަބްދުﷲ މުއްތަލިބް އާ ކުރައްވާ ސުވާލު ހިމެނެ އެވެ.
އިއްޔެގެ ޖަލްސާ ކުރިއަށް ގެންދިޔަ ނަމަވެސް ހާޒިރީ ދަށްވުމުގެ ސަބަބުން މަޖިލީހުގެ މެޖޯރިޓީ ލީޑަރާއި މައިނޯރިޓީ ލީޑަރުގެ އެދުމަށް އިއްޔެ އެއްވެސް ވޯޓެއް ނަގާފައެއް ނުވެއެވެ. ވޯޓަށް އެހުން ތާވަލުކުރީ މިއަދުގެ ޖަލްސާއަށެވެ.
