ޅެމުން ނަފްސާނީ ބައްޔަށް ދޭ ފަރުވާއަށް "ޅެން ފަރުވާ"ގެ ނަންދީ، އެކަމަށްޓަކާ ކުރަންޖެހޭ އިލްމީ ދިރާސާކުރުމުގެ މަސައްކަތް ގައުމީ ޔުނިވަރސިޓީއާއި ހަވާލުކުރުމަށް ދިވެހި ބަހާއި ސަޤާފަތާއި ތަރިކައާ ބެހޭ ވުޒާރާއިން ހަމަޖައްސައިފިއެވެ.
ޅެމުން ނަފްސާނީ ބައްޔަށް ފަރުވާދިނުން ތައާރަފް ކުރުމުގެ ވިސްނުން ގެންގުޅެމުން އަންނަކަން މިނިސްޓަރ އާދަމް ނަސީރު ހާމަކުރެއްވީ މިއަހަރުގެ ޅެންވެރިންގެ ދުވަހު ވާހަކަ ދައްކަވަމުންނެވެ.
ބަހާއި ސަޤާފަތާއި ތަރިކައާ ބެހޭ ވުޒާރާއިން މިއަދު ބުނީ ޕޮއެޓްރީ ތެރަޕީގެ ދިވެހި ނަމެއްގެ ގޮތުގައި "ޅެން ފަރުވާ" ކިޔަން ދިވެހިބަހުގެ އެކެޑެމީގެ ބަސް ކޮމިޓީން ފާސްކޮށްފައިވާ ކަމަށެވެ. އެ ނަމުގެ މާނައަކީ "ބަލި މީހާގެ އިހުސާސްތަކާއި އުދާސްތަކާ ގުޅޭ ޅެން ހެދުމާއި ކިޔުމާއި އަޑުއެހުމުގެ ތެރެއިން ނަފުސަށް ގެނެސްދޭ ތަސައްލީއެވެ." މިއީ ގަދީމީ ޒަމާނުއްސުރު ހަޟާރަތްތަކުގައި ބަލިތަކަށް ފަރުވާދިނުމުގައި ބޭނުންކުރަމުން އަންނަ ތަރީގާއެކެވެ.
އެ މިނިސްޓްރީން ބުނެފައިވަނި މިކަމާއި ގުޅޭ ދިރާސާގެ މަސައްކަތް އެމްއެންޔުއާއި ހަވާލުކުރުމަށް ނިންމާފައިވާ ކަމަށާއި، އެކަމަށްޓަކައި އެމްއެންޔޫ އާއި އެ މިނިސްޓްރީ އާ ދެމެދު އެއްބަސްވުމުގައި ސޮއިކުރުމަށް ހަމަޖެހިފައިވަނީ އަންނަ ބުދަ ދުވަހު ބޭއްވުމަށް ހަމަޖެހިފައިވާ ކަމުގައެވެ.
މި އިލްމީ ދިރާސާގެ އިތުރުން ވެހި ޅެންތައް ބޭނުންކޮށްގެން ނަފުސީ ތަފާތު ބަލިތަކަށް ދެވިދާނެ ފަރުވާގެ މިންވަރާއި ތަފާތު ބަލިތަކަށް ފަރުވާ ދިނުމުގައި ގެންގުޅޭނެ އުސްލޫބުތައް ދެނެގަތުންވެސް ހިމެނޭނެކަމަށް މިނިސްޓްރީން ބުނެފައި ވެއެވެ.
ޅެން ފަރުވާ ކުރިއަށް ގެންދިއުމާ ގުޅޭ ގޮތުން ސޮސައިޓީ ފޯ ހެލްތު އެޑިއުކޭޝަން (ޝީ)، މެންޓަލް ހެލްތް ސެންޓާ، ޗައިލްޑް ޑިވެލޮޕްމަންޓް ސެންޓާ އަދި ދަމަަނަވެށީގެ ފަންނީ ބައެއް ބޭފުޅުންނާ އެކު މިނިސްޓްރީން ވަނީ މަޝްވަރާ ކޮށްފައެވެ.
