ބަންގްލަދޭޝް އާއި އަވަށްޓެރި އިރުމަތީ އިންޑިއާއަށް މިދިޔަ އާދީއްތަ ދުވަހު އެރި ތޫފާން "ރެމާލް" ގެ ސަބަބުން 39 މީހުން މަރުވެ އެތައް މިލިއަން ބަޔަކަށް ކަރަންޓުގެ ހިދުމަތް މެދުކެނޑިއްޖެއެވެ.
މި ތޫފާނުގެ ސަބަބުން އިންޑިއާގެ 24 މީހުން މަރުވެފައިވާއިރު ކުރިއަށް އޮތް ދުވަސްތަކުގައި އެގައުމުގެ އިރުއުތުރު ސަރަހައްދަށް ބޯކޮށް ވާރޭ ވެހޭނެ ކަމަށް އިންޑިއަން މީޓިއޮރޮލޮޖިކަލް ޑިޕާޓްމަންޓުން ވަނީ ބުނެފަ އެވެ. މި ތޫފާނުގެ ސަބަބުން ކަރަންޓުގެ ހިދުމަތް ކެނޑިގެން ދިޔައިރު، އެތައް ގެތަކަށް ބޮޑެތި ގެއްލުންތަކެއްވެސް ލިބުނެވެ.
ބަންގްލަދޭޝްގެ ގާތްގަނޑަކަށް ހަތަރު މިލިއަން މީހުންނަށް މި ތޫފާނުގެ އަސަރު ވަނީ ކޮށްފައެވެ. އަދި އެގައުމުގެ އެތަށް ހާސް ގޭބީސީތަކާއު ދަނޑުވެރިކަން ކުރާ ބިންތައް ވަނީ ހަލާކުވެފަ އެވެ.
އަންގާރަ ދުވަހާ ހަމައަށް ތޫފާންގެ އަސަރު މަޑުވި ނަމަވެސް ބަންގްލަދޭޝް އާއި އިންޑިއާގެ މޫސުމާ ބެހޭ މާހިރުން ވަނީ ބޯކޮށް ވާރޭވެހި ވައި ގަދަވުން ދުވަސްކޮޅަކަށް ދެމިއޮންނާނެ ކަމުގެ އިންޒާރު ދީފައެވެ.
