މި މަހުގެ 12 ވަނަ ދުވަހު މާލޭގަިއ ހިނގި އަލިފާނުގެ ބޮޑު ހާދިސާގެ ތަހުގީގުގައި އިންޑިއާގެ ތަޖުރިބާކާރުންގެ ޓީމަކުން ހަރަކާތްތެރިވާން ފަށައިފި އެވެ.
ކޮމިޝަނާ އޮފް ޕޮލިސް އަލީ ޝުޖާއު މިއަދު މީޑިއާތަކާއި ހިއްސާކުރެއްވި މެސެޖެއްގައި ވިދާޅުވީ މި މަހުގެ 12 ވަނަ ދުވަހު މ. ގްރީން ބިލްޑިންގައި ހިނގި އަލިފާނުގެ ހާދިސާއާ ގުޅިގެން ކުރެވެމުންދާ ތަހުގީގުގައި، އިންޑިއާގެ ތަޖުރިބާކާރުންގެ ހާއްސަ ޓީމެއް މިހާރު އަންނަނީ ފުލުހުންނާއެކު ހަރަކާތްތެރިވަމުން ކަމަށެވެ.
އަލިފާނުގެ ހާދިސާގައި ހައުސިން މިނިސްޓްރީ އާއި އިންފްރާސްޓްރަކްޗާ މިނިސްޓްރީ ހިންގަމުންދިޔަ އިމާރާތް ވަނީ އެއްކޮށް އަނދައިގެން ގޮސްފަ އެވެ. އަދި، އެ އިމާރާތާ އިންވެގެން ހުރި އެންވަޔަރަމެންޓް މިނިސްޓްރީގެ ވެސް ބޮޑުބައެއް ވަނީ ބޭނުން ނުކުރެވޭ ވަރަށް އަނދައިގެން ގޮސްފަ އެވެ.
ގެއްލުންވި މިނިސްޓްރީތަކުގެ މަސައްކަތްތައް މިހާރު ވަނީ ދަރުބާރުގޭގައި ފަށައިފަ އެވެ.
އަލިފާނުގެ ހާދިސާ ހިނގި ގޮތް މިހާތަނަށް އެނގިފައި ނުވާއިރު، އަލިފާނުގެ ހާދިސާ ހިނގި ސަރަހައްދުގެ ވަށައިގެން ހުރި ސީސީޓީވީ ފުޓޭޖްތައް ހޯދާފައިވާއިރު މި ހާދިސާގެ މަންޒަރުތައް އެންމެ ފުރަތަމަ ދުށް ފަރާތްތަކުގެ ބަޔާންތައް ވެސް ނެގުމުގެ މަސައްކަތް ފުލުހުން އަންނަނީ ކުރަމުންނެވެ.
މީގެއިތުރުން މި ހާދިސާގެ މައުލޫމާތު އެނގޭ ފަރާތްތަކަށް އެ މައުލޫމާތު ފަސޭހައިން ހިއްސާކުރެވޭނެ އިންތިޒާމެއް ވެސް މިހާރު ވަނީ ހަމަޖައްސާފަ އެވެ.
