ޔޫތު މިނިސްޓަރު އަހުމަދު މަހުލޫފުގެ ކޮރަޕްޝަން މައްސަލައާއި ގުޅިގެން އޭނާގެ މައްޗަށް ދައުވާ ނުކުރަން ނޫޅޭ ކަމަށާއި ވަކި މީހަކަށް ދައުވާ ކުރަން ބިރުން ނޫޅުއްވާ ކަމަށް ޕްރޮސެކިއުޓާ ޖެނެރަލް ހުސައިން ޝަމީމް ވިދާޅުވެއްޖެ އެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ޝަމީމް ވިދާޅުވީ މަހުލޫފުގެ މައްސަލައިގައި އިތުރު ކަންތައްތަކެއް ފުރިހަމަކޮށް ލިޔުންތައް ފުރިހަމައަށް ހުށަހެޅުމަށް އެންޓި ކޮރަޕްޝަން ކޮމިޝަން (އޭސީސީ) އަށް އެންގީ ދައުވާ ނުކުރުމުގެ ނިޔަތުގައި ނޫން ކަމަށެވެ. ޝަމީމް ވިދާޅުވީ ދައުވާއެއް ކުރަން މައްސަލައެއް ފޮނުވާ ހިސާބުން ޕީޖީ އޮފީހަށް މުހިއްމުވަނީ ކޯޓުގައި އެ މައްސަލަ ސާބިތުކުރެވޭވަރުގެ ހެކި ހުރިތޯ ބެލުން ކަމަށެވެ. އެގޮތުން ކޯޓުން އަންނާނެ ސުވާލުތަކަށް ވިސްނައި އެކަމަށް ތައްޔާރުވާން ޕީޖީން އަބަދުވެސް މަސައްކަތް ކުރާކަމަށް ޝަމީމް ވިދާޅުވި އެވެ.
އެމްއެމްޕީއާރުސީ ހިޔާނާތުގެ މައްސަލައަކާއި ގުޅިގެން މަހުލޫފުގެ މައްޗަށް ކުރާ ކޮރަޕްޝަންގެ ދައުވާ ކޯޓުގައި އުފުލަން ޕީޖީއަށް ފޮނުވި ނަމަވެސް ބައެއް ލިޔުންތައް ފުރިހަަމަ ކުރުމަށް އޭސީސީގައި ޕީޖީން ވަނީ ދަންނަވައިފަ އެވެ. އެހެންނަމަވެސް މައްސަލަ އަނބުރާ ފޮނުވައިނުލާ ކަަމަށް ޕީޖީން ބުންޏެވެ. މިއަދު ޝަމީމް ވިދާޅުވީ ކަންކަން ފުރިހަމަ ވުމުން ދައުވާ ކުރުމާއިމެދު ގޮތެއް ނިންމަވާނެ ކަމަށެވެ.
މަހުލޫފުގެ މައްސަލަ ތަހުގީގު ކުރީ ޕީޖީ އޮފީހާއި ފުލުހުންގެ އިތުރުން އޭސީސީ އާއި އެސެޓް ރިކަވަރީ ކޮމިޝަނުން ގުޅިގެން ހިންގާ ތަހުގީގެކެވެ. އެހެންނަމަވެސް ޕީޖީއަށް ދައުވާ ކުރަން ފޮނުވުމުން ފުރިހަމަ ކުރަން އޭސީސީގައި އެދުނު ސަބަބާއި ގުޅޭގޮތުން ޝަމީމް ވިދާޅުވީ ތަހުގީގުގައި ޕީޖީގެ ދައުރަކީ ލަފާ އެރުވުމާއި އިތުރަށް ބަލަންޖެހޭ ކަންކަން ސާފުކޮށްދިނުމެވެ.
ޝަމީމް ވިދާޅުވީ ވަކި މީހަކަށް ވީތީ ދައުވާ ކުރަން ނުވަތަ ނުކުރަން ނިންމާފައި ނޯންނާނެ ކަމަށވެެ. އެގޮތުން މީގެ ކުރިން ވާނީ މި ސަރުކާރުގެ ސްޓޭޓް މިނިސްޓަރުންގެ މައްޗަށްވެސް ދައުވާ ކޮށްފައި ކަމަށެވެ. އަދި ކުރީގެ ރައީސުންގެ މައްޗަށްވެސް ދައުވާ އުފުލާފައިވާނެ ކަމަށާއި އެކަންކަމުން ލިބޭނެ ގެއްލުމެއް ނޯންނާނެ ކަމަށް ޝަމީމް ވިދާޅުވި އެވެ.
ބައެއް ބޭފުޅުން ވިދާޅުވަނީ އަޅުގަނޑު ބިރުގަންނަނީއޭ. ކޮން ކަމަކާތޯ ބިރުގަންނަނީ،
- ޕީޖީ ހުސައިން ޝަމީމް
މަހުލޫފުގެ މައްޗަށް ދައުވާ ކުރަން ފޮނުވީ ކުރިން އޭނާ މަޖިލިސް މެމްބަރެއްގެ ގޮތުގައި ހުންނެވިއިރު ރިޝްވަތުގެ ގޮތުގައި 33،000 ޑޮލަރު ނެންގެވިކަމަށް ތުހުމަތު ކުރެވިގެންނެވެ. އޭސީސީން ބުނީ އެސްއޯއެފްގެ އެކައުންޓުން މަހުލޫފުގެ އެކައުންޓަށް ޖަމާކޮށްދިން ފައިސާއަކީ އޭރު ފާސްކުރި އެސްއީޒެޑު ބިލަށް ވޯޓު ދިނުމަށާއި ޕީޕީއެމްގައި ބެހެއްޓުމަށް ދިން ފައިސާކަން އެނގެން އޮތްކަމަށެވެ.
މިތުހުމަތުތައް ދޮގުކުރައްވަމުން މަހުލޫފު ވިދާޅުވީ އެސްއީޒެޑް ބިލަން ވޯޓު ދިނީ އޭރު ޕީޕީއެމްގައި ހުންނެވުމުން ނެރުނު ތްރީލައިން ވިޕާއި އެއްގޮތަށް ކަމަށެވެ. އަދި 33،000 ޑޮލަރަކީ ޑޮލަރު ގަނެ ވިއްކުމުގެ މުއާމަލާތަށް ހޯދި ފައިސާކަމަށްވެސް މަހުލޫފު ވަނީ ވިދާޅުވެފަ އެވެ.
