ކޮރަޕްޝަންގެ މައްސަލަތަކުގައި ހިމެނޭ ސަރުކާރު ކުންފުނިތަކުގެ މުވައްޒިފުން ވަކިކުރެވޭ ގޮތަށް ކުންފުނިތަކުގެ ހިއުމަން ރިސޯސް އޮނިގަނޑަށް ބަދަލު ގެންނަން ސަރުކާރަށް ހުށަހަޅަން ރައްޔިތުންގެ މަޖިލީހުގެ މާލިއްޔަތު ކޮމިޓީން މިއަދު ނިންމައިފި އެވެ.
މި އިސްލާހު މަޖިލިސް ތަޅުމަށް ފޮނުވައިގެން, ސަރުކާރަށް ލަފާދޭން ހުށަހެޅި ހުށަހެޅުއްވުމަށް ތާއީދު ކުރެއްވީ, ހަނިމާދޫ ދާއިރާގެ މެންބަރު އަބްދުލް ޣަފޫރު މޫސާ އެވެ.
މިއަދު ކުރިއަށް ދިޔަ މާލިއްޔަތު ކޮމިޓީގައި މަޖިލީހުގެ ނައިބު ރައީސް, ދިއްގަރު ދާއިރާގެ މެންބަރު އަހްމަދު ނާޒިމް ހުށަހެޅުއްވީ ސަރުކާރުގެ ކުންފުނިތަކުގައި ކޮރަޕްޝަންގެ އަމަލުތައް ހިންގާ ކަމަށް އޭސީސީއަށް 'ފްލެގްވާ' ފަރާތްތައް ވަޒީފާއިން އެކަހެރި ކުރުމަށް ކުންފުނިތަކުގެ އޮނިގަނޑު ބަދަލު ކުރުމަށެވެ.
"އޭސީސީން ކޮރަޕްޝަން ހިމެނޭ ކަމަށް ފާހަގަކޮށްފައިވާ މިގޮތަށް ފޮނުވާ ރިކޮމެންޑޭޝަންތަކުގައި ޝާމިލްވާ މުވައްޒިފުން ކުންފުނީގެ ވަޒީފާއިން އެކަހެރި ކުރެވޭނެ ގޮތަކަށް ކުންފުނީގެ އެޗްއާރު ޕޮލިސީ ބަދަލުކުރަން އެބަޖެހޭ, މަޖިލީހުން ފާސްކޮށްފައި ލަފައެއް ދޭން ސަރުކާރަށް" ނާޒިމް ވިދާޅުވި އެވެ.
އޭނާ ވިދާޅުވީ, ސަރުކާރުގެ ކުންފުންޏަކުން މިހާރު ވެސް 7 މިލިޔަން ޑޮލަރުގެ ކޮރަޕްޝަންގެ މައްސަލައެއް ފެންމަތިވެފައިވާ ކަމަށާއި, އެފަދަ ކަންކަމަކީ ހަމައެކަނި ވަކި ފަރުދަކަަށް ކުރެވޭނެ ވަރުގެ ކަންކަން ނޫން ކަމެވެ.
