ރާއްޖޭގެ އިޤްތިސާދު ވެއްޓިފައި މިވާ ދަނޑިވަޅުގައި ހުރިހާ ސިޔާސީ ލީޑަރުންގެ ޒިންމާ ވަރަށް ބޮޑު ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު އެކްސްގައި ވިދާޅުވެފައިވަނީ ރާއްޖޭގެ މާލީ ހާލަތު މިހިސާބަށް ދަށަށް ދިޔަ ގޮތް ރައްޔިތުންނަށް ކިޔައިދޭން ޖެހޭނެ ކަމަށާއި މި ހާލަތުން އަރައިގަތުމަށް ސަރުކާރުން އަމަލުކުރަން ނިންމާފައިވާ ގޮތް ހާމަކުރަން ޖެހޭނެ ކަމަށެވެ. އަދި މިވަގުތަކީ ސިޔާސީ ހުރިހާ ލީޑަރުންގެ ޒިންމާ ވަރަށް ބޮޑު ވަގުތެއް ކަމަށް ނަޝީދު ވަނީ ވިދާޅުވެފައެވެ.
"މިވަގުތު ހުރިހާ ސިޔާސީ ލީޑަރުންގެ ޒިންމާ ވަރަށް ބޮޑު، މާލީ ހާލަތު މިހިސާބަށް ދިޔަ ގޮތާއި، ދެން ވެދާނެ ކަމަށް ލަފާކުރެވޭ ގޮތާއި އަދި އަރައިގަތުމަށް އަމަލުކުރަން ރާވާފައި އޮތް ގޮތް ސާފު ބަހުން ރައްޔިތުންނަށް ކިޔައިދޭން ޖެހޭނެ." ނަޝީދު ވިދާޅުވިއެވެ.
ބޭރުގެ ދަރަނިތައް ދައްކައި ދައުލަތުގެ އެހެނިހެން ހަރަދުތަކަށް ޑޮލަރު ބޭނުންވާއިރު، ބީއެމްއެލްއަށް ޑޮލަރު ލިބުން ދަތިވުމުގެ ސަބަބުން މިއަދު ބޭންކުން ވަނީ ކާޑުން ބޭނުންކުރެވޭ ޑޮލަރުގެ ލިމިޓު ދަށްކޮށް، ދިވެހި ރުފިޔާ ކާޑުން ޑޮލަރުގެ މުއާމަލާތް ނުކުރެވޭ ގޮތަށް ސިޔާސަތު ބަދަލުކޮށްފައެވެ.
