ދިވެހި ރާއްޖެއާއި އެމެރިކާ އަސްކަރިއްޔާ ގުޅިގެން އަސްކަރީ ތަމްރީނުތަކެއް ފަށައިފި އެވެ.
“އެކްސަސައިޒް ބެލެންސް ފްލޭޝް މެޓަލް” ގެ ނަމުގައި އިއްޔެ ފެށީ މި ތަމްރީނަކީ އެމްއެންޑީއެފްގެ ގާބިލުކަން އިތުރުކުރުމުގެ ގޮތުން، އެމެރިކާ އަސްކަރިއްޔާއާ ގުޅިގެން ސިލްސިލާކޮށް ބާއްވަމުންދާ ތަމްރީނުތަކުގެ ތެރެއިން ކުރިއަށްގެންދާ ތަމްރީނެއްކަމަށް މޯލްޑިވްސް ޑިފެންސް ފޯރސަސް(އެމްއެންޑީއެފް)އިން ބުނެފައި ވެއެވެ.
އެމްްއެންޑީއެފް ސެންޓްރަލް އޭރިއާ ކޮމާންޑްގައި މި އެކްސަސައިޒް ޖުލައި 19 ވަނަ ދުވަހުގެ ނިޔަލަށް ކުރިޔަށް ދާނެކަމަށާއި، އެކްސަސަައިޒްގެ ހަރަކާތްތައް ލ .އަތޮޅުގެ އެއްގަމާއި ކަނޑުގެ ސަރަހައްދުތަކުގައި ކުރިޔަށް ގެންދަން ހަމަޖެހިފައިވާކަމަށް އެމްއެންޑީއެފްއިން ބުނެފައި ވެއެވެ. މި ތަމްރީނުތަކުގައި، އެމްއެންޑީއެފް ކޯސްޓްގާޑުގެ ސިފައިންނާއި، އެމްއެންޑީއެފް ސްޕެޝަލް ފޯސަސްގެ މެންބަރުންނާއި، މެރިންސް ބައިވެރިވެއެވެ. އަދި އެކްސަސައިޒްގެ މުދައްރިބުންގެ ގޮތުގައި، އެމެރިކާ އަސްކަރިއްޔާގެ ސިފައިން ދަނީ ހަރަކާތްތެރިވަމުން އަންނަކަށްވެސް އެމްއެންޑީއެފް އިން ބުނެފައި ވެއެވެ.
މި އެކްސަސައިޒް ފެށުމުގެ ގޮތުން އެމްއެންޑީއެފް ސެންޓްރަލް އޭރިއާ ކޮމާންޑް ހެޑްކުއޯޓަރޒް، ލ.ކައްދޫގައި އިއްޔެ ވަނީ ޚާއްސަ ރައްމިއްޔާތެއް ބާއްވާފަ އެވެ. އެ ރަސްމިއްޔާތު ޝަރަފުވެރިކޮށްދެއްވީ، އެމްއެންޑީއެފް ސެންޓްރަލް އޭރިއާ ކޮމާންޑުގެ ޑެޕިއުޓީ ކޮމާންޑަރ، ލެފްޓިނެންޓް ކާނަލް މުޙައްމަދު އިފާޒް އެވެ.
