ގއ. ވިލިނގިލީގައި ހިންގި މަސްތުވާތަކެތީގެ އޮޕަރޭޝަނެއްގައި ތިން މީހަކު ހައްޔަރު ކޮށްފި އެވެ.
މި އޮޕަރޭޝަން ހިންގާފައިވަނީ ފުލުހުންގެ ނާކޮޓިކްސް އިންޓެލިޖެންސަށް ލިބުނު މަޢުލޫމާތަކާ ގުޅިގެން، ވިލިނގިލީ ޕޮލިސް ސްޓޭޝަނާއި އިންޓެލިޖެންސް ގުޅިގެން މި މަހުގެ 28 ވަނަ ދުވަހުއެވެ.
ހައްޔަރުކުރެވުނު މީހުންނަކީ ގއ. ވިލިނގިލި އެތެންސް، 24 އަހަރުގެ މުޙައްމަދު އަތޫފް ޙަބީބާއި، ގއ. ވިލިނގިލި ޒޫމް، 25 އަހަރުގެ މުޙައްމަދު ތަޤިއްޔު، އަދި ގދ. ގައްދޫ ވިލާސް، 23 އަހަރުގެ މުޙައްމަދު ޒަހުވާނެވެ. މި އޮޕަރޭޝަނުގައި އެކަކު ދިރިއުޅޭ ގެއެއް ބަލައި ފާސްކުރިއިރު، މަސްތުވާތަކެތި ކަމަށް ބެލެވޭ އެއްޗެއް ހުރި ހަތް ރަބަރު ޕެކެޓާއި، ހަތަރު ރަބަރުކޮޅާއި، ސެލޯފިން ކޮޅެއްގެ އިތުރުން ބަނގުރާ ކަމަށް ބެލެވޭ އެއްޗެއް ހުރި 20 ލީޓަރުގެ ހަމެއް ފެނިފައިވާ ކަމަށް ފުލުހުން ބުންޏެވެ.
މި މައްސަލައާ ގުޅިގެން ތިން މީހުންގެ ބަންދާމެދު ގޮތެއް ނިންމުމަށް ވިލިނގިލީ މެޖިސްޓްރޭޓް ކޯޓަށް ހާޒިރުކުރުމުން، މުޙައްމަދު އަތޫފް ޙަބީބް 15 ދުވަހަށް، އަދި މުޙައްމަދު ތަޤިއްޔުއާއި މުޙައްމަދު ޒަހުވާން 10 ދުވަހަށް ބަންދުކުރުމަށް ވަނީ އަމުރުކޮށްފައެވެ. މި މައްސަލަ ދަނީ ވިލިނގިލީ ޕޮލިސް ސްޓޭޝަނުން އިތުރަށް ތަހުގީގުކުރަމުންނެވެ. މި އޮޕަރޭޝަނަކީ ވިލިނގިލީގައި މަސްތުވާތަކެތި ވިއްކައި ވިޔަފާރިކުރާ ކަމަށް ލިބުނު މަޢުލޫމާތަކާ ގުޅިގެން ހިންގުނު އޮޕަރޭޝަނެއް ކަމަށް ފުލުހުން ބުންޏެވެ.
