މާލޭގައި ހުންނަ އީދު މިސްކިތުން ރޭ ވައްކަން ކުރި މައްސަލައެއް ފުލުހުން ބަލަން ފަށައިފި އެވެ.
މީޑީއާތަކަށް މިއަދު ފޮނުވި މެސެޖެއްގައި ފުލުހުން ބުނީ އީދު މިސްކިތުގެ ފަންކާތަކުގެ ނަރުތައް ބުރިކޮށްލައިގެން ވައްކަން ކޮށްފައިވާ މައްސަލައެއްގެ ރިޕޯޓް ރޭ ފުލުހުންނަށް ލިބިފައިވާ ކަމަށެވެ.
އެ މައްސަލާގައި އަދި މިހާތަނަށް މީހަކު ހައްޔަރުކޮށްފައިނުވިޔަސް މައްސަލަ ބަލަމުންދާ ކަމަށް ފުލުހުން ބުންޏެވެ.
ސިޓީ ކައުންސިލުން "އެކްސް'' ގައި ކުރި ޕޯސްޓެއްގައި ބުނީ އީދު މިސްކިތް މަރާމާތަށް ބަންދުކޮށްފައި ވަނިކޮށް ވައްކަން ކޮށްފައިވަނީ ރޭ 6-10 އާއި ދެމެދު ވަގުތެއްގަ އެވެ.
ވަގަށް ނަގާފައިވާ ތަކެތީގެ ތެރޭގައި 13 ބޮކި އަދި 8 ފަންކާގެ ނަރުތައް ހިމެނޭ ކަމަށް ކައުންސިލުން ބުންޏެވެ.
މާލޭ މިސްކިތްތަކުން ވައްކަން ކުރުމުގެ މައްސަލަތައް ގިނަވެފައިވާއިރު ވަގަށް ނަގާ ތަކެތި ވިއްކާލަން އުޅެނިކޮށް އެތަކެތި ފުލުހުން ހޯދަފާއި އެބަހުއްޓެވެ.
