މޯލްޑިވްސް މީޑިއާ ކައުންސިލް (އެމްއެމްސީ)ގެ މެންބަރުންނާއި ނޫސްވެރިން ތަމްރީނު ދަތުރެއްގައި ޕާކިސްތާނަށް މިއަދު ފުރައިފިއެވެ.
އެމްއެމްސީން ބުނީ މި ތަމްރީނު ދަތުރަކީ ދިވެހި ނޫސްވެރިން ތަމްރީނު ކުރުމަށް އެ ކައުންސިލުން ކުރަމުންދާ މަސައްކަތްތަކުގެ ތެރެއިން، ޕާކިސްތާނު އެމްބަސީއާއެކު ވެފައިވާ މަޝްވަރާތަކުގެ ދަށުން، އެ ގައުމުން ދީފައިވާ ފުރުސަތެއް ކަމަށެވެ.
މި ތަމްރީނު ދަތުރު ކުރިޔަށްދާނީ މިއަދުން ފެށިގެން އަންނަ ހޯމަދުވަހުގެ ނިޔަލަށް ކަމަށް އެމްއެމްސީން ބުނެއެވެ.
މި ތަމްރީނު ޕްރޮގްރާމް ކުރިޔަށް ގެންދިއުށް ހަމަޖެހިފައިވަނީ ޕާކިސްތާނުގެ ވެރިރަށް، އިސްލާމްއާބާދުގައި ހުންނަ "އިންފޮމޭޝަން ސާވިސް އެކެޑަމީ"ގައެވެ.
މި ޕްރޮގްރާމްގައި ބައިވެރިވި ބޭފުޅުންގެ ތެރޭގައި އެމްއެމްސީގެ ރައީސް އަޙުމަދު މުސްތަފާގެ އިތުރުން، އެ ކައުންސިލްގައި މީޑިއާ ތަމްސީލުކުރައްވާ މެންބަރުން ކަމުގައިވާ މޫސާ ރަޝީދު، މުޙައްމަދު ސިމާއު އަދި މުޙައްމަދު އަފްރާހު ހިމެނެއެވެ.
އަދި މީޑިއާތަކަށް ހުޅުވާލި ފުރުސަތުގައި ނޮމިނޭޓުވެފައިވާ ނޫސްވެރިޔާ، އިބްރާހީމް ސަނީހު ވެސް މި ދަތުރުފުގައި ބައިވެރިވެއެވެ.
އެމްއެމްސީން ބުނީ މި ދަތުރުފުގައި ތަމްރީނުތަކުގެ އިތުރުން، ޕާކިސްތާނުގެ މިނިސްޓްރީ އޮފް އިންފޮމޭޝަން އެންޑް ބްރޯޑްކާސްޓިންގެ އިސްވެރިންނާ ބައްދަލުކުރުމާއި، މީޑިއާއާ ގުޅުންހުރި މުހިންމު ތަންތަނަށް ޒިޔާރަތްކުރުން ވެސް އޮންނާނެ ކަމަށެވެ.
ޕާކިސްތާނަށް ދިވެހި ނޫސްވެރިން ފޮނުވައިގެން ތަމްރީނު ޕްރޮގްރާމްތަކެއް ހިންގުމަަށާއި، އެ ގައުމުގެ ތައުލީމީ ޚިދުމަތްދޭ މަރުކަޒުތަކުގެ މާހިރުން ރާއްޖެ ގެނެސްގެން، ތަމްރީނު ޕްރޮގްރާމްތަކެއް ފެށުމަށް އެމްއެމްސީންވަނީ މަޝްވަރާކޮށްފައެވެ.
އެ ގޮތުން ކުރު މުއްދަތާއި ދިގު މުއްދަތުގެ ސްކޮލާޝިޕް ޕްރޮގްރާމްތަކެއް ނޫސްވެރިންނަށް ހޯދައިދިނުމާ ގުޅޭގޮތުން ރާއްޖޭގައި ހުންނަވާ ޕާކިސްތާނުގެ އެމްބެސަޑަރު ވައިސް އެޑްމިރަލް (ރިޓަޔާޑް)މުޙައްމަދު ފައްޔާޒު ގިލާނީއާ އެކު އެމްއެމްސީން މި ކަމުގެ މަޝްވަރާކޮށްފައިވަނީ 12 މެއި 2024ގައެވެ.
އަދި އެމްއެމްސީއާއި ޕާކިސްތާނުގެ މިނިސްޓްރީ އޮފް އިންފޮމޭޝަން އެންޑް ބްރޯޑްކާސްޓިންއާ ދެމެދު މިހާރު ކުރިޔަށްދާ ދަތުރުގެ ތެރެއިން ފަހުމުނާމާއެއްގައި ސޮއިކުރުމަށް މަޝްވަރާ ކުރުމަށް ހަމަޖެހިފައިވާކަމަށް ވެސް އެމްއެމްސީން ބުނެއެވެ.
