އެކި ގައުމުތަކަށް ޑްރަގް ފޯރުކޮށްދިނުމުގައި އިސްކޮށް އުޅޭ މެލޭޝިއާގެ ދެ މީހަކު ރާއްޖެ އިން ހައްޔަރުކޮށްފި އެވެ
މި މައްސަލާގައި ހައްޔަރުކުރި މެލޭޝިއާގެ ދެ މީހުންނަކީ އެމްޖީ ތަަމްލިޕް ،44، އަދި ކޯރް ހުއާން ބޫން، ،41، އެވެ.
ފުލުހުން ބުނީ އެ ދެ މީހުން އަތުލައިގަތީ، ޖުލައި 27 ވަނަ ދުވަހު އެމިރޭޓްސް ފްލައިޓަކުން ރާއްޖެ އައި މެލޭޝިއާ މީހެއްގެ އަތުން މަސްތުވާތަކެތި ފެނުމުން ކުރިއަށްގެންދިޔަ ތަހުގީގެއްގެ ތެރެއިން ކަމަށެވެ.
އެގޮތުން ކަސްޓަމާއި ފުލުހުން ގުޅިގެން ކުރިއަށްގެންދިޔަ ކޮންޓްރޯލްޑް ޑެލިވަރީ އޮޕަރޭޝަނުގެ ތެރެއިން އެމީހުން މުއާމަލާތް ކުރަމުންދިޔައީ ވީޗެޓް މެދުވެރިކޮށް ހަތް މީހަކު ހިމެނޭ ގުރޫޕެއްގައި ކަމަށާއި އަދި އިތުރު މީހަކު މި މަސްތުވާތަކެތި ބަލައި އަންނާނެކަން ވެސް އެ ގްރޫޕުގައި ކުރެވިފައި ހުރި މުއާމަލާތްތަކުން އެނގުނު ކަމަށް ފުލުހުން ބުންޏެވެ.
ފުލުހުން ބުނީ ތަހުގީގުން މި ދެ މީހުންނަކީ ވެސް ދުނިޔޭގެ އެކި ގައުމުތަކަށް މަސްތުވާތަކެތި ފޯރުކޮށްދިނުމުގައި އިސްކޮށް އުޅޭ ބައެއްކަން އެނގުނު ކަމަށެވެ. އެގޮތުން މި މައްސަލާގައި ހިމެނޭ މަސްތުވާތަކެއްޗަކީ ވެސް އިނގިރޭސިވިލާތަށް ބޭރުކުރަން ރާވާފައިވާ ތަކެތިކަން ފާހަގަކުރެވިފައިވާ ކަމަށް ފުލުހުން ވަނީ ބުނެފަ އެވެ.
މީގެއިތުރުން ފުލުހުން ވަނީ މި މައްސަލަ އިންޓަޕޯލުގެ އެހީއާއެކު ތަހުގީގު ކުރަމުންދާ ކަމަށްވެސް ބުނެފަ އެވެ.
