ރާއްޖޭގެ ޓޫރިޒަމް ޕްރޮމޯޓްކުރަން ޖަރުމަންގައި ތަފާތު ގޮތަކަށް ހަރަކާތެއް ކުރިއަށް ގެންދަން ނިންމައިފި އެވެ.
އެގޮތުން އެ ގައުމުގައި ބާއްވާ އައިޓީ ފެއާއާ ދިމާކޮށް ޖަރުމަންގެ ޓެކްސީތަކުގައި ރާއްޖެ ސިފަކޮށް ދޭ މަންޒަރާ އެކު "މޯލްޑިވްސް: ސަނީ ސައިޑް އޮފް މޯލްޑިވްސް ލައިފް" ލިޔެގެން ރާއްޖެ ޕްރޮމޯޓް ކުރުމުގެ މަސައްކަތަށް މިހާރު ތައްޔާރުވެފައިވާ ކަމަށް މޯލްޑިވްސް މާކެޓިން ޕަބްލިކް ރިލޭޝަންސް ކޯޕަރޭޝަން، އެމްއެމްސީ) އިން ބުންޏެވެ.
މި ޕްރޮމޯޝަނަށް ޖަރުމަންގެ ވެރިރަށް ބާލިންގައި ދުއްވާ 200 ޓެކްސީއެއް ބޭނުން ކުރާނެ އެވެ. އެމްއެމްޕީއާރްސީން ބުނީ މިއީ މިފަދަ ގޮތަކަ ކުރިއަށް ގެންދެވޭ އެންމެ ބޮޑު އެއް އިނީޝިއޭޓިވް ކަމަށެވެ.
މި ޓެކްސީ ކެމްޕެއިން ކުރިއަށް ގެންދާނީ އަންނަ މަހުގެ 7 އިން ފެށިގެން މާޗް 13 ގެ ނިޔަލަށެވެ.
އެ މުއްދަތަކީ ބާލިން އިންޓަނޭޝަނަލް ފިލްމް ފެސްޓިވަލް ބީއައިއެފްއެފް) އާއި ދުނިޔޭގެ އެންމެ ބޮޑު އަދި އެންމެ މަޝްހޫރު ޓްރެވަލް ޓްރޭޑް ޝޯ ކަމަށްވާ އައިޓީބީ ބާލިންއާ ފެއާ ވެސް ކުރިއަށް ދާނެ ދުވަސްވަރެވެ.
އެހެންވެ މި ކަންކަމާ ދިމާކޮށް 600،000 ވުރެ ގިނަ މީހުން ބާލިންއަށް ދަތުރުކުރާނެތީ ޓެކްސީތައް މެދުވެރިކޮށް ރާއްޖެ ވަރަށް ބޮޑަށް ޕްރޮމޯޓްވެގެން ދާނެ އެވެ. ޓެކްސީތަކުގެ އިތުރުން މި ކެމްޕޭންގައި ބާލިނޭލްގައި ފާހަގަކޮށްލެވޭ ބިލްބޯޑްތަކެއް ހިމެނޭއިރު، މި ބޮޑު ސަގާފީ އިވެންޓަށް ފިލްމްތަކަށް ލޯބިކުރާ ފަރާތްތަކަށާއި ބައިނަލްއަގްވާމީ ޒިޔާރަތްތެރިންނަށް އަމާޒުކޮށްފައިވެ އެވެ.
މި ކެމްޕެއިންގެ އިތުރަށް، އައިޓީބީ ބާލިންގައި އެކިއެކި ހަރަކާތްތަކުގެ ތެރެއިން، އެމްއެމްޕީއާރުސީއިން ޓްރެވަލް ޓްރޭޑާއި މީޑިއާއާ ގުޅިގެން މަސައްކަތް ކުރާނެ އެވެ. މީގެ ތެރޭގައި ސިނާއަތާ ގުޅޭ މައުޟޫއުތަކުގައި ސެމިނާތަކާއި ޕެނަލް ޑިސްކަޝަންތަކުގެ އިތުރުން މީޑިއާ އާއި ނޫސްވެރިންނަށް ހާއްސަ އިވެންޓެއް ކަމަށްވާ އައިއެމްއެމް ޖަރުމަނުގައި ބައިވެރިވުން ހިމެނެ އެވެ.
ޖަރުމަނަކީ ރާއްޖެ އަށް އެންމެ ގިނަ ޓޫރިސްޓުން އަންނަ 10 ގައުމުގެ ތެރޭގައި ހިމެނޭ ގައުމެކެވެ. މިދިޔަ އަހަރު ހަތަރު ވަނަ އަށް އެންމެ ގިނަ ޓޫެރިސްޓުން އައި ގައުމުން މި އަހަރުގެ މިހާތަނަށް 7،300 އަށް ވުރެ ގިނަ ޓޫރިސްޓުން އައިސްފައިވެ އެވެ.
