ސްޓޫޑެންޓު ލޯނަށް އެދި ހުށަހަޅާފައިވާ ދަރިވަރުންގެ ތެރެއިން ޝަރުތު ހަމަވާ ހުރިހާ ދަރިވަރުންނަށް ލޯނު ދޭން ރައީސް ޑރ. މުހައްމަދު މުއިއްޒު ނިންމަވައިފިއެވެ.
ވަޒީރުންގެ "އަހާ" ފޯރަމްގައި ހަޔާ އެޑިއުކޭޝަން މިނިސްޓަރު ޑރ. މަރިޔަމް މާރިޔާ ރޭ ވިދާޅުވީ ޝަރުތު ހަމަވާ ކުދިންނަށް ފުރުސަތު ދޭން ނިންމައި އަންނަ މަހުގެ ދެ ވަނަ ދުވަހުގެ ނިޔަލަށް ލޯނަށް އެދުމުގެ ފުރުސަތު ހުޅުވާލައިފައިވާ ކަމަށެވެ.
ކުރިން މުއްދަތު ހަމަވާން އޮތީ މި މަހުގެ 25 ވަނަ ދުވަހުގެ ނިޔަލަށެވެ. އެއީ ލޯނަށް އެދި ހުޅުވާލި 500 ޖާގައެވެ. އެ ސްކީމްގެ ދަށުން ހާއްސަ އެހީއަށް އިސްކަން ދޭން ވެސް ވަނީ ނިންމައިފައެވެ. މިއީ ޑިޕްލޮމާ އިން ފެށިގެން ޕީއެޗްޑީއާ ހަމައަށް ކިޔެވުމަށް ރާއްޖެއިން ބޭރުން ދޭ ފުރުސަތުތަކެކެވެ.
އޭގެ އިތުރުން އިއްޔެ ބޭއްވި ކެބިނެޓު ބައްދަލުވުމުގައި ވަނީ މަތީ ތައުލީމަށް ދޫކުރާ ލޯނުގެ 50 ޕަސެންޓު، އެންމެ ޓެކްނިކަލް ދާއިރާތަކަށް ހާއްސަކުރަން ވެސް ނިންމައިފައެވެ. ހައިލީ ޓެކްނިކަލް ދާއިރާތަކުގެ ތެރޭގައި ހިމެނެނީ އިންޖީނިއަރިން އާއި ސުޕަ ސްޕެޝަލައިޒޭޝަން އަދި ކޯޑިން ފަދަ ދާއިރާތަކެވެ.
ލޯނު ދޫކުރާއިރު ވަކި ދާއިރާއަކަށް މީގެ ކުރިން ހާއްސަ ކޯޓާއެއް ކަނޑައަޅާފައެއް ނުވެއެވެ.
