ގައުމުގެ ސައިޒަކީ އެ ގައުމެއްގެ މުސްތަގުބަލް ކަނޑައަޅާ މިންގަނޑެއް ނޫން: ރައީސް

ތަރައްގީއާއި ކުރިއެެރުމަށް ކުރާ މަސައްކަތުގައި ސިޑްސްގެ ގައުމުތައް ނަމޫނާއަކަށް ވާންޖެހޭ ކަމުގައި ރައީސް މުއިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ އެންޓިގުއާ އެންޑް ބާބުޑާގައި ކުރިއަށްދާ ހަތަރުވަނަ އިންޓަނޭޝަނަލް ކޮންފަރެންސް އޮން ސްމޯލް އައިލެންޑް ޑިވެލޮޕިން ސްޓޭޓްސް (ސިޑްސް) މަހާސިންތާ ހުޅުވުމުގެ ރަސްމިއްޔާތުގައި ރާއްޖޭގެ ފަރާތުން އިއްވެވި ބަޔާނުގައެވެ.

ރައީސް ވިދާޅުވީ ސިޑްސްގެ ގައުމުތަކުން ގުޅިގެން މަސައްކަތް ކޮށްފިނަމ ބައިނަލްއަގްވާމީ މައިދާނުގައި އިސް ދައުރެއް އަދާކުރަން ފުރުސަތު ލިބި، ހާސިލުކުރަން ބޭނުންވާ އަމާޒުތަކާއި ލަނޑުދަނޑިތަކަށް ވާސިލްވެވޭނެ ކަމަށެވެ. ސިޑްސްގެ ގައުމުތަކުން އިދާރީ ހިންގުން ހަރުދަނާކޮށް، ނަޒާހަތްތެރިކަމާއި ޖަވާބުދާރީވުން އިތުރުކޮށްފިނަމަ އިންވެސްޓްމަންޓްތައް އިތުރުކުރެވޭނެ ކަމުގައިވެސް ވިދާޅުވި އެވެ.

އެމަނިކުފާނު ވިދާޅުވީ ސިޑްސްގެ ގައުމުތަކަކީ ކުދި ޖަޒީރާ ގައުމުތަކަކަށްވީ ނަމަވެސް ގުޅިގެން ކުރާ މަސައްކަތުން ބާރުވެރި ފަރާތަކަށް ވެއްޖެނަމަ ސިޑްސްގެ ގައުމުތަކުގެ ގޮވާލުންތަކުގައި ބާރުވެރިކަން ހުންނާނެ ކަމަށެވެ. ރާއްޖެއަކީ ކުޑަ ޖަޒީރާ ގައުމަކަށްވީ ނަމަވެސް އދގެ ސަލާމަތީ މަޖިލީހާއި، އދގެ އިކޮނޮމިކް އަދި ސޯޝަލް ކައުންސިލް ފަދަ އދގެ ބާރުގަދަ ގުނަންތަކުން ޖާގަ ހޯދުމަށް ރާއްޖެއިން މަސައްކަތް ކުރާނެ ކަމުގައިވެސް ވިދާޅުވި އެވެ.