ލ. ގަމުގައި މަސްތުވާތަކެއްޗާއި ބަނގުރަލުގެ ވިޔަފާރިކުރަމުންދިޔަ ދެ މީހަކު ފުލުހުންގެ ބެލުމުގެ ދަށަށް ގެންގޮސްފިއެވެ.
ފުލުހުންގެ ތަރުޖަމާނު މަޢުލޫމާތު ދީފައިވާ ގޮތުގައި، އިއްޔެ ލ. ގަމު ތުނޑި ވިލެޖްގައި ހުންނަ ގެއެއްގައި މަސްތުވާތަކެތި އަދި ބަނގުރަލުގެ ވިޔަފާރިކުރާކަމުގެ މަޢުލޫމާތު ފުލުހުންގެ އިންޓެލިޖެންސަށް ލިބުމާ ގުޅިގެން، ކޯޓު އަމުރެއްގެ ދަށުން އެ ގެ ބަލައި ފާސްކުރެވުނެވެ.
މި އޮޕަރޭޝަންގައި 24.42 ގްރާމްގެ ހެރޮއިންކަމަށް ޝައްކުކުރެވޭ އެއްޗަކާއި، ބަނގަރާކަމަށް ބެލެވޭ 2 ރުނބާ، 5 ލީޓަރުގެ ފުޅިއެއް އަދި ބަނގުރާ ކައްކަން ބޭނުންކުރާ ސާމާނު ފެނުނުކަމަށް ފުލުހުން ބުނެފައިވެއެވެ.
މި މައްސަލައާ ގުޅިގެން 42 އަހަރާއި 57 އަހަރުގެ ދެ ދިވެއްސަކު ހައްޔަރުކޮށްފައިވާކަމަށް ފުލުހުން މަޢުލޫމާތު ދީފައިވެއެވެ. އަދި މި މައްސަލައިގެ ތަޙުޤީޤު ދަނީ ކުރިއަށް ކަމަށްވެސް ފުލުހުން ވަނީ ހާމަކޮށްފައެވެ.
