ރާއްޖޭގައި ތިބި 51 އިންޑިއާ ސިފައިން މިހާތަނަށް ރާއްޖެއިން ފައިބައިފި ކަމަށާއި މޭ 10 ގެ ކުރިން ހުރިހާ ސިފައިން ފައިބާނެ ކަމަށް ރައީސް އޮފީހުގެ އިސް ތަރުޖަމާނު ހީނާ ވިލާދު ވިދާޅުވެއްޖެ އެވެ.
ހީނާ މިހެން ވިދާޅުވީ ރައީސް އޮފީހުގައި މިއަދު ކުރިއަށް ގެންދިޔަ ނޫސްވެރިންގެ ބައްދަލުވުމުގައި ނޫސްވެރިންނަށް މައުލޫމާތު ދެއްވަމުންނެވެ.
ހީނާ ވިދާޅުވީ މިހާތަނަށް 2 ޕްލެޓްފޯމެއްގައި ތިބި 51 އިންޑިއާ ސިފައިން ރާއްޖެއިން ފައިބައިފާވާ ކަމަށެވެ. އަދި ބާކީ ތިބި ހުރިހާ ސިފައިން މިމަހު 10 ގެ ކުރިން ރާއްޖެއިން ފައިބާނެ ކަމަށް އޭނާ ވިދާޅުވި އެވެ.
ރާއްޖެއިން ހުރިހާ ސިފައިން ފޭބުމުން ޖުމުލަ އަދަދު ހާމަ ކުރާނެކަމަށް ހީނާ ވިދާޅުވި އެވެ.
ރާއްޖޭގައި އިންޑިއާގެ ތިން އުޅަނދެއް އޮޕަރޭޓްކުރެއެވެ. ފުރަތަމަ ހެލިކޮޕްޓަރު ގެނައީ ކުރީގެ ރައީސް މުހައްމަދު ނަޝީދުގެ ވެރިކަމުގަ އެވެ. ދެވަނަ ހެލިކޮޕްޓަރު، ކުރީގެ ރައީސް އަބްދުﷲ ޔާމީނުގެ ވެރިކަމުގައި ގެނައިިރު، ޑޯނިއާ މަތިންދާބޯޓު ގެނެސްފައިވަނީ ނިމިދިޔަ ރައީސް އިބްރާހިމް މުހައްމަދު ސޯލިހުގެ ވެރިކަމުގަ އެވެ.
ރާއްޖޭގައި ސްޓޭޝަންވެގެން ތިބި އިންޑިއާ ސިފައިން އަނބުރާ ފޮނުވާލުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވައުދުފުޅުތަކުގެ ތެރެއިން އެންމެ މުހިންމު އެއް ވައުދެވެ.
