މާފަންނު މަދަރުސާގެ ފަހަތުގައި އޮންނަ މަގުގެ ނަމަކަށް "ފަލަސްތީނު ހިނގުން"

މާފަންނު މަދަރުސާގެ ފުރަގަހުންން، ކަނބާއައިސާ ރަނި ހިނގުމުން ބޮޑުތަކުރުފާނު މަގަށް ނުކުމެވެން އޮންނަ ހަނި މަގަށް "ފަލަސްތީނު ހިނގުން" ކިޔުމަށް ނިންމީ މިއަދު ބޭއްވި މާލޭ ސިޓީ ކައުންސިލުގެ ޢާއްމު ބައްދަލުވުމުގައި ބައިވެރިވެލެއްވި ހުރިހާ ކައުންސިލް މެންބަރުންގެ އިއްތިފާޤުންނެވެ.

ފަލަސްތީނާއި ގުޅުވައިގެން މާލޭގެ މަގަކަށް ނަން ދިނުމަށް ސިޓީ ކައުންސިލަށް ހުށަހެޅުއްވީ މޭޔަރު އާދަމް އާޒިމްއެވެ.

މާލޭ ސިޓީ ކައުންސިލުން މިހާރު ގެންދަނީ އެ މަގުގެ ދުވާރުތައް ހެދުމުގެ މަސައްކަތް ކުރަމުންނެވެ. ސިޓީ ކައުންސިލުން މަޢުލޫމާތުދެއްވާ ގޮތުގައި މި މަގު ޑިޒައިން ކުރާނީ ފަލަސްތީނުގެ ތާރީހާ ގުޅޭ މައުލޫމާތު ފެންނަ ގޮތަށް ކަމަށާއި ފަލަސްތީނު ރައްޔިތުންގެ ޖިހާދާއި ބެހޭ ވާހަކަތައް ފެންނަ ގޮތަށް ކަމަށެވެ.

"ފަލަސްތީނު ހިނގުން" ރަސްމީކޮށް ހުޅުވާލާނީ މި މަގު ހަދައި ނިމުމުން އެކަމަށް ޚާއްސަކޮށް ބާއްވާ ރަސްމިއްޔާތެއްގައެވެ.