ކެފޭއެއް ތެރެއިން ދުން ލީކްވެ، ބަޔަކަށް ފަރުވާ ދޭން ފަށައިފިއެވެ.
ފުލުހުން ބުނީ މި ހާދިސާ ހިނގަން މެދުވެރިވީ ބޮޑުރަސްގެފާނު މަގުގައި ހުރި ކެފޭއެއްގެ ބަދިގެ ތެރެއަށް ދުން ލީކްވުމާއި ގުޅިގެން ކަމަށެވެ. ދުން ލީކްވުމުގެ ސަބަބުން 7 މީހަކު އަނބުރާގަނެގެން އައިޖީއެމްއެޗަށް ގެންގޮސްފައިވާ ކަމަށް މިއަދު ފަތި 05:50 އެހާކަށްހާއިރުގައި ފުލުހުންނަށް ރިޕޯޓްކޮށްފައި ވެއެވެ.
އަނިޔާވި މީހުންގެ ތެރޭގައި ހިމެނެނީ ސްރީ ލަންކާ މީހަކާއި އިންޑިއާ މީހަކާއި ބަންގްލަދޭޝް 2 މީހުންގެ އިތުރުން ނޭޕާލްގެ 3 މީހުން ނެވެ. މި މީހުންގެ ތެރެއިން އެކަކަށް މިހާރތު ފަރުވާ ދެމުން ގެންދަނީ އޭޑީކޭ ހޮސްޕިޓަލުން ނެވެ.
އެއްވެސް މީހެއްގެ ހާލު ސީރިއަސް ނޫން ކަމަށް ހޮސްޕިޓަލުން ފުލުހުންނަށް މައުލޫމާތު ދީފައި ވެއެވެ.
މި ހާދިސާއާއި ގުޅިގެން ބަލަން ޖެހޭ ކަންކަން މިހާރު ފުލުހުން ދަނީ ބަލަމުން ނެވެ.
