މާލޭގެ މަޖީދީ މަގުގައި މީހަކު ހައްޔަރުކުރާ މަންޒަރުގެ ފޮޓޯ ނެގި ނޫސްވެރިއެއްގެ ފޯނުން ފުލުހުން އެ ފޮޓޯ ޑިލީޓް ކުރުވި މައްސަލައެއް ފުލުހުން ބަލަން ފަށައިފިއެވެ.
އަސްލު ޓީވީގެ ނޫސްވެރިޔާ ޝާމާ ޝުއައިބު ފޭސްބުކްގައި ކުރި ޕޯސްޓެއްގައި ބުނީ ރޭ 8:26 ހާއިރު މާލޭގެ މަގުމަތީގައި މީހަކު ހައްޔަރު ކޮށްގެން އުޅޭތީ އެ ތަނުގެ ފޮޓޯ ނަގަން ދިޔައީ ޕްރެސް ކާޑު ވެސް ހިފައިގެން ކަމަށެވެ. އެކަމަކު، އެ މަންޒަރުގެ ފޮޓޯ ނެގުމާ އެކު، ފުލުހަކު ވަނީ އެ ފޮޓޯ ފޮހެލަން އަންގާފައި ކަމަށް އޭނާ ބުންޏެވެ.
ފުލުހުންގެ ތަރުޖަމާނު އަހުމަދު ޝިފާން ރޭ ވިދާޅުވީ ކުށުގެ ވެށީގައި ފުލުހުން ހަރަކާތްތެރިވަމުންދާއިރު އެ ތަނެއްގައި ފުލުހުން ކުރަމުންދާ މަސައްކަތަކީ އެ ހާލަތުގައި ހުރިހާ އެންމެން ވެސް އެންމެ އިސްކަންދޭން ވާނެ ކަންތައް ކަމަށެވެ. ކޮންމެ ހާލަތެއްގައި ނޫސްވެރިންނަށް ކަނޑައެޅޭ ހިސާބެއްގައި ތިބެ މަންޒަރާއި މައުލޫމާތު ރައްޔިތުންނާ ހަމައަށް ގެނެސް ދެވެން އޮތް އެންމެ ފުޅާ ފުރުސަތެއް ފުލުހުން ވެސް ދޭން ވާނެ ކަމަށް ޝިފާން ވިދާޅުވިއެވެ.
ނޫސްވެރިޔާ ހުށަހެޅީ ފުލުހެއްގެ ނުވަތަ ފުލުހުންތަކެއް އަމަލުކޮށްފައިވާ ގޮތާ ގުޅޭ ޝަކުވާއެއް ކަމަށް ގަބޫލު ކުރެވޭތީ، އެކަން އިތުރަށް ބެލުމަށް ފުލުހުންގެ ޕްރޮފެޝަނަލް ސްޓެންޑާޑްސް ކޮމާންޑާ ހިއްސާ ކުރައްވާނެ ކަމަށް ޝިފާން ވިދާޅުވިއެވެ.
