މަސްވެރިން ބާނާ މަހަށް ދޭންޖެހޭ ފައިސާގެ ތެރެއިން، އޭޕްރީލް މަހާ ހަމައަށް މިހާރު ފައިސާ ދީފައިވާ ކަމަށް ސަރުކާރުގެ މަސް ކުންފުނި މިފްކޯއިން މިއަދު ބުނެފިއެވެ.
މިފްކޯއިން ބުނީ، މަސްވެރިންނަށް ދޭންޖެހޭ ފައިސާ އެންމެ ފަހުން ދޫކޮށްފައިވަނީ، މިދިޔަ ބުރާސްފަތި ދުވަހު ކަމަށެވެ. އެއީ، އޭޕްރީލް މަހުގެ ފައިސާއެވެ.
އެހެންކަމުން ފައިސާ ނުދީ މިހާރު އޮތީ ތިން ވަރަކަށް ހަފުތާކަމަށް އެ ކުންފުނިން ބުންޏެވެ. މިފްކޯއިން ބުނީ އެ ކުންފުނިން މަސްވެރިންނަށް ނުދެވި ހުރީ ގާތްގަނޑަކަށް 63 މިލިއަން ރުފިޔާ ކަމަށެވެ.
ރައީސް ޑރ. މުހައްމަދު މުއިއްޒު ވިދާޅުވެފައިވަނީ މަސްވެރިންނަށްނަށް ދޭންޖެހޭ ފައިސާ ނުދީ ދިގުލައިގެން ދިޔައީ، މި ސަރުކާރު ހަވާޅުވިއިރު މިދިޔަ ސަރުކާރުގައި މަސްވެރިންނަށް ނުދީ އޮތް 230 މިލިއަނެއްހާ ރުފިޔާ އޮތުމުންކަމަށެވެ. މަސްވެރިންނަށް ނުދެވި ހުރީ ގާތްގަނޑަކަށް 63 މިލިއަން ރުފިޔާ ހުރި އިރު މަސްވެރިންގެ ބެކްލޮގް އެއްކޮށް ހަލާސްކުރުމަށް ފަހު މަސްކިރާތާ 48 ގަޑިއިރުގެ ތެރޭގައި ފައިސާ ދޫކުރައްވާގޮތަށް ބަދަލުކުރައްވާނެކަމަށް ރައީސް ވަނީ މީގެ ކުރިން ވިދާޅުވެފަ އެވެ.
