މި އަހަރުގެ އޭޕްރީލް މަހުގެ ނިޔަލަށް ދަނޑުވެރިންނަށް 13 މިލިއަން ރުފިޔާގެ ލޯނު ދޫކޮށްފައިވާ ކަމަށް ދަނޑުވެރިކަމާބެހޭ ވުޒާރާއިން ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ސްޓޭޓް މިނިސްޓަރު މަރިޔަމް ވިޝާމާ ވިދާޅުވީ، މިދިޔަ އޭޕްރީލް މަހުގެ ނިޔަލަށް އަމިއްލަ ފަރުދުންނަށް ހަތަރު މިލިއަން ރުފިޔާ، އަދި ވިޔަފާރިތަކަށް އަށް މިލިއަން ރުފިޔާގެ ލޯނު ދޫކުރި ކަމަށާއި މިހާތަނަށް ޖުމްލަ 13 މިލިއަން ރުފިޔާގެ ލޯނު ދޫކޮށްފައިވާ ކަމުގައެވެ.
ވިޝާމާ ވިދާޅުވީ "ދަނޑުވެރި ނަފާ" ގެ ނަމުގައި މި ލޯނު ސްކީމް ހިންގަނީ އެސްޑީއެފްއާ ގުޅިގެންނެވެ. އެ ލޯނު ދިނުމުގައި ޒަމާނީ ޓެކްނޮލޮޖީތަކާ އެކު ދަނޑުވެރިކަން ކުރަން އެހީތެރިވެދޭނެ ކަމަށް އޭނާ ވިދާޅުވި އެވެ.
ވިޝާމާ ވިދާޅުވީ، ހައިޑްރޯޕޯނިކްސް ފާމިން ފެށުމަށްޓަކައި އދ.އޮމަދު އާއި ފ. ދަރަނބޫދޫ ކަނޑައަޅައި އެ ދެ ރަށުގައި އެކަމުގެ މަސައްކަތްތައް ފަށާފައިވާ ކަމަށާއި، މިއިން ކޮންމެ ރަށެއްގެ 10 ދަނޑުވެރިންގެ ތެރެއިން ކޮންމެ ދަނޑުވެރިއަކަށް 50 ލެޓިއުސް އިންދޭ ހޮޅި ސިސްޓަމަކާއި ކިއުކަމްބާ މެލަންގެ 25 ގަސް ހެއްދޭ ވަރުގެ ޓްރަފް ސިސްޓަމެއް ފޯރުކޮށްދެވޭނެ ކަމުގައެވެ.
"މިހާރު ކުރިއަށްދަނީ މި ރަށްތަކުގައި ސިސްޓަމުތައް ގާއިމްކުރުމަށް ޕްރޮކިއުމެންޓް ކުރުމުގެ މަސައްކަތްތައް،" ވިޝާމާ ވިދާޅުވިއެވެ.
އެ ދެ ރަށުގައި ހިންގާ ޕްރޮގްރާމު މި އަހަރުގެ ސެޕްޓެމްބަރުގައި ނިންމައި ދަނޑުވެރިންނާ މަސައްކަތް ހަވާލު ކުރެވޭނެ ކަމަށާއި، އެ ސިސްޓަމުން އެވްރެޖުކޮށް 12 ކިލޯގެ ފަތާއި، ކިއުކަމްބާ ސިސްޓަމުތަކުން 66 ކިލޯ އުފެއްދޭނެ ކަމަށް އޭނާ ވިދާޅުވިއެވެ.
ހައިޑްރޯޕޯނިކްސްގެ އިތުރުން ވާޓިކަލް ފާމިން މަސައްކަތް ފެށުމަށް ޅ.ނައިފަރާއި ރ.ހުޅުދުއްފާރު، ނ.ކެނދިކުޅުދޫ، ތ ކިނބިދޫ އެ މިނިސްޓްރީން ވަނީ ކަނޑައަޅައިފައެވެ. އެ ރަށްތަކުގައި 1،000 އަކަފޫޓުގެ ގްރީން ހައުސްއެއް ހަދާނެއެވެ.
މިވަގުތު ރާއްޖޭގައި 7،600 ދަނޑުވެރިން ތިބި އިރު އޭގެ ތެރެއިން 55 ޕަސެންޓަކީ އަންހެނުންނެވެ.
