މިހާޜަކަށް އައިސް ރާއްޖޭގައި ވެސް އިންޓަރނެޓް މެދުވެރިކޮށް ހިންގަމުންދާ ކުށްތައް ގިނަވަމުންދާތީ ސްކޫލް ދަރިވަރުންނާއި އާންމު ރައްޔިތުން ހޭލުންތެރިކުރުމުގެ މަސައްކަތް ފުލުހުން ފަށައިފިއެވެ.
ފުލުހުން ބުނީ، ކުށްމަދު އަމާން އަދި ހޭލުންތެރި ބަޔަކު ދިރިއުޅޭ އަތޮޅަކަށް އދ. އަތޮޅު ހެދުމަށް ފުލުހުން ކުރަމުންދާ މަސައްކަތްތަކުގެ ތެރެއިން، އިންޓަނެޓު މެދުވެރިކޮށް ހިންގާ ކުށްތަކުން ރައްކާތެރިކުރުވުމަށް މައުލޫމާތު ދިނުމުގެ ޕްރޮގްރާމެއް ފަށާފައިވާ ކަމަށެވެ. އެގޮތުން އދ. އަތޮޅު ފުލުހުންނާއި ސައިބަރ ސެންޓަރު ގުޅިގެން، މަހިބަދޫ، މާމިގިލި، ދަނގެތި، ދިގުރަށް ، އޮމަދޫ އަދި ފެންފުށީގައި މި ޕްރޮގްރާމް ކުރިއަށް ގެންދާން ވަނީ ނިންމާފައެވެ.
ޖޫން 2 އިން 7 އަށް ކުރިއަށް ގެންދާ މި ޕްރޮގްރާމުގައި، އިންޓަނެޓް މެދުވެރިކޮށް ހިންގާ ކުށްތަކާއި އެފަދަ ކުށްތަކުން ރައްކާތެރިވާނެ ގޮތުގެ މައުލޫމާތުދޭނެއެވެ. އަދި އިންޓަނެޓު މެދުވެރިކޮށް ގަނާކުރުމާއި އެކަމުގެ ޝިކާރައަށްވާ މީހުންނަށް އެކަމުގެ ސަބަބުން ކުރިމަތިވާނެ ގެއްލުންތަކާ ގުޅޭގޮތުން މައުލޫމާތުދޭނެ ކަމަށް ފުލުހުން ވަނީ ބުނެފަ އެވެ. އަދި އެފަދަ ކަންކަމުން ރައްކާތެރިވުމަށް އެޅިދާނެ ފިޔަވަޅުތަކާ ގުޅޭގޮތުން ވެސް މައުލޫމާތު ހިއްސާކުރާނެ ކަމަށް ބުންޏެވެ.
އޭގެ އިތުރުން، މަކަރާއި ހީލަތުން ފައިސާ ހޯދުމަށް އަންނަ ފޯނު ކޯލުތަކުން ރައްކާތެރިވުމަަށާއި އެކަންކަމުން ރައްކާތެރިވެތިބުމަށް ކުރެވިދާނެ ކަންކަމާ ގުޅޭގޮތުން މައުލޫމާތުދިނުމަށް ހަމަޖެހިފައިވެއެވެ. އަދި އޮޅުވާލައިގެން ފައިސާ ހޯދުމުގައި ބޭނުންކުރަމުންގެންދާ އެންމެ ފަހުގެ އުކުޅުތަކާއި އެފަދަ ކަންކަމުން ރައްކާތެރިވާނެ ގޮތްތަކުގެ މައުލޫމާތު ހިއްސާކުރާނެއެވެ.
ސްކޫލުތަކުގެ ދަރިވަރުންނާއި ބެލެނިވެރިންނާއި ރަށުގެ ރައްޔިތުންގެ އިތުރުން މުއައްސަސާތަކުގެ މުވައްޒަފުންނަށް ކުރިއަށް ގެންދާ މި ޕްރޮގްރާމްގައި މައުލޫމާތުދެއްވަނީ ސައިބަރ ސެންޓަރުގެ މުވައްޒަފުންނެވެ.
