ގައުމު ބިނާކުރުމުގެ ނިޒާމުގައި ދިވެހި މުއައްސަސާއަކީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ކަމަށް އެ ޕާޓީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ނަޝީދު މިފަދައިން ވިދާޅުވީ އެމްޑިޕީގެ 16 ވަނަ އަހަރީ ދުވަހުގެ މުނާސަބަތުގައި ފޮނުވި ތަހުނިޔާގެ މެސެޖުގަ އެވެ.
ނަޝީދު ވިދާޅުވީ ގައުމެއް ބިނާކޮށް ރައްޔިތެއް ގެ އާންމު ހާލަތު ރަނގަޅު ވުމުގެ އެންމެ މުހިންމު ތަރަހަ އަކީ އިންތިޒާމުވެގެން ހިންގާ ސުލްހަވެރި ސިޔާސީ ހަރަކާތް ކަމަށެވެ.
"މި ނިޒާމުގެ ދިވެހި މުއައްސަސާއަކީ އެމްޑީޕީ" ނަޝީދު ވިދާޅުވި އެވެ.
މި މެސެޖުގައި ނަޝީދު ވަނީ އެމްޑީޕީގެ އެންމެހާ މެމްބަރުންނަށް އުފާވެރި އަހަރީ ދުވަހަކަށް އެދި ތަހުނިޔާ ފޮނުވައިފަ އެވެ.
އެމްޑީޕީއަށް 16 އަހަރު ފުރުމުގެ މުނާސަބަތުގައި ބާއްވާ ހަރަކާތްތައް މިއަދު ހެނދުނު ވަނީ ފަށައިފަ އެވެ. މާލޭގެ ދެތަނެއްގައި ޕާޓީގެ ދިދަ ނެގުމުގެ ރަސްމިއްޔާތެއް ބޭއްވިއިރު މިއަދު ހަވީރު ޝުއޫރު ފާޅުކުރުމުގެ ހާއްސަ ޖަލްސާއެއް ބޭއްވުމަށް ވަނީ ހަމަޖެހިފަ އެވެ.
މިއަދު ހަވީރުގެ ޖަލްސާގައި ނަޝީދު ޖަރުމަނުގައި ހުންނަވައި ހާއްސަ މެސެޖެއް ދެއްވާނެ އެވެ. ޕާޓީގެ ލީޑަރު ރައީސް އިބްރާހިމް މުހައްމަދު ސޯލިހު ބައިވެރިވެވަޑައިގަންނަވާނެކަން ނުވަތަ ނޫންކަން އަދި އިއުލާން ނުކުރެ އެވެ.
މީގެ އިތުރުން އަހަރީ ދުވަސް ފާހަގަކުރުމުގެ ގޮތުން ސޯޝަލް މީޑިއާ ޕްލެޓްފޯމެ، ކްލަބްހައުސްގައި އެމްޑީޕީގެ ހަރުގެ އިފްތިތާހު ކުރުންވެސް މިއަދު އޮންނާނެ އެވެ.
