ކޮވިޑް-19 ގެ ދެވަނަ ރާޅެއް ނަގައި މިދިޔަ މާޗު މަހުން ފެށިގެން ހާލަތު ގޯސްވެފައިވާ އިންޑިއާގައި އެބަލީގެ ތިންވަނަ ރާޅެއް ނަގައިފާނެ ކަމުގެ ބިރު އެބައޮތް ކަމަށް ދިރާސާއަކުން ދައްކައިފި އެވެ.
ސިއްހީ މާހިރުންގެ ރައުޔާއިއެކު ރޮއިޓާސްއިން ހެދި ދިރާސާއަކުން ދައްކާ ގޮތުގައި މިއަހަރުގެ އޮކްޓޯބަރު މަހުގެ ތެރޭގައި އިންޑިއާގައި ކޮވިޑުގެ ހާލަތު އަނެއްކާވެސް ގޯސް ވެދާނެ އެވެ.
މާޗު މަހު ކޮވިޑުގެ ހާލަތު ވަރަށް ބޮޑަށް ގޯސްވެ ރެކޯޑު އަދަދަކަށް މީހުން މަރުވަމުން ގޮސް މިމަހުގެ ކުރީކޮޅާއި ހަމައިން ހާލަތު ދަނީ ރަނގަޅުވަމުންނެވެ. މިއާއެކު އިިންޑިއާގެ ސްޓޭޓުތަކުގައި ދަނީ ރައްކާތެރިކަމުގެ ފިޔަވަޅުތަކަށް ލުއިވެސް ދެމުންނެވެ. އެގޮތުން ބަންދުކޮށްފައި އޮތް ޓޫރިސްޓު ސައިޓުތައްވެސް މިހާރު ދަނީ ހުޅުވަމުންނެވެ.
ޑޮކްޓަރުންނާއި، ސައިންޓިސްޓުން އަދި ވައިރޮލޮޖިސްޓުންނާއި އެޕިޑެމިއޮލޮޖިސްޓުންގެ ތެރެއިން 40 ފަރާތަކާއިއެކު ހެދި ސާވޭއިން ދައްކާ ގޮތުގައި އެންމެ އަވަހަށްވެސް އިތުރު ރާޅެއް ނަގާނީ އޮކްޓޯބަރު މަހު އެވެ. އެހެންނަމަވެސް ނޮވެމްބަރު ނުވަތަ އަންނަ އަހަރުގެ ޖެނުއަރީއަށް އެ ރާޅު ނެގުން ލަސްވެދާނެ ކަަމަށް ލަފާ ކޮށްފައި އެވެ.
ތަޖުރިބާކާރުން ވަނީ އިންޑިއާގައި ފިޔަވަޅުތަކަށް ލުއި ދެމުން ދާއިރު ސަމާލުވުމަށް އެދިފަ އެވެ. ހާއްސަކޮށް އާބާދީ ބޮޑު ހިސާބުތަކުގައި ފިޔަވަޅުތައް މާ ބޮޑަށް ދޫކޮށް ނުލުމަށް ތަޖުރިބާކާރުން އެދެ އެވެ. ކޮވިޑުގެ ދެވަނަ ރާޅުގައި އެންމެ ހާލަތު ގޯސްވީ އިންޑިއާގެ އެންމެ އާބާދީ ބޮޑު ސްޓޭޓުތަކުގަ އެވެ. އެއީ މުމްބާއީގެ މަހަރާޝްޓްރަ ގެ އިތުރުން ނިއު ދިއްލީގަ އެވެ.
ވެކްސިން ދިނުމުގެ ޕްރޮގުރާމް އިންޑިއާގައި ފެށިނަމަވެސް ވެކްސިން އުފެއްދުމުގައި ލަސްތަކެއް އައުމާއި ގުޅިގެން ޕްރޮގުރާމުގެ ދުވެލި ވަނީ މަޑުޖެހިފަ އެވެ. އެހެންނަމަވެސް މި އަހަރުގެ ތެރޭގައި އާބާދީގެ ބޮޑު ބަޔަކަށް ވެކްސިން ދެވޭނެ ކަމަށް ތަޖުރިބާކާރުން ލަފާކުރެ އެވެ. 1.2 ބިލިއަން މީހުންގެ އާބާދީއެއް އޮންނަ އިންޑިއާގައި ވެކްސިން ދޭން ޖެހޭ 950 މިލިއަން މީހުން އެބަ ތިއްބެވެ. މިހާތަނަށް ވެކްސިން ދެވުނީ މި އާބާދީގެ އެންމެ ފަސް އިންސައްތައަށެވެ.
ތަޖުރިބާކާރުން ލަފާކުރާ ގޮތުގައި ކޮވިޑުގެ ތިންވަނަ ރާޅުގައި ބޮޑުވަރު ވާނެކަމަށް ބެލެވެނީ ވެކްސިން ނުޖެހޭ އުމުރުފުރާގެ ކުދިންނަށެވެ. އެހެންނަމަވެސް ދެވަނަ ރާޅަށްވުރެއް ތިންވަނަ ރާޅު ކޮންޓްރޯލް ކުރަން ފަސޭހަ ވާނެ ކަމަށް ދިރާސާގައި ވަނީ ބުނެފަ އެވެ.
އިންޑިއާގައި ކޮވިޑުގެ ހާލަތު މިހާރު އަންނަނީ ވަރަށް ބޮޑަށް ރަނގަޅުވަމުންނެވެ. އެގައުމުގައި އެންމެ ހާލަތު ގޯސްވެގެން ދިޔައީ މެެއި މަހުގެ ކުރީކޮޅެވެ. އޭރު 400،000 އެއްހާ މީހުން ދުވާލަކަށް ޕޮޒިޓިވްވި އެވެ. އަދަދުތައް ދަށްވަމުން އައިސް މިހާރު ދުވާލަށް ޕޮޒިޓިވް ވަނީ 60،000 އެއްހާ މީހުންނެވެ.
ހާލަތު އިތުރަށް ގޯސްވިޔަ ނުދީ ކޮންޓްރޯލް ކުރުމަށް ވެކްސިން ދިނުން އަވަސްކުރަން ޖެހޭކަމަށް ސައިންސްވެރިން ލަފާ ދެއެވެ. އިންޑިއާއިން ދަނީ ބޭރުގެ ގައުމުތަކުންވެސް ވެކްސިން ހޯދަން މަސައްކަތް ކުރަމުންނެވެ. ބެލެވޭ ގޮތުގައި ކުރިއަށް އޮތް ދެ މަހެއްހާ ދުވަހުގެ ތެރޭގައި އެމެރިކާގެ އެހީގައި ފައިޒާ ވެކްސިން އިންޑިއާއަށް ފޯރުކޮށްދޭނެ އެވެ.
