ފަލަސްތީނު މައްސަލާގައި ބައިނަލްއަގުވާމީ ޖިނާއީ ކޯޓުން ނެއްރުއްވި އިސްތިޝާރީ ލަފައަށް ރައީސް މަރުހަބާ ވިދާޅުވެއްޖެއެވެ.
ރައީސް މުއިއްޒު ކުރެއްވި އެކްސް ޕޯސްޓުގައި ވިދާޅުވީ ބައިނަލްއަގުވާމީ ޖިނާއީ ކޯޓުން ނެރުއްވި އެޑްވައިޒަރީ އޮޕީނިއަން (އިސްތިޝާރީ ލަފާ)އަށް މަރުހަބާ ދަންނަވާ ކަަމަށެވެ.
ރައީސް މުއިއްޒުގެ އެކްސް ޕޯސްޓުގައި ވިދާޅުވެފައިވަނީ، ފަލަސްޠީނުގެ އިރުމަތީ ގުދުސް ހިމެނޭގޮތަށް ފަލަސްޠީނުގެ ސަރަޙައްދުގައި އިސްރާއީލުން ގެންގުޅޭ ސިޔާސަތުތަކާއި ޢަމަލުތަކުގެ ސަބަބުން އުފެދޭ ޤާނޫނީ ނަތީޖާތަކާ ބެހޭގޮތުން މިއަދު ކޯޓުން ނެރުއްވި ލަފާއިން، ފަލަސްޠީނުގެ ބިންތަކުގައި ޤަވާއިދާ ޚިލާފަށް އިސްރާއީލުން ތިބުމަކީ ބައިނަލްއަޤްވާމީ އިންސާނީ ޤާނޫނާ ޚިލާފު ކަމެއްކަމަށް ޤަބޫލުކޮށް، ފަލަސްޠީނުގެ ރައްޔިތުންގެ އުންމީދުތައް ހަގީގަތަކަށް ހެދުމަށް ހިއްވަރު ލިބިދޭ ކަމުގައެވެ.
އަދި އިސްރާއީލުން ގެންގުޅެމުން އަންނަ ޣައިރު ގާނޫނީ ވަޒަންވެރިކަމުގެ ސިޔާސަތުތައް ވަގުތުން ނިމުމަކަށް ގެނައުމަށާއި، އެސިޔާސަތުތަކުގެ ސަބަބުން ލިބޭ ގެއްލުމުގެ ބަދަލު ހޯދައިދިނުމަށް ގޮވާލާކަމަށްވެސް ރައީސް މުއިއްޒުގެ އެކްސް ޕޯސްޓުގައި ވިދާޅުވެފައި ވެއެވެ.
މި ޤަރާރާއެކު، 1967 ވަނަ އަހަރުގެ ކުރިން އޮތް ބޯޑަރުތަކާ އެއްގޮތްވާ ގޮތުގެ، އިރުމަތީ ގުދުސް އަކީ ފަލަސްތީނުގެ ވެރިރަށުގެ ގޮތުގައި ހިމެނޭ، ފަލަސްތީނުގެ މިނިވަން ދައުލަތެއްގެ އުއްމީދު އާވެގެން ގޮސްފައިވާކަމަށްވެސް ރައީސްގެ އެކްސް ޕޯސްޓުގައި ވިދާޅުވެފައި ވެއެވެ.
ޔޫއެންގެ އާންމު މަޖިލީހުގެ އެދުމުގެ މަތިން، ބައިނަލް އަގުވާމީ ޖިނާއީ ކޯޓުން މިއަދުވަނީ ފަލަސްތީނު އިސްރާއީލު މައްސަލައާއި ގުޅޭގޮތުން އިސްތިޝާރީ ލަފައެއް އަރުވާފައެވެ. މިލަފާގައިވަނީ، އިސްރާއީލުން ފަލަސްތީނުގެ ބިންތަކަށް ވެރިވެގަނެގެން އުޅެނީ ބައިނަލްއަގުވާމީ ގާނޫނުތަކާއި ޚިލާފަށްކަމަށް ނިންމާފައެވެ.
އަދި އެބިންތަކުން ވީހާ އަވަހަކަށް އިސްރާއީލުން ފޭބުމަށްވެސް މި ލަފާގައި ގޮވާލާފައި ވެއެވެ.
