"ބިންވެރިޔާ" އާއި "ގެދޮރުވެރިޔާ" ސްކީމަށް އެދި ފޯމު ބަލައިގަތުމުގަ އާއި ގޯއްޗާއި، ފްލެޓް ލިބޭ ފަރާތްތައް ކަނޑައެޅުމުގައި އަދި ގޯއްޗާއި ފްލެޓް ދޫކުރުމުގައި، ކަނޑައެޅިފައިވާ އުޞޫލުތަކާ ޚިލާފަށް ޢަމަލުކޮށްފައިވާތީ އެ ދެ ސްކީމާ ގުޅޭ އަވަސް ތަހުގީގެއް އޭސީސީން ފަށައިފި އެވެ.
އޭސީސީން ބުނީ ބިންވެރިޔާ އަދި ގެދޮރުވެރިޔާ ސްކީމާގުޅޭ ޖިނާއީ ތަޙުޤީޤެއް ހިންގުމަށް ދިވެހި ފުލުހުންގެ ޚިދުމަތަށާއި އެންޓި ކޮރަޕްޝަން ކޮމިޝަނުގެ މައްޗަށް ޕްރޮސިކިއުޓާ ޖެނެރަލް ކުރެއްވި އަމުރާ ގުޅިގެން، ފުލުހުންނާއެކު މަޝްވަރާކޮށް، އަވަސް ތަޙުޤީޤެއް ކުރަމުންދާ ކަމަށެވެ.
ޕީޖީ އޮފީހުން ބުނީ، މިއީ ޢާންމު މަސްލަޙަތު މަތީ މިންވަރަކަށް އެކުލެވޭ ކަމަކަށްވާތީ މިކަމަކީ ފުރިހަމަ ޖިނާއީ ތަޙުޤީޤެއް ހިންގަން ޖެހޭ ކަމެއް ކަމަށް ޕީޖީ ދެކެވަޑައިގަންނަވާ ކަމަށެވެ.
އެހެންވެ ޤާނޫނުއަސާސީގެ 223 ވަނަ މާއްދާގެ ޅ) ގެ ދަށުން ޕީޖީ އަށް ލިބިދޭ ބާރުގެ ދަށުން، "ބިންވެރިޔާ" އާއި "ގެދޮރުވެރިޔާ" ސްކީމްގެ ފޯމު ބަލައިގަތުމާއި، ފްލެޓާއި ގޯތި ލިބޭ ފަރާތްތައް ކަނޑައެޅުމާއި، ގޯއްޗާއި ފްލެޓް ދޫކުރުމުގައި ޢަމަލުކޮށްފައިވާ ގޮތުގެ ތަޙުޤީޤެއް ހިންގުމަށް ފަހު، އެކަމުގައި އެއްވެސް މީހެއްގެ މައްޗަށް ޖިނާއީ ތުހުމަތެއް ކުރެވޭ ނަމަ، އެކަން ތަޙުޤީޤުކުރުމަށް ފަހު ދަޢުވާކުރުމަށްޓަކައި ޕީޖީ އޮފީހަށް ހުށަހެޅުމަށް، ފުލުހުންނާއި އޭސީސީ އަށް ވަނީ އަންހާފަ އެވެ.
ޕީޖީން ބުނީ މި މައްސަލައިގެ ތަހުގީގު ހިނގަމުންދާ ގޮތް، ކޮންމެ ހަފުތާއަކު އެއްފަހަރު ޕީޖީއާ ޙިއްޞާކުރަމުން ގެންދިއުމަށާއި، މައްސަލައިގެ އަވަސް ތަހުގީގެއް ހިންގަން ޕީޖީ އަމުރުކުރައްވާފައިވާ ކަމަށެވެ.
