މިދިޔަ ހަފްތާގައި ބޭއްވި ވޯލްޑް ޓްރެވަލް އެވޯޑްސްގެ ހަފްލާގައި މޯލްޑިވްސް މާކެޓިން އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރްސީ)ގެ ޗެއާޕާސަން އައިޝާ ނޫރައިން ޖަނާހު ދެއްވި އިންޓަވިއުއަށް ދިވެހިންގެ ތައުރީފު އޮއްސާލައިފި އެވެ.
ނޫރައިން ދެއްވި އިންޓަވިއު ސޯޝަލް މީޑިއާގައި ދައުރުވަމުންދާއިރު އޭނާ އިންޓަވިއު ދެއްވީ އިނގިރޭސި ބަހުން ކަމަށްވާއިރު އޭނާގެ ދޫފަރިތަކަމާއި އަމިއްލަ ނަފްސަށް އޮތް އިތުބާރު އެ އިންޓަވިއުއިން ފާހަގަވާ ކަމަށް ސޯޝަލްމީޑިއާގައި އެ ވީޑިއޯއަށް ކޮމެންޓް ކޮށްފައިވާ ފަރާތްތަކުން ބުނެފައި ވެ އެވެ. އޭނާއަށް ތައުރީފުކޮށް އެ ވީޑިއޯއަށް ކޮމެންޓް ކޮށްފައިވާ މީހުން ފާހަގަ ކުރިގޮތުގައި އޭނާއަކީ "ދިވެހިން ޕުރައުޑް-ވާވަރުގެ ކޮލިޓީ އަންހެން ލީޑަރެއް" ކަމަށެވެ. އަދި އޭނާއަކީ ރާއްޖޭގެ މިވަގުތަށް ޓޫރިޒަމް މިނިސްޓަރު ކަމަށް ގެންނަން ބޭނުންވާ ފަރާތް ކަމަށާއި ދިވެެއްސަކަށް ވީތީ އޭނާއާއި ދޭތެރޭ ފަޚުރުވެރިވާ ކަމަށް ވެސް ބައެއް ފަރާތްތަކުގެ ކޮމެންޓުގައި ވެ އެވެ.
https://twitter.com/MvCrisis/status/1788807276465467457
މި އަހަރުގެ ވޯލްޑް ޓްރެވަލް އެވޯޑްސް އިންޑިއަން އޯޝަންސް ކެޓަގަރީގައި ރާއްޖެ، ހަތަރު ކެޓަގަރީއަކުން ވަނީ އެވޯޑް ހޯދާފަ އެވެ.
މި އެވޯޑް ހަފުލާ ބާއްވާފައި ވަނީ ދުބާއީ ވޯލްޑް ޓްރޭޑް ސެންޓަރުގަ އެވެ.
ވޯލްޑް ޓްރެވަލް އެވޯޑްސްގައި މި ފަހަރު ރާއްޖެ ނުވަ ކެޓަގަރީއަކުން ނޮމިނޭޓްވި އެވެ. އެކަމަކު އެވޯޑް ލިބުނީ ހަތަރު ކެޓަގަރީއަކުންނެވެ.
ރާއްޖެ އަށް ލިބުނު އެވޯޑްތަކަކީ:
* އިންޑިއަން އޯޝަންސް ލީޑިން ޑެސްޓިނޭޝަން
* އިންޑިއަން އޯޝަންސް ލީޑިން ހަނީމޫން ޑެސްޓިނޭޝަން
* އިންޑިއަން އޯޝަންސް ލީޑިން ގްރީން ޑެސްޓިނޭޝަން
* އިންޑިއަން އޯޝަންސް ލީޑިން ޑައިވް ޑެސްޓިނޭޝަން
މި އެވޯޑްތަކާއި ހަވާލުވެވަޑައިގަތީ ޓޫރިޒަމް މިނިސްޓަރު އިބްރާހީމް ފައިޞަލާއި އެމްއެމްޕީއާރްސީގެ ޗެއާޕާސަން، އައިޝާ ނޫރައިން ޖަނާޙާއި އެމްއެމްޕީއާރްސީގެ ސީއީއޯ ފާޠިމަތު ތައުފީޤްގެ އިތުރުން އަދި ޓޫރިޒަމް ޑިވެލޮޕްމަންޓާ ބެހޭގޮތުން ރައީސުލްޖުމްހޫރިއްޔާ އައްޔަންކުރައްވައިފައިވާ އެޑްވައިޒަރު މުހައްމަދު ޚަލީލެވެ.
