މާލެ ސަރަހައްދުގައި ވައި ނުސާފުވެފައިވާތީ ބޭރުގައި އުޅޭއިރު ރައްކާތެރިކަމަށްޓަކައި މާސްކު އެޅުމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އިލްތިމާސްކޮށްފި އެވެ.
އެޗްޕީއޭ އިން ބުނީ ވައި ނުސާފު ދުވަސްތަކުގައި، ފުއްޕާމެއާ ހިތުގެ ބަލިތައް ހުންނަ ފަރާތްތަކުން ބޭރުގައި ގިނަވަގުތު ހޭދަކުރުން ރަނަގަޅު ނޫން ކަމަށާއި، ބޭރަށް ނިކުންނަ ނަމަ މާސްކު އެޅުމަށް އިލްތިމާސްކުރާ ކަމަށެވެ. އަދި ކުޑަކުދިންނާއި ދޮށީ އުމުރުގެ މީހުންނާއި މާބަނޑު މީހުން ވެސް ބޭރުގައި ހޭދަކުރާ ވަގުތު މަދުކުރުމަށް ވަނީ އިލްތިމާސްކޮށްފަ އެވެ.
މީގެއިތުރުން ތުއްތު ކުދިން ބޭރަށް ނުނެރުމަށާއި ގޭގެ ދޮރުތައް ލައްޕާފައި ބެހެއްޓުމަށް އިސްކަންދިނުމަށް އެޗްޕީއޭ އިން އިލްތިމާސްކުރެ އެވެ. އަދި ބޭރުގައި ކުޅިވަރު ކުޅުމާއި ކަސްރަތުކުރުން ފަދަ ކަންކަން މިވަގުތަށް މަޑުޖައްސާލުމަށް ވެސް ވަނީ އިލްތިމާސްކޮށްފަ އެވެ.
ވައި ނުސާފުވުމުގެ ސަބަބުން ހަމަ ލޮލަށް ދުރު ފެންނަ ގޮތާއި ދުރުމިން ވެސް މި ދުވަސްވަރު ވަނީ ވަރަށް ބޮޑަށް ދަށްވެފަ އެވެ.
