ރާއްޖޭގެ މެރިޓައިމް ދާއިރާ ފުޅާކޮށް ތަރައްޤީކުރުމުގެ މަސައްކަތުގެ ތެރެއިން، މޯލްޑިވްސް ސްޓޭޓް ޝިޕިންގް (އެމްއެސްއެސް) އިން "ކަލާސީން" ސްކޮލަރޝިޕް ޕްރޮގްރާމްގެ ދަށުން މެރިޓައިމް ދާއިރާއިން ދެ ފުރުސަތެއް ހުޅުވާލައިފިއެވެ.
މެލޭޝިއާގައި ކިޔެވުމަށް ހުޅުވާލާފައިވާ މި ފުރުސަތުތަކުގެ ތެރޭގައި ޑިޕްލޮމާ އިން މެރިން އިންޖިނިއަރިންގ އަދި ޑިޕްލޮމާ އިން ނޯޓިކަލް ސްޓަޑީސްގެ އެއް ފުރުސަތު ހިމެނެއެވެ. މި ކޯސްތަކަށް ކުރިމަތިލާ ފަރާތްތަކުގައި ހުންނަންޖެހޭ ޝަރުތުތަކުގެ ތެރޭގައި އޯލެވެލްގެ ފަސް މާއްދާއިން ފާސްވެފައިވުމާއެކު، ސިއްހީގޮތުން އަދި ލޮލުގެ ފެނުމުގައި އެއްވެސް މައްސަލައެއް ނެތް ފަރާތަކަށްވުން ހިމެނެއެވެ.
އެމްއެސްއެސްއިން މަޢުލޫމާތު ދެއްވިގޮތުގައި މި ސްކޮލަރޝިޕްގެ މުއްދަތަކީ ތިން އަހަރާއި ހަތަރު މަސް ދުވަހެވެ. ކޯސް ފުރިހަމަ ކުރުމަށްފަހު، 18 މަސް ދުވަހުގެ މުއްދަތަށް އެމްއެސްއެސްގައި މަސައްކަތްކުރުން ލާޒިމުވާނެއެވެ. މި ސްކޮލަރޝިޕަށް އެދި ހުށަހެޅުމުގެ ސުންގަޑިއަކީ މި މަހުގެ 21 ވަނަ ދުވަހެވެ.
ޤައުމީ ޝިޕިންގް ކުންފުނި އެމްއެސްއެސް އުފެދުމަށްފަހު، ރާއްޖޭގެ ޝިޕިންގް ދާއިރާ ހަރުދަނާކުރުމަށް ގިނަގުނަ މަސައްކަތްތަކެއް ކުރަމުން ގެންދެއެވެ. މީގެ ތެރޭގައި މެރިޓައިމް ދާއިރާއަށް މީހުން ބިނާކުރުމުގެ އިތުރުން، ކުންފުނީގެ ދަތުރުތައް އިތުރުކޮށް ވިޔަފާރި ފުޅާކުރުމުގެ މަސައްކަތްތައްވެސް ހިމެނެއެވެ.
